(កំពង់ធំ)៖ លោក ថាំង វីយុទ្ធដា ប្រធានក្រុមការងារ ចុះមូលដ្ឋានឃុំបន្ទាយស្ទោង កោតសរសើរដល់លោកគ្រូ អ្នកគ្រូ ដែលខិតខំបង្រៀនសិស្សានុសិស្សបានល្អ និងងបង្ហាញពីសមិទ្ធផលដ៏មហិមា ដែលក្រុមការងារចុះមូលឃុំបន្ទាយស្ទោង បានដឹកនាំកសាងជូន។

លោក ថាំង វីយុទ្ធដា បានធ្វើការកោតសរសើរ និងបង្ហាញពីសមិទ្ធផលនេះ ក្នុងឱកាសដែលលោកប្រធាន និងសហការីអញ្ជើញដឹកនាំកិច្ចប្រជុំសំណេះសំណាល សួរសុខទុក្ខលោកគ្រូ-អ្នកគ្រូ និងសមាជិកបក្ស ប្រមាណ ៨០នាក់ នៅព្រឹកថ្ងៃទី២០ ខែមិថុនា ឆ្នាំ២០២៦ នៅទីស្នាក់ការគណបក្សប្រជាជនកម្ពុជា ឃុំបន្ទាយស្ទោង ស្រុកស្ទោង។

នាឱកាសនោះ លោកប្រធានក្រុមការងារ បានមានមតិសំណេះសំណាល ព្រមទាំងពាំនាំនូវការផ្តាំផ្ញើសាកសួរសុខទុក្ខ ពីសំណាក់រដ្ឋមន្ត្រី ថោ ជេដ្ឋា ជូនចំពោះលោកគ្រូ-អ្នកគ្រូទាំងអស់ ដែលបានលះបង់កម្លាំងកាយចិត្ត អស់ពីបេះដូងមិនខ្លាចនឿយហត់ ក្នុងការចូលរួម បណ្តុះបណ្តាលធនធានមនុស្ស ខិតខំបង្ហាត់បង្រៀនសិស្សានុសិស្សនៅក្នុងមូលដ្ឋាន បានឆ្លើយតបនឹងយុទ្ធសាស្ត្រមូលធនមនុស្សរបស់រាជរដ្ឋាភិបាលអាណត្តិទី៧ និងយុកសម័យបច្ចេកវិទ្យាឌីជីថល ឱ្យក្លាយជាទំពាំងស្នងឫស្សី និងជាសសរទ្រូងដ៏រឹងមាំ ដើម្បីចូលរួមអភិវឌ្ឍ មូលដ្ឋានឃុំបន្ទាយស្ទោងនិងប្រទេសជាតិទៅថ្ងៃអនាគត។

បន្ថែមពីនោះដែរ លោកប្រធានក្រុមការងារ ក៏បានលើកបង្ហាញដល់អង្គប្រជុំនូវសមិទ្ធផលថ្មីៗរបស់ក្រុមការងារចុះជួយឃុំបន្ទាយស្ទោង រួមមាន៖ ការកសាងទីស្នាក់ការគណបក្សឃុំបន្ទាយស្ទោងថ្មី, ការអភិវឌ្ឍប្រព័ន្ធធារាសាស្ត្រ ស្អេកស្កះ ខ្វាត់ខ្វែង ការជួសជុលផ្លូវ និងការជីកស្រះទឹករួម ការដ្ឋានកំពុងកសាងស្ពានថ្មី និងផ្លូវក្រាលកៅស៊ូ ការចុះជួយឧបត្ថម្ភដល់គ្រួសារទទួលមរណភាព ស្រ្តីសម្រាលកូន (កូនខ្ចី) និងគ្រួសារទីទ័លក្រ ការជួសជុលអគារសិក្សា សាលាឆាន់ ជារួមគឺការអភិវឌ្ឍន៍ឃុំបន្ទាយស្ទោងឱ្យកាន់តែរីកចម្រើនរុងរឿងជាងមុនបន្ថែមទៀត ដូចដែលបានឃើញជាក់ស្ដែងជាតឹកតាងស្រាប់។

សូមបញ្ជាក់ថា នៅទូទាំងឃុំបន្ទាយស្ទោង មានសាលាបឋមសិក្សាចំនួន ០៨ និងអនុវិទ្យាល័យចំនួន ០១ ដែលមានលោកគ្រូ-អ្នកគ្រូសរុបចំនួន ៦០នាក់ (ស្រី ៣៥នាក់)។ ដើម្បីជាការលើកទឹកចិត្ត លោកប្រធានក្រុមការងារបានឧបត្ថម្ភជូនលោកគ្រូ-អ្នកគ្រូ ដោយក្នុងម្នាក់ៗទទួលបាន៖ ក្រណាត់អាវមួយដុំ, ក្រណាត់ខោ ឬសំពត់មួយដុំ, ឡូហ្គោគណបក្សមួយ និងថវិកាចំនួន ៥ម៉ឺនរៀល។

ថ្លែងនៅក្នុងអង្គប្រជុំនោះដែរ លោកប្រធានក្រុមការងារ ក៏បានប្រកាសបើកយុទ្ធនាការ ចុះពង្រឹងការងារគណបក្ស ដោយចាត់តាំងឱ្យក្រុមការងារចុះសួរសុខទុក្ខ ក៏ដូចជាជួបប្រជុំពិភាក្សាការងារជាមួយបងប្អូនសមាជិក សមាជិកាគណបក្ស ដល់ខ្នងផ្ទះតាមមូលដ្ឋានភូមិនីមួយៗផ្ទាល់ នៅទូទាំងឃុំបន្ទាយស្ទោង ដើម្បីស្វែងយល់ពីជីវភាពរស់នៅ និងបង្កើនភាពស្និទ្ធស្នាលរវាងគណបក្ស និងប្រជាពលរដ្ឋផងដែរ៕