(សៀមរាប)៖ អ្នកស្រី ហែម ស្រី រស់នៅក្នុងសង្កាត់កូនក្រៀល ក្រុងសំរោង ខេត្តឧត្តរមានជ័យ ដែលជាជនរងគ្រោះដោយពីសំណល់អាវុធជាតិផ្ទុះ កាលពីអំឡុងខែឧសភាកន្លងទៅ នៅថ្ងៃទី២០ ខែមិថុនានេះ បានសម្ដែងក្តីរំភើប និងថ្លែងអំណរគុណចំពោះក្រុមគ្រូពេទ្យ នៃមន្ទីរពេទ្យបង្អែកខេត្តសៀមរាប ក៏ដូចជាអាជ្ញាធរពាក់ព័ន្ធទាំងអស់ ដែលបានខិតខំប្រឹងប្រែងជួយសង្គ្រោះអ្នកស្រីរហូតដល់ជាសះស្បើយ និងអាចវិលត្រឡប់ទៅជួបជុំក្រុមគ្រួសារវិញ។

អ្នកស្រី ហែម ស្រី បានឲ្យដឹងថា ដំបូងឡើយអ្នកស្រី និងកូន ក្មួយ បានទៅធ្វើការឆ្កាព្រៃដីចម្ការរបស់គាត់ ដែលមានចម្ងាយប្រមាណ២០គីឡូម៉ែត្រពីផ្ទះ ក្នុងពេលកំពុងដុតសំរាមនៅក្បែរទួលដំបូក ក៏ត្រូវបានរងរបួសដោយ សំណល់អាវុធជាតិផ្ទុះក៏បានផ្ទុះឡើងហើយអ្នកស្រីបានរងរបួសយ៉ាងធ្ងន់ និងត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យបង្អែកខេត្តឧត្តរមានជ័យ បន្ទាប់មកក៏បានបញ្ជូនបន្តមកកាន់មន្ទីរពេទ្យបង្អែកខេត្តសៀមរាប ដែលគិតមកទាល់ពេលនេះ មានរយៈពេលជិត១ខែហើយ អ្នកស្រីក៏ត្រូវបានការអនុញ្ញាតឱ្យចេញពីមន្ទីរពេទ្យផងដែរ។

អ្នកស្រី ហែម ស្រី បានបន្តថា អ្នកស្រីទទួលបានការសង្គ្រោះ ព្យាបាលយ៉ាងយកចិត្តទុកដាក់ និងទាន់ពេលវេលា ពីសំណាក់ក្រុមគ្រូពេទ្យជំនាញ និងថ្នាក់ដឹកនាំគ្រប់លំដាប់ថ្នាក់ ខណៈអ្នកស្រីមិនសង្ឃឹមថា នឹងអាចបន្ដជីវិតនេះបានឡើយ ដោយផ្អែកតាមស្ថានភាពធ្ងន់ធ្ងររបស់ខ្លួន។

លោកវេជ្ជបណ្ឌិត ហម គឹមហ៊ាន ប្រធានផ្នែកប្រពោធនកម្មវះកាត់ នៃមន្ទីរពេទ្យបង្អែកខេត្តសៀមរាប បានឲ្យដឹងថា បន្ទាប់ពីទទួលបានដំណឹងពីវត្តមាននៃជនរងគ្រោះរួចមក លោកវេជ្ជបណ្ឌិត ក៏បានបង្កើតក្រុមការងារពហុជំនាញ ដើម្បីធ្វើការវាយតម្លៃ ពីស្ថានភាពរបួស និងនិតិវិធីនៃការជួយសង្គ្រោះ រហូតដល់ដំណើរការនៃការវះកាត់ និងទទួលបានជោគជ័យទាំងស្រុង។

លោកវេជ្ជបណ្ឌិត បានបន្ដថា បើទោះបីជាស្ថានភាពរបស់ជនរងគ្រោះមានភាពល្អប្រសើរក៏ដោយ ក៏ក្រុមគ្រូពេទ្យនៅតែបន្ដធ្វើការតាមដានពីការវិវត្តន៍ជាប់ជាប្រចាំ ដើម្បីប្រាកដថា ផលវិបាកក្រោយពេលវះកាត់ នឹងត្រូវបានកាត់បន្ថយ ជាពិសេសការតាមដានសុខភាពក្រោយពេលចេញពីមន្ទីរពេទ្យ ដោយមានកាលវិភាគនៃការណាត់ជួបជាបន្ដបន្ទាប់ផងដែរ។

លោកវេជ្ជបណ្ឌិត ហម គឹម ហ៊ាន បញ្ជាក់ថា នេះមិនមែនជាករណីទី១នោះឡើយ ដែលក្រុមគ្រូពេទ្យជំនាញជួបប្រទះអ្នកជំងឺមានស្ថានភាពធ្ងន់ធ្ងរដូចនេះ ក៏ដោយសារតែក្រុមគ្រូពេទ្យសុទ្ធតែមានសមត្ថភាព និងបទពិសោធ ព្រមទាំងសម្ភារបរិក្ខារក៏មានគ្រប់គ្រាន់ ដែលបានផ្ដល់នូវទំនុកចិត្តដល់អ្នកជំងឺ មកទទួលការព្យាបាល៕