(ព្រះវិហារ)៖ លោក រស់ វីរ៉េត មេឃុំអារក្សត្នោត ស្រុកស្ទឹងត្រង់ ខេត្តកំពង់ចាម នៅថ្ងៃទី២០ ខែមិថុនា ឆ្នាំ២០២៦ បានដឹកនាំក្រុមការងារ ប្រជាពលរដ្ឋ នាំយកផ្លែទុរេនទុំ (បែកអន្លូង) ចំនួន១តោន និងផ្លែសាវម៉ាវ ៤០០គីឡូក្រាម ព្រមទាំងថវិកាមួយចំនួន ប្រគល់ជូនវីរកងទ័ពជួរមុខនៃអង្គភាពកងពលតូចអន្តរាគមន៍លេខ៧ ដែលកំពុងឈរជើងនៅតំបន់ភ្នំខ្មោច សមរភូមិទិសទី១ ប្រាសាទព្រះវិហារ។

ពិធីប្រគល់អំណោយនេះ បានប្រព្រឹត្តទៅក្រោមវត្តមានទទួលស្វាគមន៍ពីលោកឧត្តមសេនីយ៍ទោ ផុន សុម៉ាលី មេបញ្ជាការកងពលតូចអន្តរាគមន៍លេខ៧ រួមជាមួយនាយទាហាន នាយទាហានរង និងពលទាហានជាច្រើនរូប។

លោក រស់ វីរ៉េត បានថ្លែងថា ដោយទទួលបានការអនុញ្ញាតពីលោក បាន ស្រេង អភិបាលស្រុកស្ទឹងត្រង់ និងការគាំទ្រពីលោក អ៊ុន ចាន់ដា អភិបាលខេត្តកំពង់ចាម ថ្ងៃនេះលោកបានដឹកនាំក្រុមការងារ និងប្រជាពលរដ្ឋ ចុះសួរសុខទុក្ខ និងនាំយកអំណោយជាផ្លែឈើ និងថវិកាមួយចំនួន មកជូនដល់កងកម្លាំងជួរមុខ ដើម្បីលើកទឹកចិត្តដល់ការបំពេញបេសកកម្មការពារបូរណភាពទឹកដីជាតិ។

លោកមេឃុំអារក្សត្នោត បានសម្តែងនូវការគោរព កោតសរសើរ និងវាយតម្លៃខ្ពស់ចំពោះវីរភាព និងការលះបង់របស់កងទ័ព ដែលបានបំពេញភារកិច្ចយ៉ាងអង់អាចក្នុងការការពារអធិបតេយ្យ និងបូរណភាពទឹកដីរបស់កម្ពុជាយើង។

លោកមេឃុំបានថ្លែងបញ្ជាក់ថា៖ នេះជាលើកទី៩ហើយ ដែលលោក រួមជាមួយក្រុមការងារ ប្រជាពលរដ្ឋ និងអាជីវករ បានចុះសួរសុខទុក្ខ និងនាំយកអំណោយជូនវីរកងទ័ព ក៏ដូចជាប្រជាពលរដ្ឋដែលបានស្នាក់នៅតាមមណ្ឌលសុវត្ថិភាពនានា អំឡុងពេលកន្លងមក។ លោកក៏បានថ្លែងអំណរគុណដល់ប្រជាពលរដ្ឋ និងអាជីវករទាំងអស់ ដែលបានចូលរួមឧបត្ថម្ភជាថវិកា និងសម្ភារផ្សេងៗ ជាមួយរដ្ឋបាលឃុំ ដើម្បីរដ្ឋបាលឃុំអាចបន្តសកម្មភាពទាំងនេះបានជាបន្តបន្ទាប់។

ជាការឆ្លើយតប លោកឧត្តមសេនីយ៍ទោ ផុន សុម៉ាលី មេបញ្ជាការកងពលតូចអន្តរាគមន៍លេខ៧ បានថ្លែងអំណរគុណចំពោះលោក បាន ស្រេង អភិបាលស្រុកស្ទឹងត្រង់ ពិសេសលោក អ៊ុន ចាន់ដា អភិបាលខេត្តកំពង់ចាម ព្រមទាំងប្រជាពលរដ្ឋ និងបងប្អូនអាជីវករ តាមរយៈលោកមេឃុំអារក្សត្នោត ដែលតែងតែយកចិត្តទុកដាក់ និងផ្តល់ការគាំទ្រជាសម្ភារ និងថវិកាដល់អង្គភាពកងពលតូចអន្តរាគមន៍លេខ៧។

លោកឧត្តមសេនីយ៍ទោ ផុន សុម៉ាលី បានថ្លែងបញ្ជាក់ថា៖ ការយកចិត្តទុកដាក់ និងការគាំទ្រពីថ្នាក់ដឹកនាំ និងប្រជាពលរដ្ឋ បានធ្វើឱ្យកងកម្លាំងយើងខ្ញុំមានភាពកក់ក្តៅ និងកាន់តែមានកម្លាំងចិត្តក្នុងការបំពេញភារកិច្ចការពារបូរណភាពទឹកដី ពិសេសការពារពីការឈ្លានពានរបស់កងទ័ពថៃ៕