(តាកែវ)៖ លោក អ៊ុំ ចំរើន អភិបាលស្រុកទ្រាំង នៅព្រឹកថ្ងៃទី២១ ខែមិថុនា ឆ្នាំ២០២៦នេះ បានដឹកនាំសហការីចុះសាកសួរសុខទុក្ខ វីរកងទ័ពចំនួន ២នាក់ ដែលបានមកលេងស្រុកកំណេីត នៅភូមិឈើទាលបាក់ ឃុំធ្លក ស្រុកទ្រាំង ខេត្តតាកែវ និងបាននាំយកសម្ភារៈ និងថវិការបស់ក្រុមការងារផ្តល់ជូនមួយចំនួនផងដែរ។

មានប្រសាសន៍នៅក្នុងឱកាសនោះលោក អ៊ុំ ចំរើន បានពាំនាំនូវការផ្តាំផ្ញើសួរសុខទុក្ខ និងការលើកទឹកចិត្តពីសំណាក់លោក វ៉ី សំណាង អភិបាលខេត្តតាកែវ ជូនចំពោះក្រុមគ្រួសារវីរកងទ័ព និងបងប្អូនវីរកងទ័ព ដែលមកលេងស្រុកកំណើត និងបងប្អូនវីរកងទ័ព ដែលកំពុងឈរជើងយ៉ាងអង់អាចនៅសមរភូមិជួរមុខ ដើម្បីការពារព្រំដែន និងទប់ស្កាត់សកម្មភាពឈ្លានពានពីសំណាក់បរទេស ហើយថ្នាក់ដឹកនាំខេត្តតាកែវតែងណែនាំដល់អាជ្ញាធក្រុងស្រុកឲ្យចុះមកសួរសុខទុក្ខពេលបងប្អូនវីរកងទ័ពវិលត្រលប់មកលេងស្រុកកំណើតម្ដងៗ។

លោក អ៊ុំ ចំរើន ក៏បានថ្លែងអំណរគុណយ៉ាងជ្រាលជ្រៅចំពោះក្រុមគ្រួសារវីរកងទ័ព ដែលបានលះបង់ និងគាំទ្រឲ្យកូនប្រុសចូលបម្រើជាកងទ័ព ដើម្បីការពារជាតិមាតុភូមិ ហើយលោកបានអះអាងថា រដ្ឋបាលស្រុកទ្រាំងនឹងបន្តយកចិត្តទុកដាក់ និងជួយឧបត្ថម្ភតាមលទ្ធភាព ដើម្បីជួយសម្រាលការលំបាកដល់ក្រុមគ្រួសារកងទ័ពដែលនៅសមរភូមិក្រោយផងដែរ៕