(ស្វាយរៀង)៖ លោក ឌុច គន្ធា អភិបាលរងនៃគណៈអភិបាលខេត្តស្វាយរៀង នៅថ្ងៃទី១៩ ខែមិថុនា ឆ្នាំ២០២៦នេះ បានអញ្ជើញជាអធិបតីក្នុងពិធីបើកទិវាអ្នកប្រើប្រាស់ស្តីពី ផលិតផលកសិកម្មសុវត្ថិភាព ដោយសហការ ជាមួយសមាជិករបស់ខ្លួន ក្រោមប្រធានបទ «ពង្រឹងការយល់ដឹងរបស់អ្នកប្រើប្រាស់អំពីកសិផលសុវត្ថិភាព ដែល ផលិតតាមការអនុវត្តកសិអេកូឡូស៊ី» ដោយរៀបចំដោយ បណ្តាញ ALISEA នៅខេត្ដស្វាយរៀង។

នាឳកាសនេះដែរ លោក ឌុច គន្ធា បានបញ្ជាក់ថា ការផ្សព្វផ្សាយដល់ប្រជាពលរដ្ឋយើងទូទាំងប្រទេស ឲ្យយល់ច្បាស់អំពីអាហាររូបត្ថម្ភទាំងឡាយ សម្រាប់សុខភាពរបស់ខ្លួនម្នាក់ៗ គឺជាការសំខាន់បំផុតហើយ ព្រោះមនុស្សយើងសំខាន់ណាស់សព្វថ្ងៃនេះ ដោយវិទ្យាសាស្ដ្រនៃការរីកចម្រើនច្រើន ហើយផ្នែកផលិតផល ផ្នែកកសិកម្ម ផ្នែកឧស្សាហកម្មក៏ច្រើន ជាពិសេសគ្រឿងកំប៉ុង ដែលសម្បូរទៅដោយជាតិគីមីផ្សំឡើងច្រើន តែដោយឡែកកន្លងទៅ នៅបន្លែទាំងអស់ នៅតាមជនបទក៏ប្រជាពលរដ្ឋយើងភាគច្រើនក៏ប្រើប្រាស់ជីគីមីដែរ។

អភិបាលរងរូបនេះ បានបន្ដថា មកដល់ពេលនេះយើងទាំងអស់គ្នាបានឆ្លងកាត់នៃការហូបចុកកន្លងទៅ បានធ្វើឲ្យសុខភាពយើង ដោយពិសាអាហារសម្បូរដោយគីមី អាហារគ្រឿងទេសផ្សេងៗ សម្បូរដោយគីមី ធ្វើឲ្យខូចសុខភាព និងមានជំងឺក៏ច្រើន។

លោកបានបន្ដថា បច្ចុប្បន្ននេះ មានជំងឺមហារីក មានជំងឺទឹកនោមផ្អែម និងជំងឺទឹកនោមប្រៃ មិនចាំបាច់តែក្មេង ឬចាស់ទេ ឥឡូវទឹកនោមផ្អែមមានទាំងអស់គ្នានេះ ជាការវិវត្តមួយជាការឆ្លងកាត់មួយ នៅក្នុងការហូបចុករបស់អាហាររូបត្ថម្ភ ដែលប្រជាពលរដ្ឋយើងហូបចុកតែមកដល់បច្ចុប្បន្ននេះ ឥឡូវថ្ងៃនេះ គឺជាថ្ងៃដែលសំខាន់ ដែលយើងបានជួបជុំអ្នកដែលប្រើប្រាស់ផលិតផលកសិអេកូឡូស៊ី ដែលបានរៀបចំឡើងនៅថ្ងៃនេះ នៅខេត្តស្វាយរៀងរបស់យើងនេះ បានធ្វើឲ្យការផ្សព្វផ្សាយទាំងនេះទៅដល់ប្រជាពលរដ្ឋយើងនៅតាមភូមិ ឃុំ ស្រុក ជាពិសេសនៅខេត្តស្វាយរៀង។

បន្ថែមពីនេះ អភិបាលរងរូបនេះ ក៏សូមអំពាវនាវឲ្យបងប្អូនប្រជាពលរដ្ឋទាំងអស់ ជាពិសេសនៅក្រុងស្វាយរៀង ដែលនៅទីនេះអញ្ជើញមកចូលរួមទស្សនាការតាំងពិព័រណ៍អាហាររូបត្ថម្ភ ដែលផលិតឡើងដោយធម្មជាតិ ហើយជាអាហាររូបត្ថម្ភ ដែលប្រកបដោយសុវត្ថិភាពនៅក្នុងក្រុមគ្រួសាររបស់យើង ឲ្យអញ្ជើញមកជួយមើលហើយនិងទិញបងប្អូនយើងដែលមកពីទាំង១៥ ខេត្តក្រុងនៃប្រទេសកម្ពុជា។

សូមជម្រាបដែរថា កម្មវិធីនេះ បានរៀបចំឡើងក្នុងគោលបំណងដើម្បីផ្សារភ្ជាប់ទំនាក់ទំនងរវាងអ្នកផលិត និងអ្នកប្រើប្រាស់ ព្រមទាំង ពង្រឹងការយល់ដឹងអំពីភាពខុសគ្នានៃផលិតផល ឬកសិផលសុវត្ថិភាពដែលផលិតតាមការអនុវត្តកសិអេកូឡូស៊ី៕

សូមទស្សនាវីដេអូទាំងស្រុងរបស់ លោក ឌុច គន្ធា ដូចខាងក្រោម៖