(បាត់ដំបង)៖ លោកឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច តំណាងនាយឧត្តមសេនីយ៍ ស ថេត អគ្គស្នងការនគរបាលជាតិ នៅថ្ងៃទី១៧ ខែមិថុនា ឆ្នាំ២០២៦ បានអញ្ជើញជាអធិបតីក្នុងពិធីបិទវគ្គបំប៉នជំនាញកម្មសិទ្ធិបញ្ញា ស្តីពី «នីតិវិធីស្រាវជ្រាវស៊ើបអង្កេតបទល្មើសកម្មសិទ្ធិបញ្ញា» នៅសណ្ឋាគារស្ទឹងសង្កែ ខេត្តបាត់ដំបង ក្រោមការឧបត្ថម្ភពីក្រុមហ៊ុន TILLEKE & GIBBINS (CAMBODIA) និងក្រុមហ៊ុន PICH BT TRADING IMPORT EXPORT រួមនឹងក្រុមហ៊ុនដៃគូ។

ថ្លែងក្នុងពិធីមួយនេះ លោកឧត្តមសេនីយ៍ឯក ចាន់ វ៉ាន់ធឿន បាននាំនូវការសាកសួរសុខទុក្ខពីលោកអភិសន្តិបណ្ឌិត ស សុខា ឧបនាយរដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏ដូចជា នាយឧត្តមសេនីយ៍ ស ថេត អគ្គស្នងការនគរបាលជាតិ ជូនដល់សិក្ខាកាមទាំង៨០រូប ដែលបានចំណាយពេលដ៏មានតម្លៃ ក្នុងការចូលរួមវគ្គបំប៉នជំនាញរយៈពេល៣ថ្ងៃ ដោយការយកចិត្តទុកដាក់ ស្តាប់ការធ្វើបទបង្ហាញ និងបកស្រាយពីវាគ្មិនសំខាន់ៗ នូវជំនាញពាក់ព័ន្ធនឹងបទល្មើសកម្មសិទ្ធិបញ្ញា។

ជាមួយគ្នានេះ លោកប្រធាននាយកដ្ឋានក៏បានផ្តាំផ្ញើឲ្យសិក្ខាកាមទាំងអស់ យកនូវចំណេះដឹងដែលទទួលបាននៅថ្ងៃនេះ ទៅបំពេញបន្ថែមលើចំណុចខ្វះខាត ការយល់ច្រឡំ និងសំណូមពរចាំបាច់នានា ឆ្លើយតបទៅនឹងតម្រូវការ នៃការប្រតិបត្តិច្បាប់ពាក់ព័ន្ធជាមូលដ្ឋានក្នុងការពិនិត្យពិចារណា និងកែសម្រួលលើការអនុវត្តតួនាទី និងភារកិច្ចរបស់មន្តី្រនគរបាលយុត្តិធម៌ ឲ្យស្របតាមក្រមនីតិវីធីព្រហ្មទណ្ឌ ក៏ដូចជាស្របតាមច្បាប់ និងបទប្បញ្ញត្តិជាធរមាន ឲ្យមានប្រសិទ្ធភាពខ្ពស់។

សូមរំលឹកថា នេះជាលើកទី៩ហើយ ដែលនាយកដ្ឋាននគរបាលប្រឆាំងបទល្មើសសេដ្ឋកិច្ច បើកវគ្គបំប៉នជំនាញដូចគ្នានេះ ហើយក៏ជាលើទី៥ ដែលមានការសហការឧបត្ថម្ភពី ក្រុមហ៊ុន TILLEKE & GIBBINS (CAMBODIA) និងក្រុមហ៊ុន PICH BT TRADING IMPORT EXPORT រួមនឹងក្រុមហ៊ុនដៃគូ៕