(ព្រះវិហារ)៖ លោក គឹម វណ្ណឆេង សមាជិកគណៈកម្មាធិការគណបក្សស្ថាប័នជុំវិញគណៈកម្មាធិការកណ្តាល គណៈចលនាអង្គការ សមាគម និងដៃគូអភិវឌ្ឍន៍ នៃគណៈចលនាមហាជន និងជាប្រធានគណៈកម្មាធិការសាខាគណបក្សប្រជាជនកម្ពុជា សម្របសម្រួលខ្មែរក្រោម តំណាងលោក ឯក សំអុល សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានគណៈកម្មាធិការគណបក្សស្ថាប័នជុំវិញគណៈកម្មាធិការកណ្តាល ដោយមានការចូលរួមពីលោក ឈឿន មុនី និងលោក រស់ ហេង សមាជិកគណៈកម្មាធិការគណបក្សប្រជាជនកម្ពុជាខេត្តព្រះវិហារ នៅព្រឹកថ្ងៃទី២១ ខែមិថុនា ឆ្នាំ២០២៦ បានដឹកនាំប្រតិភូ ចុះសំណេះសំណាល សួរសុខទុក្ខ និងនាំយកគ្រឿងឧបភោគបរិភោគ ព្រមទាំងសម្ភារចាំបាច់មួយចំនួន ប្រគល់ជូនដល់វីរកងទ័ពអង្គភាពកងពលតូចអន្តរាគមន៍លេខ៨ និងវីរកងទ័ពអង្គភាពកងពលតូចអន្តរាគមន៍លេខ៧ ដែលកំពុងឈរជើងការពារបូរណភាពទឹកដីនៅសមរភូមិទិសទី១ ប្រាសាទព្រះវិហារ។

ពិធីនេះត្រូវបានប្រារព្ធឡើងនៅពីរទីតាំងផ្សេងគ្នា គឺនៅទីបញ្ជាការកងពលតូចអន្តរាគមន៍លេខ៨ មានការទទួលស្វាគមន៍ពីលោកឧត្តមសេនីយ៍ត្រី ច័ន្ទ សុខុន មេបញ្ជាការកងពល រួមជាមួយនាយទាហាន និងនាយទាហានរងជាច្រើនរូប និងនៅទីបញ្ជាការកងពលតូចអន្តរាគមន៍លេខ៧ មានការទទួលស្វាគមន៍ពីលោកឧត្តមសេនីយ៍ទោ ផុន សុម៉ាលី មេបញ្ជាការកងពល ព្រមទាំងនាយទាហាន និងនាយទាហានរងជាច្រើនរូប។

ក្នុងឱកាសនោះ លោក គឹម វណ្ណឆេង បានពាំនាំនូវការផ្តាំផ្ញើសាកសួរសុខទុក្ខ និងការកោតសរសើរពីសំណាក់លោក ឯក សំអុល ជូនចំពោះកងកម្លាំងប្រដាប់អាវុធដែលកំពុងឈរជើងការពារបូរណភាពទឹកដី និងរក្សាសុខសន្តិភាពជូនជាតិ និងប្រជាជន។

លោក គឹម វណ្ណឆេង បានថ្លែងថា អំណោយដែលយើងនាំមកនាពេលនេះ ទោះបីមិនមានចំនួនច្រើនក៏ពិតមែន ប៉ុន្តែវាបានបង្ហាញពីទឹកចិត្តសាមគ្គីភាព ក្តីស្រឡាញ់ និងការគាំទ្រយ៉ាងពេញទំហឹងពីថ្នាក់ដឹកនាំ អង្គការ សមាគមខ្មែរក្រោម និងប្រជាពលរដ្ឋខ្មែរគ្រប់មជ្ឈដ្ឋាន ចំពោះបងប្អូនកងទ័ពដែលកំពុងបំពេញបេសកកម្មដ៏ឧត្តុង្គឧត្តមក្នុងការការពារបូរណភាពទឹកដី មាតុភូមិ និងសេចក្តីសុខសាន្តរបស់ប្រជាជន។

លោកបានបន្តថា យើងទាំងអស់គ្នា សូមគាំទ្រយ៉ាងពេញទំហឹងចំពោះកងកម្លាំងប្រដាប់អាវុធគ្រប់ប្រភេទ និងជឿជាក់យ៉ាងមុតមាំថា ក្រោមការដឹកនាំដ៏ត្រឹមត្រូវរបស់រាជរដ្ឋាភិបាល កងទ័ពកម្ពុជានឹងបន្តបំពេញភារកិច្ចបានដោយជោគជ័យ ដើម្បីថែរក្សាបាននូវសន្តិភាព និងបូរណភាពទឹកដីដ៏បរិសុទ្ធរបស់ជាតិ។

ជាការឆ្លើយតប លោកឧត្តមសេនីយ៍ត្រី ច័ន្ទ សុខុន មេបញ្ជាការកងពលតូចអន្តរាគមន៍លេខ៨ បានសម្តែងនូវការដឹងគុណ និងថ្លែងអំណរគុណយ៉ាងជ្រាលជ្រៅចំពោះលោក ឯក សំអុល លោក គឹម វណ្ណឆេង និងប្រតិភូអមដំណើរ ដែលបានចំណាយពេលវេលាដ៏មានតម្លៃ អញ្ជើញមកសួរសុខទុក្ខ និងនាំយកអំណោយមកឧបត្ថម្ភដល់កងទ័ពនៅជួរមុខ។

លោកឧត្តមសេនីយ៍ត្រី ច័ន្ទ សុខុន បានថ្លែងថា ការយកចិត្តទុកដាក់ និងការគាំទ្រពីថ្នាក់ដឹកនាំ អង្គការ សមាគម និងប្រជាពលរដ្ឋ គឺជាកម្លាំងចិត្តដ៏ធំធេងសម្រាប់កងទ័ពយើងខ្ញុំ ក្នុងការបន្តបំពេញភារកិច្ចការពារបូរណភាពទឹកដី និងបម្រើជាតិមាតុភូមិដោយស្មោះស្ម័គ្រជានិច្ច។

ដោយឡែកលោកឧត្តមសេនីយ៍ទោ ផុន សុម៉ាលី មេបញ្ជាការកងពលតូចអន្តរាគមន៍លេខ៧ ក៏បានថ្លែងអំណរគុណយ៉ាងជ្រាលជ្រៅផងដែរ និងបានចាត់ទុកថា ការចុះសួរសុខទុក្ខ និងការឧបត្ថម្ភសម្ភារនាពេលនេះ បានឆ្លុះបញ្ចាំងពីស្មារតីសាមគ្គីភាពរវាងកងទ័ព និងប្រជាជន ដែលជាកម្លាំងរួមដ៏រឹងមាំក្នុងការការពារជាតិមាតុភូមិ។

លោកឧត្តមសេនីយ៍ទោ ផុន សុម៉ាលី បានបញ្ជាក់ថាកងកម្លាំងទាំងអស់នៃកងពលតូចអន្តរាគមន៍លេខ៧ ប្តេជ្ញាបន្តអនុវត្តតាមបទបញ្ជារបស់ថ្នាក់លើ ដោយត្រៀមខ្លួនជានិច្ចក្នុងការការពារបូរណភាពទឹកដី សន្តិភាព និងផលប្រយោជន៍ជាតិឱ្យបានគង់វង្ស៕