(ភ្នំពេញ)៖ ជនសង្ស័យដែលបានយកឈ្មោះលោកឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ ទៅឆបោកប្រជាពលរដ្ឋ ពេលនេះចាប់បានហើយ ដោយជននេះសារភាពថា ធ្លាប់ធ្វើសកម្មភាពដូចនេះប្រមាណ ៥០លើកមកហើយ និងបានជោគជ័យ ២៥លើក។

នារសៀលថ្ងៃទី២១ ខែមិថុនា ឆ្នាំ២០២៦នេះ លោកឧត្តមសេនីយ៍ឯក ឌី វិជ្ជា បានប្រកាសយ៉ាងដូច្នេះថា «ចាប់បានហេីយ ! ក្រោយធ្វើការសាកសួរ បុគ្គលនេះធ្លាប់ធ្វើសកម្មភាពប្រមាណ ៥០លើកមកហើយ និងបានជោគជ័យ ២៥លើក ហើយប្រមាណ ០៥លើកលើ ០៨ករណី ទទួលបានជោគជ័យក្រោមរូបភាពប្រើប្រាស់ឈ្មោះថ្នាក់ដឹកនាំ ទៅគំរាមទារប្រាក់»។

លោកឧត្តមសេនីយ៍ឯកបន្ថែមថា «ជាបន្តបន្ទាប់ជននេះក៏បានប្រើប្រាស់រូបថតនិងឈ្មោះខ្ញុំ ដើម្បីក្លែងបន្លំក្នុងការធ្វើសកម្មភាពឆបោករបស់ខ្លួន ប៉ុន្តែដោយសារមានការផ្ដល់ព័ត៌មាននានាពាក់ព័ន្ធនឹងបុគ្គលនេះ ទើបសមត្ថកិច្ចធ្វើការស្រាវជ្រាវ និងឈានដល់ការឃាត់ខ្លួន»។

លោកឧត្តមសេនីយ៍ឯក ឌី វិជ្ជា ក៏បានថ្លែងសូមអរគុណដល់បងប្អូនទាំងអស់ ហើយសូមបន្តចូលរួមទប់ស្កាត់បទល្មើសបែបនេះបន្ថែមទៀត។

សូមបញ្ជាក់ថា លោកឧត្តមសេនីយ៍ឯក ឌី វិជ្ជា កាលពីយប់ថ្ងៃទី១៧ ខែមិថុនា ឆ្នាំ២០២៦កន្លងទៅ បានប្រកាសតាមរកបុគ្គលទុច្ចរិតម្នាក់ ដែលបានយករូបថត និងឈ្មោះរបស់លោកទៅឆបោកប្រជាពលរដ្ឋ ដោយលោកបានប្រកាសថា នឹងផ្តល់រង្វាន់ចំនូន៥លានរៀល ជូនអ្នកដែលបានដឹង និងស្គាល់ បុគ្គលដែលយករូបថត និងឈ្មោះរបស់លោកទៅធ្វើសកម្មភាពឆបោកនេះផងដែរ៕