(ភ្នំពេញ)៖ បន្ទាប់ពីបានទទួលដំណឹងភ្លាមៗ អំពីស្ថានភាពយុវជន ង៉ន វិសាល អាយុ ១៩ឆ្នាំ ជាសិស្សថ្នាក់ទី ១១A នៃវិទ្យាល័យសម្តេចអគ្គមហាសេនាបតីតេជោ ហ៊ុនសែន អង្គតាសោម ត្រូវបានម្តាយបញ្ជូនទៅសង្គ្រោះបន្ទាន់ កាលពីថ្ងៃទី១៨ ខែមិថុនាកន្លងទៅ ដោយសារជំងឺខូចតម្រង់នោមធ្ងន់ធ្ងរ, នៅរសៀលថ្ងៃទី២០ ខែមិថុនា ឆ្នាំ២០២៦ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់លោកស្រី ម៉ែន នារីសោភ័គ អគ្គលេខាធិការរងទី១ ជួបសំណេះសំណាល និងសួរសុខទុក្ខ ព្រមទាំងផ្តល់អំណោយមនុស្សធម៌ជាគ្រឿងឧបភោគបរិភោគនិងថវិកាមួយចំនួន ជូនអ្នកស្រី ង៉ែត ណាវី ជាម្តាយបង្កើតយុវជន ង៉ន វិសាល នៅទីស្នាក់ការកណ្តាលកាកបាទក្រហមកម្ពុជា។ បច្ចុប្បន្ន យុវជន ង៉ន វិសាល កំពុងសង្គ្រោះបន្ទាន់បន្ទប់លាងឈាម (ACU) មន្ទីរពេទ្យមិត្តភាពកម្ពុជា-ចិន ព្រះកុសមៈ។

នៅក្នុងឱកាសដ៏ក្តុកក្តួលនោះ លោកស្រីអគ្គលេខាធិការរងទី១ បាននាំយកនូវប្រសាសន៍សួរសុខទុក្ខ ប្រកបដោយសេចក្តីអាណិតអាសូរជាពន់ពេក របស់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ជម្រាបជូនអ្នកស្រី ង៉ែត ណាវី ដែលជាម្តាយបង្កើត។ ជាមួយគ្នានោះលោកស្រីក៏បានពាំនាំនូវសារអប់រំសុខភាព និងការណែនាំដ៏មានសារៈសំខាន់ ក្នុងការថែទាំអ្នកជំងឺថា «សូមអ្នកស្រីជឿជាក់ និងស្តាប់តាមការណែនាំរបស់លោកគ្រូអ្នកគ្រូពេទ្យឱ្យបានខ្ជាប់ខ្ជួន។ ជាពិសេស ក្នុងការរៀបចំម្ហូបអាហារ ត្រូវប្រើប្រាស់ចានស្រាក់ដែក និងត្រូវជៀសវាងដាច់ខាតការដាក់អាហារក្តៅៗនៅក្នុងថង់ផ្លាស្ទិក ក៏ដូចជាអាហារដែលមានសារធាតុគីមី។ លើសពីនេះ អ្នកស្រីផ្ទាល់ ក៏ត្រូវថែរក្សាសុខភាពខ្លួនឯងឱ្យបានល្អ ដើម្បីមានកម្លាំងមាំមួនក្នុងការមើលថែកូនប្រុស»។

ការយកចិត្តទុកដាក់ និងអំណោយមនុស្សធម៌ ដែលរួមមានគ្រឿងឧបភោគបរិភោគ និងថវិកាមួយចំនួននេះ បានធ្វើឱ្យអ្នកស្រី ង៉ែត ណាវី ជាម្តាយ រំភើបចិត្តរហូតស្រក់ទឹកភ្នែក។ ទាំងក្តីរំភើប ទាំងម្រាមដៃដប់សំពះ អ្នកស្រីបានថ្លែងអំណរគុណយ៉ាងជ្រាលជ្រៅបំផុត ជូនចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានផ្តល់ដង្ហើមជីវិត និងថវិកាដ៏មានតម្លៃ សម្រាប់ព្យាបាលកូនប្រុសរបស់គាត់។ ម្តាយអ្នកជំងឺរូបនេះ ក៏បានបួងសួងដល់វត្ថុស័ក្តិសិទ្ធិក្នុងលោក សូមជួយតាមថែរក្សា សម្តេចកិត្តិព្រឹទ្ធបណ្ឌិត ឱ្យមានសុខភាពល្អបរិបូរណ៍ និងបន្តជាម្លប់ដ៏ត្រជាក់ត្រជុំ សម្រាប់ប្រជាជនកម្ពុជាជានិច្ចនិរន្តរ៍៕