(ភ្នំពេញ)៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានផ្ញើសារលិខិតអបអរសាទរ ទូលថ្វាយសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាពសេចក្ដីថ្លៃថ្នូរ និងសុភមង្គល និងជាព្រះប្រធានកិត្តិយសនៃសមាគមកាយឫទ្ធិនារីកម្ពុជា នាឱកាសដែលសហគមន៍ The OlaveBaden-PowellSociety (OB-PS) ថ្វាយនូវពានសមាជិកភាពកិត្តិយសជើងឯក "Champions
Award” នៅក្នុងឱកាសនៃមហាសន្និបាតកាយឫទ្ធិនារីពិភពលោកលើកទី៣៩ និងកិច្ចប្រជុំប្រចាំឆ្នាំលើកទី៤២ ដែលកម្ពុជាធ្វេីជាម្ចាស់ផ្ទះ។

ក្នុងសារលិខិតរបស់សម្តេចមហារដ្ឋសភាធិការធិបតី ឃួន សុដារី មានខ្លឹមសារដូចនេះថា តាងនាមរដ្ឋសភានៃព្រះរាជាណាចក្រកម្ពុជា និងក្នុងនាមខ្ញុំម្ចាស់ផ្ទាល់ ខ្ញុំម្ចាស់ពិតជាមានសេចក្តីរំភើបរីករាយក្នុងចិត្តឥតឧបមា និងសូមព្រះបរមរាជានុញ្ញាតសម្តែងនូវមនោសញ្ចេតនា អបអរសាទរដ៏កក់ក្តៅបំផុត ក្នុងឱកាសដែលសម្តេចព្រះមហាក្សត្រី ព្រះវររាជមាតាជាតិខ្មែរ ក្នុងសេរីភាពសេចក្តីថ្លៃថ្នូរ និងសុភមង្គលនិងជាព្រះប្រធានកិត្តិយសនៃសមាគមកាយឫទ្ធិនារីកម្ពុជាជាទីគោរពសក្ការៈដ៏ខ្ពង់ខ្ពស់បំផុតត្រូវបានសហគមន៍ TheOlaveBaden-PowellSociety (OB-PS) ថ្វាយនូវពានសមាជិកភាពកិត្តិយសជើងឯក "Champions Award” នៅក្នុងឱកាសនៃមហាសន្និបាតកាយឫទ្ធិនារីពិភពលោកលើកទី៣៩ និងកិច្ចប្រជុំប្រចាំឆ្នាំលើកទី៤២ របស់សហគមន៍TheOlaveBaden PowellSociety ដែលព្រះរាជាណាចក្រកម្ពុជាធ្វើជាម្ចាស់ផ្ទះ និងបានប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៩ ខែមិថុនា ឆ្នាំ២០២៦នេះ នៅខេត្តសៀមរាប។

ការទទួលបានពានសមាជិកភាពកិត្តិយសជើងឯក "ChampionsAward” ដ៏ថ្លៃថ្លានេះ គឺជាព្រះមហាកិត្តិយសដ៏ធំធេង និងជាសក្ខីភាពឆ្លុះបញ្ចាំងពីការទទួលស្គាល់នូវព្រះកិត្តិគុណដែលកើតចេញពីស្នាព្រះហស្ថដ៏ឆ្នើម ក្នុងព្រះរាជសកម្មភាពដ៏ឧត្តុង្គឧត្តម និងព្រះរាជហឫទ័យ ទុកដាក់ខ្ពស់របស់សម្តេចព្រះមហាក្សត្រីព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត។ ជានិច្ចកាលព្រះអង្គតែងតែលះបង់ព្រះកាយពលព្រះបញ្ញាស្មារតី និងព្រះរាជបទពិសោធព្រមទាំងបានប្រទាននូវព្រះរាជទ្រព្យចូលរួមជ្រោមជ្រែង និងគាំទ្រយ៉ាងស្មោះស្ម័គ្រដល់ចលនាកាយឫទ្ធិនារីទាំងក្នុងប្រទេស និងលើឆាកអន្តរជាតិ។

ព្រះរាជកិច្ចដ៏ថ្លៃថ្លានេះបានរួមចំណែកយ៉ាងសកម្មក្នុងការអភិវឌ្ឍ និងលើកកម្ពស់សមភាពយេនឌ័រព្រមទាំងជួយជំរុញសក្តានុពលរបស់កុមារី យុវតី និងស្រ្តីវ័យក្មេងឱ្យទទួលបានចំណេះដឹងវិន័យ និងភាពជាអ្នកដឹកនាំក្នុងសង្គមតាមរយៈការលើកស្ទួយវិស័យអប់រំជំនាញវិជ្ជាជីវៈ
វិទ្យាសាស្ត្របច្ចេកវិទ្យា វិស្វកម្មនិងសិល្បៈ។

ឆ្លៀតក្នុងឱកាសដ៏មហានក្ខត្តឫក្ស វិសេសវិសាលនេះ ខ្ញុំម្ចាស់ ទូលព្រះបង្គំយើងខ្ញុំទាំងអស់គ្នា សូមព្រះបរមរាជានុញាត លើកហត្ថប្រណម្យបួងសួងដល់គុណបុណ្យព្រះរតនត្រ័យគុណកែវទាំងបីវត្ថុស័ក្តិសិទ្ធិក្នុងលោក ទេវតាថែរក្សាព្រះរាជាណាចក្រកម្ពុជា បុណ្យបារមីនៃដួងព្រះវិញ្ញាណក្ខន្ធ អតីតព្រះមហាក្សត្រ ព្រះមហាក្សត្រិយានី ខ្មែរគ្រប់ព្រះអង្គ ជាពិសេសដួងព្រះវិញ្ញាណក្ខន្ធព្រះបរមរតនកោដ្ឋ សូមព្រះអង្គតាមជួយបីបាច់ថែរក្សា និងអភិបាលប្រោះព្រំ ប្រទានសព្ទសាធុការពរបវរសួស្តីជ័យមង្គលវិបុលសុខមហាប្រសើរគ្រប់ប្រការថ្វាយចំពោះសម្តេចព្រះមហាក្សត្រី ព្រះវររាជមាតាជាតិខ្មែរជាទីគោរពសក្ការៈដ៏ខ្ពង់ខ្ពស់បំផុតព្រមទាំងព្រះរាជវង្សានុវង្ស សូមទ្រង់ព្រះប្រកបដោយព្រះពុទ្ធពរទាំងបួនប្រការគឺអាយុ វណ្ណៈសុខៈ ពលៈ កុំបីឃ្លៀងឃ្លាតឡើយ៕