(ភ្នំពេញ)៖ នាល្ងាចថ្ងៃទី២០ ខែមិថុនា ឆ្នាំ២០២៦ នៅឯអាកាសយានដ្ឋានអន្តរជាតិតេជោ លោកបណ្ឌិត​ អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស បានអញ្ជេីញទទួលដំណេីរ​ និងអបអរសាទរ​សាសនិកឥស្លាមកម្ពុជា ចំនួន១៣៤នាក់​ ដែលបានបំពេញកាតព្វកិច្ចធម្មយាត្រាហាជ្ជី នៅទីក្រុងម៉ាក្កះ ប្រទេសអារ៉ាប៊ីសាអូឌីតប្រកបដោយជោគជ័យ​ ហេីយបានធ្វើដំណើរវិលត្រឡប់មកដល់កម្ពុជាវិញប្រកបដោយសុវត្ថិភាព។

សម្រាប់ឆ្នាំ២០២៦នេះ សាសនិឥស្លាមកម្ពុជាចំនួន ១២១០ នាក់ បានទៅបំពេញកាតព្វកិច្ចបុណ្យធម្មយាត្រាហាជ្ជី ហើយបានចាប់ផ្តើមវិលត្រឡប់មកមាតុប្រទេសវិញជាបន្តបន្ទាប់ ចាប់ពីថ្ងៃទី៣ រហូតដល់ថ្ងៃទី២៨ ខែមិថុនា ឆ្នាំ២០២៦ ប៉ុន្តែគួរឱ្យសោកស្ដាយនៅឆ្នាំនេះក្នុងចំណោម១២១០នាក់ ទៅប្រតិបត្តិហាជ្ជី មានបងប្អូនចំនួន២នាក់ បានទទួលមរណភាព នៅទីក្រុងម៉ាក្កះ ប្រទេសអារ៉ាប៊ីសាអូឌីត ក្នុងនោះស្រីម្នាក់ ប្រុសម្នាក់។

ក្នុងឱកាសនោះ ទេសរដ្ឋមន្ត្រី អូស្មាន ហាស្សាន់ បានថ្លែងថា ដោយសារតែកម្ពុជាមានសុខសន្តិភាព ទើបប្រជាពលរដ្ឋមានសេដ្ឋកិច្ចល្អប្រសើរជាងមុន ដែលអាចមានលទ្ធភាពទៅបំពេញកាតព្វកិច្ចបុណ្យហាជ្ជីដែលជាកាតព្វកិច្ចទី៥ក្នុងសាសនាឥស្លាម ដោយក្នុងម្នាក់ៗចំណាយថវិកាចំនួន៦,២០០ដុល្លារសហរដ្ឋអាមេរិក ហើយមានចំនួនអ្នកចុះឈ្មោះសម្រាប់ឆ្នាំក្រោយៗទៀត មានការកើនឡើងជាលំដាប់។

លោកទេសរដ្ឋមន្ត្រីបានបន្តថា ដោយមើលឃើញពីកំណើនអ្នកចង់ទៅធ្វើបុណ្យធម្មយាត្រាហាជ្ជមានការកើនឡើងពីមួយឆ្នាំទៅមួយឆ្នាំ ជាក់ស្តែងនៅឆ្នាំ២០២៦នេះ មានចំនួនរហូតដល់១៧០០នាក់ ហើយលោកបញ្ជាក់ថា គាត់គ្រោងនឹងធ្វើដំណើរទស្សនកិច្ចទៅប្រទេសអារ៉ាប៊ីសាអូឌីត ដើម្បីជួបរដ្ឋមន្ត្រីក្រសួងហាជ្ជី និងអ៊ុំរ៉ោះអារ៉ាប៊ីសាអូឌីត ដើម្បីស្នើសុំចំនួនកូតាបន្ថែមជូនសាសនិកឥស្លាមកម្ពុជា បានទៅធ្វើបុណ្យហាជ្ជនៅឆ្នាំក្រោយៗ ឲ្យបានច្រើនបន្ថែមទៀតចន្លោះពី ១៥០០ ទៅ២០០០នាក់។

លោកទេសរដ្ឋមន្ត្រីឲ្យដឹងដែរថា នៅឆ្នាំ២០២៦នេះ ក្នុងចំណោម១២១០នាក់ខាងលើ មានសាសនិកឥស្លាមចំនួន១០នាក់ បានទទួលព្រះរាជឧបត្ថម្ភពី ព្រះចៅ សាល់ម៉ាន ព្រះមហាក្សត្រ អារ៉ាប៊ីសាអូឌីត ហើយពួកគាត់បានវិលត្រឡប់មកដល់កម្ពុជាវិញហើយកាលពីថ្ងៃទី៣ ខែមិថុនា ឆ្នាំ២០២៦ នេះ។ សូមជម្រាបជូនថា គិតត្រឹមថ្ងៃទី២០ ខែមិថុនានេះ សាសនិកឥស្លាមកម្ពុជា ៣១៤នាក់ហើយ ដែលបានធ្វើដំណើរវិលត្រឡប់មកដល់មាតុប្រទេសវិញប្រកបដោយសុវត្ថិភាព៕