(ព្រះវិហារ)៖ ក្នុងស្មារតីជាតិខ្មែរតែមួយ និងគាំទ្រយ៉ាងមុតមាំចំពោះវីរកងទ័ពជួរមុខ លោកស្រី ហែម សុគុណពិសី ប្រធានមន្ទីរព័ត៌មានខេត្តព្រះវិហារ នៅថ្ងៃទី២១ ខែមិថុនា ឆ្នាំ២០២៦ បានដឹកនាំក្រុមការងារ ចុះសួរសុខទុក្ខ សំណេះសំណាល និងនាំយកស្បៀងអាហារ សម្ភារមួយចំនួន ដែលជាអំណោយរបស់លោកស្រី សន ម៉ារ៉ាដា រដ្ឋលេខាធិការក្រសួងព័ត៌មាន និងមានការចូលរួមឧបត្ថម្ភថវិកាផ្ទាល់ខ្លួនពីលោកស្រីផង យកទៅប្រគល់ជូនវីរកងទ័ពជួរមុខចំនួន ២គោលដៅ ដែលកំពុងឈរជើងការពារអធិបតេយ្យភាព និងបូរណភាពទឹកដី តាមខ្សែបន្ទាត់ព្រំដែនកម្ពុជា-ថៃ ស្ថិតក្នុងភូមិសាស្ត្រស្រុកជាំក្សាន្ត ខេត្តព្រះវិហារ។

នៅក្នុងឱកាសនោះដែរ លោកស្រី ហែម សុគុណពិសី បានពាំនាំនូវការផ្តាំផ្ញើសាកសួរសុខទុក្ខ ប្រកបដោយក្តីនឹករលឹក និងការយកចិត្តទុកដាក់ខ្ពស់ពីលោក នេត្រ ភក្ត្រា រដ្ឋមន្ត្រីក្រសួងព័ត៌មាន, លោកស្រី ទុយ សិរីរតន នេត្រភក្ត្រា និងលោកស្រី សន ម៉ារ៉ាដា ព្រមទាំងថ្នាក់ដឹកនាំក្រសួងព័ត៌មានទាំងអស់ ផ្ញើជូនដល់វីរកងទ័ពដែលកំពុងបំពេញភារកិច្ចដ៏ឧត្តុង្គឧត្តមក្នុងការការពារបូរណភាពទឹកដី និងសន្តិភាពជូនជាតិមាតុភូមិ។

លោកស្រីប្រធានមន្ទីរព័ត៌មានខេត្តព្រះវិហារ ក៏បានសម្តែងនូវការកោតសរសើរ និងវាយតម្លៃខ្ពស់ចំពោះវីរភាព ស្មារតីលះបង់ និងការតស៊ូអត់ធ្មត់របស់បងប្អូនវីរកងទ័ព ដែលបានពុះពារគ្រប់ឧបសគ្គ ឈរជើងយ៉ាងរឹងមាំនៅសមរភូមិមុខ ដើម្បីការពារសុខសន្តិភាព និងភាពសុខសាន្តជូនប្រជាពលរដ្ឋនៅទូទាំងប្រទេស។

នាឱកាសនោផះដែរ លោកស្រី ហែម សុគុណពិសី ក៏បានប្រសិទ្ធពរជ័យ សូមឱ្យវីរកងទ័ព វីវនគរបាលទាំងអស់ឱ្យមានសុខភាពល្អ កម្លាំងមាំមួន និងទទួលបានជោគជ័យគ្រប់ភារកិច្ចក្នុងការបម្រើជាតិមាតុភូមិ។

អំណោយដែលបាននាំយកទៅប្រគល់ជូននាពេលនោះរួមមាន៖ ទឹកបរិសុទ្ធចំនួន​ ៦០កេស ព្រមទាំងគ្រឿងឧបភោគបរិភោគផ្សេងៗ ដូចជា បន្លែស្រស់ចំនួន៥មុខ ត្រីស្រស់ ត្រីងៀត និងសាច់ជ្រូកមួយចំនួន។ជាមួយគ្នានេះ លោកស្រីប្រធានមន្ទីរ និងក្រុមការងារ ក៏បានចូលរួមឧបត្ថម្ភថវិកាផ្ទាល់ខ្លួនបន្ថែម ដើម្បីរៀបចំអាហារសាមគ្គីរួមជាមួយបងប្អូនវីរកងទ័ព ក្នុងបរិយាកាសស្និទ្ធស្នាល កក់ក្តៅ និងពោរពេញដោយមនោសញ្ចេតនាជាមហាគ្រួសារខ្មែរតែមួយ។

វីរកងទ័ពជួរមុខមួយរូប ក្នុងចំណោមវីរកងទ័ពជាច្រើនដែលបានចូលរួមទទួលស្វាគមន៍ សកម្មភាពចុះសួរសុខទុក្ខ និងការចូលរួមទទួលទានអាហារសាមគ្គីនាឱកាសនេះពីលោកស្រី ហែម សុគុណពិសី បានថ្លែងដោយក្តីរំភើបរីករាយ ដោយចាត់ទុកសកម្មភាពនេះ បង្ហាញយ៉ាងច្បាស់ពីចំណងសាមគ្គីភាពដ៏រឹងមាំ និងមនោសញ្ចេតនាដ៏ជ្រាលជ្រៅរវាង «សមរភូមិក្រោយ និងសមរភូមិមុខ» ដែលតែងតែនៅរួមសុខរួមទុក្ខ ផ្តល់កម្លាំងចិត្តឱ្យគ្នាទៅវិញទៅមក ក្នុងបុព្វហេតុការពារ និងកសាងជាតិមាតុភូមិកម្ពុជាឱ្យកាន់តែរឹងមាំ និងសម្បូរសប្បាយជានិច្ច៕