(កំពង់ស្ពឺ)៖ តំបន់ទេសចរណ៍ធម្មជាតិសម្រស់ប្រៀបនឹងឋានសួគ៌ «ភ្នំខ្នងផ្សារ» កំពុងក្លាយទៅជាតំបន់ទេសចរណ៍ដ៏ទាក់ទាញក្នុងរដូវ «ទេសចរណ៍បៃតង» អន្ទងដួងចិត្តអ្នកទេសចរក្មេងចាស់ជាច្រើនឱ្យទៅលេងកម្សាន្ត។

របាយការណ៍ពីក្រសួងបរិស្ថាន បានឱ្យដឹងថា នៅក្នុងសប្តាហ៍កន្លងទៅនេះ ពោលចន្លោះពីថ្ងៃទី១៥ ដល់ថ្ងៃទី២១ ខែមិថុនា ឆ្នាំ២០២៦ មានភ្ញៀវទេសចរ ១,០១៤នាក់ បានទៅលេងកម្សាន្តនៅតំបន់ទេសចរណ៍ភ្នំខ្នងផ្សារ។

ភ្នំខ្នងផ្សារតំបន់ទេសចរណ៍ធម្មជាតិដ៏ល្បាញល្បីនាទឹកដីស្រុកឱរ៉ាល់​ ខេត្ត​កំពង់​ស្ពឺ ហើយសាងភាពល្បីរន្ទឺគ្រប់ទីកន្លែងព្រោះតែសម្រស់ដង​គិរីបព្វតាដ៏ស្រស់បំ​ព្រង​។ ភ្នំខ្នង​ផ្សារ ជាតំបន់ព្រៃភ្នំដ៏ធំមួយ មានទីតាំងប្រសព្វមុម៣ នៃខេត្តកំពង់​ស្ពឺ កោះកុង និងពោធិ៍​សាត់ សម្បូរទៅដោយព្រៃឈើក្រាស់ ជ្រលងភ្នំទាបខ្ពស់ៗ វាលស្រល់ដ៏ស្រស់​ស្អាត និងសម្បូរ​ទៅដោយសត្វព្រៃកម្រជាច្រើនប្រភេទ។

តំបន់ទេសចរណ៍ធម្មជាតិ មានចម្ងាយពីរាជធានីភ្នំពេញប្រមាណតែ​១៦៥គីឡូ​ម៉ែត្រ ហើយកម្ពស់ភ្នំក៏មិនសូវខ្ពស់ ដែលជាលក្ខខណ្ឌមួយឱ្យអ្នកទេសចរពីរាជ​ធានី​ភ្នំពេញ មិនចំណាយពេលយូរនោះឡើយក្នុងការទៅលេងកម្សាន្ត។ កម្ពស់​ភ្នំ ដែលមិនសូវខ្ពស់ ក៏អនុញ្ញាតឱ្យអ្នកទេសចរមិនក្មេង ឬចាស់នោះទេ គឺពួក​គាត់អាចធ្វើដំណើររួមគ្នាដោយថ្មើរជើងឡើងទៅលេងលើកំពូលភ្នំ ដែលជាបទ​ពិសោធន៍ថ្មីនៃដំណើរកម្សាន្តផ្សារភ្ជាប់ជាមួយធម្មជាតិ។

បន្ថែមពីលើលក្ខណៈអំណោយផលទាំងនេះ ក្រោមការយកចិត្តទុកដាក់ដោយ​ផ្ទាល់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងផ្តើម​ចេញពីដំណើរចុះទៅដល់ផ្ទាល់របស់សម្តេចកាលពីកាលពីថ្ងៃទី៨ ខែមីនា ឆ្នាំ២០២៥​កន្លងទៅនោះ មានហេដ្ឋារចនាសម្ព័ន្ធជាច្រើនត្រូវបានសាង​សង់​ឡើង ជួយសម្រួលបន្ថែមដល់អ្នកទេសចរទៅលេងកម្សាន្តនៅទីនោះ។

អនុវត្តផ្ទាល់ដោយលោក អ៊ាង សុផល្លែត រដ្ឋមន្ត្រីក្រសួងបរិស្ថាន នៅតំបន់ទេសចរណ៍ធម្មជាតិភ្នំខ្នងផ្សារនេះ មានហេដ្ឋារចនាសម្ព័ន្ធ ជាច្រើន ត្រូវបានសាងសង់រួចរាល់មានដូចជា ផ្លូវលំក្រាលគ្រួស​តភ្ជាប់​​ពីភូមិតាំងបំពង់ ទៅកាន់ជើងភ្នំ ដែលពីមុនផ្លូវនេះលំបាកធ្វើដំណើរខ្លាំង ហើយត្រូវ​ចំណាយ​ពេលយូរក្នុងការធ្វើដំណើរ។ ប៉ុន្តែបច្ចុប្បន្នអាចបើករថយន្តបាន ហើយធ្វើដំណើរ​បានលឿន។

នៅជើងភ្នំបានរៀបចំទីសំចត រួមមានមណ្ឌលព័ត៌​មាន​ជាមួយទីសង្គ្រោះបន្ទាន់ ផ្សារ​សហ​គមន៍ ហាង​កាហ្វេសសហគមន៍ ចំណតរថយន្ត​ក្រុង រថយន្តទេស​ចរណ៍ ទោចក្រយាន​យន្ត ប្រព័ន្ធ​ទឹក​អណ្ដូង​អនាម័យ​ដើរដោយថាមពល​ពន្លឺ​ព្រះអាទិត្យ ប្រព័ន្ធអគ្គិសនីដើរ​ដោយ​ថាម​ពល​ពន្លឺព្រះអាទិត្យ សួនច្បារ បន្ទប់​ងូត​ទឹក​ប្រុស-ស្រី បន្ទប់អនាម័យ ប្រុស-​ស្រី-ជនពិការ ផ្ទះ​ស្នាក់នៅរបស់ប្រជា​សហ​គមន៍​​ដែល​ជា​អ្នកគ្រប់គ្រងគោលដៅ​លម្ហែ​បៃ​តង។

ក្រៅពីនេះ ក្រសួងក៏បានរៀបចំផ្លូវថ្មើរជើង​ឡើងភ្នំថ្មី ពីជើងភ្នំ ទៅដល់ទីតាំងដាន​ព្រះអង្គចម្ងាយប្រមាណជា៤គីឡូម៉ែត្រ ដោយ​មាន​កន្លែងដាក់សំរាម និងកន្លែង​អង្គុយ​សម្រាកតាម​ដង​​ផ្លូ​វក្រោមម្លប់ឈើ​ដ៏ត្រឈឹង​ត្រឈៃ​ផង​ដែរ។

ក្រៅពីសមិទ្ធផលដែលបានរៀបរាប់នេះទៅ ក្រសួងបរិស្ថាន ក៏បានអភិវឌ្ឍ​នៅ​ទីតាំងដានព្រះអង្គ (ចង្កេះ​ភ្នំ​ខ្នង​ផ្សារ​) ដោយបន្ត​កសាងហេដ្ឋា​រចនា​សម្ព័ន្ធចាំ​បាច់ រួមមាន​មណ្ឌល​ព័ត៌មានជាមួយ​នឹង​ទី​សង្គ្រោះបន្ទាន់ ហាង​លក់វត្ថុ​អនុ​ស្សាវរីយ៍ ភោជនីយដ្ឋាន ចំណត​រថ​យន្តទេស​ចរណ៍​-ទោ​ចក្រ​​យានយន្ត អាងស្តុកទឹក អណ្តូង​ទឹកសម្រាប់អ្នក​ថ្មើរជើង​ប្រើ​ប្រាស់ បន្ទប់ងូតទឹក​ប្រុស​-ស្រី បន្ទប់​អនា​ម័យប្រុស​-ស្រី-​ជនពិការ និងជាពិសេស​កន្លែង​អង្គុយលម្ហែ បណ្តែត​អារម្មណ៍​គយ​គន់​ទេសភាព និង​ស្រូប​ខ្យល់អាកាស​ដ៏ល្អបរិសុទ្ធពី​ធម្ម​ជាតិបៃតង។

ជាអ្នកប្រតិបត្តិតាមការចង្អុលបង្ហាញរបស់សម្តេចនាយករដ្ឋមន្ត្រី, លោក អ៊ាង សុផល្លែត បានបង្ហាញនូវក្តីរីករាយ ក្រោយឃើញតំបន់ទេសចរណ៍ធម្មជាតិ «ភ្នំខ្នងផ្សារ» ក្លាយជាកន្លែងលំហែដ៏ទាក់ទាញសម្រាប់ប្រជាពលរដ្ឋខ្មែរ៕