(ក្រចេះ)៖ ព្រះសិរីសម្ភារ៍​ បណ្ឌិត​ អេង​ ផល្លា​ (ឧត្តមបញ្ញា) ព្រះរាជាគណៈ​កិត្តិ​យសនៃព្រះរាជាណាចក្រកម្ពុជា​ ព្រះគ្រូវិសោធបញ្ញា ព្រះអនុគណស្រុកសំបូរ​ ខេត្តក្រចេះ និងជាព្រះចៅអធិការវត្តព្រះវិហារធំសសរ១០០ បាននាំយកបច្ច័យ​ជាង ៣លានរៀល និងទេយ្យជាគ្រឿងឧបភោគបរិភោគមួយចំនួនទៀត ប្រគេន​ដល់​ព្រះចៅអធិការវត្តវត្តព្រែកគ្រៀង ដែលជួបគ្រោះអគ្គិភ័យ។

កាលពីពេលថ្មីៗនេះ ការឆ្លងចរន្តអគ្គិសនីបានបង្កើតជាអគ្គិភ័យ​បណ្តាលឱ្យ​ឆាប​ឆេះវត្តព្រែកគ្រៀង ស្ថិតនៅឃុំវឌ្ឍនៈ ស្រុកសំបូរ ខេត្តក្រចេះ បណ្តាលឱ្យ​ឆេះអស់​កុដិ២ខ្នង។

ក្រោមទឹកព្រះទ័យសង្គធម៌រំលែកនូវការលំបាករបស់ព្រះសង្ឃក្នុងវត្ត នៅថ្ងៃទី២២ ខែមិថុនា ឆ្នាំ២០២៦នេះ ព្រះសិរីសម្ភារ៍​ បណ្ឌិត​ អេង​ ផល្លា និមន្តដឹកនាំសហការីមន្ត្រីសង្ឃនៃសាលាអនុគណស្រុកសំបូរ នាំយក​បច្ច័យចំនួន ៣.០៦០.០០០រៀល ព្រមទាំងចីវរ អង្ករ មី ភេសជ្ជៈ ទឹកបរិសុទ្ធ និងទេយ្យទានប្រើប្រាស់មួយចំនួនធំប្រគេនដល់ព្រះចៅអធិការវត្តព្រែកគ្រៀង រួមចំណែកដោះស្រាយការលំបាកបណ្តាលមកពីគ្រោះអគ្គិភ័យនេះ៕