(វ៉ាស៉ីនតោន)៖ កាលពីថ្ងៃអាទិត្យ ទី២១ ខែមិថុនា ឆ្នាំ២០២៦ យោធារបស់សហរដ្ឋអាមេរិក បានឱ្យដឹងថា ខ្លួនបានបើកការវាយប្រហារលើ​ទូកសង្ស័យដឹកគ្រឿងញៀន១គ្រឿង នៅតំបន់សមុទ្រ Caribbean បណ្តាលបុរស២នាក់បាត់បង់ជីវិត​ ប៉ុន្តែបន្សល់ទុក៦នាក់នៅមានជីវិត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

យោធាអាមេរិកបានឱ្យដឹងថា ខ្លួនបានជូនដំណឹងទៅកាន់ឆ្មាំសមុទ្រអាមេរិក អំពីបុរសនៅរស់ទាំង៦នាក់ ប៉ុន្តែមិនបានបញ្ជាក់លម្អិតនោះទេ ​អំពីការជួយសង្រ្គោះឬមួយក៏ស្ថានភាពរបស់ពួកគេ។ យោងតាម AFP ការវាយប្រហារថ្មីចុងក្រោយបង្អស់ខាងលើ នាំឱ្យតួលេខមនុស្សសរុប​ដែលត្រូវបានសម្លាប់ កើនដល់យ៉ាងហោច២០៦នាក់ គិតចាប់តាំងពីរដ្ឋបាលប្រធានាធិបតីអាមេរិក លោក ដូណាល់ ត្រាំ បានចាប់ផ្តើមយុទ្ធនាការយោធានេះ កាលពីខែកញ្ញា ឆ្នាំ២០២៥។

យោធាអាមេរិក បានបើកប្រតិបត្តិការហៅថា Southern Spear កាលពីខែកញ្ញា ឆ្នាំមុន ដោយលោក ត្រាំ បានអះអាងថា ទីក្រុងវ៉ាស៉ីនតោន គឺស្ថិតក្នុងសង្រ្គាមជាមួយ ក្រុមឧក្រិដ្ឋជនគ្រឿងញៀន ដែលធ្វើប្រតិបត្តិការចេញពីតំបន់អាមេរិកឡាទីន។ រដ្ឋបាលរបស់លោក មកទល់នឹងពេលនេះ មិនបានផ្តល់ភស្តុតាងជាក់ស្តែងណាមួយឡើយ ដែលអាចបង្ហាញថា ទូកទាំងឡាយដែលយោធាអាមេរិកវាយប្រហារជាបន្តបន្ទាប់ ពិតជាជាប់ពាក់ព័ន្ធក្នុងសកម្មភាពរត់ពន្ធគ្រឿងញៀន។

គួរបញ្ជាក់ថា ក្រុមអ្នកជំនាញច្បាប់អន្តរជាតិ និងក្រុមសិទ្ធិមនុស្ស យល់ថា ការវាយប្រហារទាំងនេះរបស់យោធាអាមេរិក អាចស្មើទៅនឹង​ការសម្លាប់មនុស្សក្រៅប្រព័ន្ធយុត្តិធម៌ ដ្បិតពួកគេហាក់ដូចជាបានកំណត់គោលដៅលើជនស៉ីវិល ដែលមិនបង្កការគំរាមកំហែងផ្ទាល់ភ្លាមៗ ​ចំពោះសហរដ្ឋអាមេរិកនោះទេ៕