(បន្ទាយមានជ័យ)៖ លោក គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកព្រះនេត្រព្រះ កាលពីព្រឹកថ្ងៃទី១៩ ខែមិថុនា ឆ្នាំ២០២៦ បានដឹកនាំកិច្ចប្រជុំបូកសរុបលទ្ធផលវេទិកាសាធារណៈនៅកម្រិតស្រុក ក្រោយពីក្រុមការងារចុះមូលដ្ឋានឃុំទាំង៩ ក្នុងស្រុកព្រះនេត្រព្រះ បានអនុវត្តចប់សព្វគ្រប់។

លោកប្រធានក្រុមការងារ បានលើកឡើងថា ការធ្វើវេទិកាសាធារណ:នេះ គឺដើម្បីផ្សព្វផ្សាយអំពីសមិទ្ធផលការងារដែលរាជរដ្ឋាភិបាលសម្រេចបាន ជូនដល់ប្រជាពលរដ្ឋមូលដ្ឋាន ហើយទន្ទឹមគ្នានេះ ក៏ទទួលស្តាប់មតិយោបល់ និងសំណូមពរមូលដ្ឋាន ដើម្បីដោះស្រាយឱ្យអស់ពីលទ្ធភាពផងដែរ ស្របតាមសេចក្តីណែនាំរបស់រាជរដ្ឋាភិបាល។

ជាលទ្ធផល ក្រុមការងារបានដោះស្រាយដោយជោគជ័យនូវសំណើចំនួន ១០២ករណីរបស់ប្រជាពលរដ្ឋ និងកំពុងដោះស្រាយបន្តចំនួន ២ករណី ហើយមានតែ២ករណីប៉ុណ្ណោះ ដែលត្រូវស្នើសុំការគាំទ្រពីថ្នាក់ជាតិដើម្បីពិនិត្យលទ្ធភាពជួយដោះស្រាយ។

សំណើទាំង ១០៦ករណី ភាគច្រើនពាក់ព័ន្ធនឹងការអភិវឌ្ឍហេដ្ឋារចនាសម្ព័ន្ធ ដូចជា ការជួសជុលផ្លូវ ការដាក់លូរំដោះទឹក ការស្តារ ឬជីកប្រឡាយទឹកជាដើម ដែលត្រូវដោះស្រាយតាមរយ:ការលើកផែនការអភិវឌ្ឍឃុំនាពេលខាងមុខ និងមួយចំនួនទៀត តាមរយ:ការជួយឧបត្ថម្ភរបស់ក្រុមការងារ ដើម្បីជួយសម្រាលការលំបាករបស់បងប្អូនមូលដ្ឋាន។

លោក គង់ ច័ន្ទវាសនា បានថ្លែងអំណរគុណដល់ថ្នាក់ដឹកនាំ និងសមាជិកក្រុមការងារ ព្រមទាំងអាជ្ញាធរ និងកងកម្លាំងគ្រប់លំដាប់ថ្នាក់នៃស្រុកព្រះនេត្រព្រះ ដែលបានខិតខំប្រឹងប្រែងអនុវត្តតួនាទីភារកិច្ច និងផ្តល់សេវាសាធារណៈល្អប្រសើរជូនបងប្អូនប្រជាពលរដ្ឋ។

លោក មានប្រសាសន៍បន្ថែមថា លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ តែងយកចិត្តទុកដាក់ជំរុញឱ្យក្រុមការងារចុះមូលដ្ឋានក្រុង-ស្រុក ឃុំ-សង្កាត់នៅទូទាំងខេត្ត រៀបចំវេទិកាសាធារណ:ឱ្យបានទៀងទាត់ និងផ្តោតលើការផ្តល់សេវាសាធារណៈឱ្យកាន់តែល្អប្រសើរ ដើម្បីជួយឱ្យខេត្តបន្ទាយមានជ័យក្លាយជាខេត្តដែលផ្តល់សេវាសាធារណៈជូនប្រជាពលរដ្ឋល្អជាងគេ៕