(ភ្នំពេញ)៖ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) នាព្រឹកថ្ងៃទី២២ ខែមិថុនា ឆ្នាំ២០២៦នេះ បានទទួលជួបសម្តែងការគួរសម និងពិភាក្សាការងារជាមួយ គណៈប្រតិភូសាជីវកម្មហិរញ្ញវត្ថុសម្រាប់ការអភិវឌ្ឍអន្តរជាតិ (DFC) របស់សហរដ្ឋអាម៉េរិក ដឹកនាំដោយលោកស្រី Caroline Vik ប្រធានផ្នែកគោលនយោបាយនៃ DFC ក្នុងឱកាសដែលគណៈប្រតិភូកំពុងបំពេញបេសកកម្មផ្លូវការនៅកម្ពុជា។

ជំនួបពិភាក្សាការងារនេះក៏មានការចូលរួមពីសំណាក់លោក កែវ រតនៈ រដ្ឋមន្ត្រីក្រសួងរ៉ែ និងថាមពល អនុប្រធានទី៣ ក.អ.ក. និងលោក Benjamin Chiang ភារធារីនៃស្ថានទូតសហរដ្ឋអាម៉េរិក ប្រចាំព្រះរាជាណាចក្រកម្ពុជា ផងដែរ។

ក្នុងបរិយាកាសប្រកបដោយភាពស្និទ្ធស្នាល និងការយោគយល់គ្នាទៅវិញទៅមក លោកឧបនាយករដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅបំផុតចំពោះលោកស្រី Caroline Vik និងសហការីទាំងអស់នៃគណៈប្រតិភូ ដែលមកបំពេញបេសកកម្មផ្លូវការនៅកម្ពុជា និងបានថ្លែងអំណរគុណយ៉ាងជ្រាលជ្រៅជូនចំពោះស្ថាប័ន DFC ដែលបានសម្រេចចិត្តជាយុទ្ធសាស្ត្រ ក្នុងការអនុម័តកញ្ចប់ហិរញ្ញប្បទានគាំទ្រដល់ការអភិវឌ្ឍហេដ្ឋារចនាសម្ព័ន្ធនៅក្នុងអាកាសយានដ្ឋានអន្តរជាតិតេជោ នាពេលកន្លងមក។

នៅក្នុងកិច្ចពិភាក្សានាព្រឹកនេះ ថ្នាក់ដឹកនាំកម្ពុជានិងគណៈប្រតិភូ DFC បានផ្លាស់ប្តូរយោបល់យ៉ាងផុសផុសលើរបៀបវារៈយុទ្ធសាស្ត្រសំខាន់ៗ ដែលរំពឹងថា នឹងក្លាយជាកិច្ចសហប្រតិបត្តិការដ៏រឹងមាំនាពេលអនាគត រួមមាន៖ (១) ការពិនិត្យលទ្ធភាពសហការលើការសិក្សាស្រាវជ្រាវហេដ្ឋារចនាសម្ព័ន្ធថាមពល និងអន្តរកាលបៃតង, និង (២) ការអភិវឌ្ឍហេដ្ឋារចនាសម្ព័ន្ធគន្លឹះដូចជា បណ្តាញផ្លូវល្បឿនលឿន, ការពង្រីងវិសាលភាពកំពង់ផែ, និងផែនការមេគ្រប់ជ្រុងជ្រោយស្តីពី ប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ ដែលទាំងអស់នេះគឺជាសរសៃឈាមនៃសេដ្ឋកិច្ចជាតិដ៏សំខាន់។

ជាការឆ្លើយតបលោកស្រីប្រធាន បានសម្តែងនូវការកោតសរសើរយ៉ាងខ្លាំងចំពោះចក្ខុវិស័យដ៏ច្បាស់លាស់ និងភាពម៉ឺងម៉ាត់របស់រាជរដ្ឋាភិបាលកម្ពុជា ក្នុងការកែទម្រង់ និងការអភិវឌ្ឍហេដ្ឋារចនាសម្ព័ន្ធគន្លឹះដើម្បីលើកកម្ពស់សេដ្ឋកិច្ចជាតិ។ លោកស្រីបានបញ្ជាក់ថា វិស័យដែលកម្ពុជាបានលើកឡើងទាំងអស់ខាងលើ គឺពិតជាមានភាពស្របគ្នា ទៅនឹងបេសកកម្មស្នូលរបស់ DFC ក្នុងការគាំទ្រដល់ហេដ្ឋារចនាសម្ព័ន្ធយុទ្ធសាស្ត្រ និងការការពារខ្សែច្រវាក់ផ្គត់ផ្គង់សកល។ លោកស្រីក៏បានបង្ហាញឆន្ទៈក្នុងការនាំយកនូវរបៀបវារៈដែលបានពិភាក្សា ទៅពិនិត្យលទ្ធភាពក្នុងការសិក្សាសមិទ្ធិលទ្ធភាព មុននឹងឈានដល់ដំណាក់កាលនៃកិច្ចសហប្រតិបត្តិការណាមួយនាពេលអនាគតផងដែរ។

លោកឧបនាយករដ្ឋមន្ត្រី បានបញ្ជាក់ជាថ្មីពីជំហររបស់ រាជរដ្ឋាភិបាលកម្ពុជា ក៏ដូចជា ក.អ.ក. ផ្ទាល់ ក្នុងការត្រៀមលក្ខណៈជាស្រេច ដើម្បីផ្តល់កិច្ចសម្របសម្រួលចំពោះការប្រមូលព័ត៌មានពាក់ព័ន្ធ សម្រាប់ជាមូលដ្ឋានក្នុងការសិក្សាសមិទ្ធិលទ្ធភាពរបស់ DFC ។ ភាគីទាំងពីរក៏បានបង្ហាញនូវការប្តេជ្ញាចិត្ត ក្នុងការប្រែក្លាយលទ្ធផលនៃកិច្ចពិភាក្សាដ៏ផុលផុសនេះ ទៅជាផែនការសកម្មភាពជាក់ស្តែង សំដៅរួមចំណែកដល់ការរីកចម្រើនសេដ្ឋកិច្ចប្រកបដោយបរិយាបន្ន និងចីរភាពសម្រាប់ប្រទេសទាំងពីរ៕