(កំពង់ឆ្នាំង)៖ យុវតីម្នាក់រស់នៅឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ដែលមានជំងឺចម្លែកប្រចាំការ រួមជាមួយឪពុកដែលពិការត្រចៀកទាំងសងខាង (ថ្លង់) ស្ដាប់មិនឮជាច្រើនឆ្នាំមកហើយ ទទួលបានការយកចិត្តទុក្ខ ដាក់ពីអាជ្ញាធរ និងមន្ដ្រីសុខាភិបាល ដោយបញ្ជូនមកពិនិត្យព្យាបាលនៅរាជធានីភ្នំពេញ។

នៅព្រឹកថ្ងៃទី២២ ខែមិថុនា ឆ្នាំ២០២៦ លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង និងបុគ្គលិកមន្ទីរពេទ្យបង្អែកខេត្តកំពង់ឆ្នាំង, លោកស្រីអភិបាលរងស្រុករលាប្អៀរ, លោក តាំង ប៊ុនទត មេឃុំជ្រៃបាក់ និងក្រុមការងារភូមិ-ឃុំ រួមទាំងក្រុមគ្រួសារយុវតីម្នាក់ដែលមានជំងឺចម្លែក និងពលរដ្ឋជាច្រើនរូបបានជូនដំណើរយុវតី ថេង មរកត និងឪពុក ដើម្បីធ្វើដំណើរមករាជធានីភ្នំពេញ។

គ្រួសារមួយមានសមាជិកគ្រួសារសរុបចំនួន៦នាក់ ក្នុងនោះមានជនមានពិការភាពចំនួន៣នាក់ និងមានយុវតីម្នាក់មានជំងឺចម្លែកដែលនាងត្រូវប្រើខោទឹកនោមជាប្រចាំតាំងពីតូច រហូតមកដល់បច្ចុប្បន្ន សព្វថ្ងៃនាងមានអាយុ១៧ឆ្នាំទៅហើយ និងរៀននៅថ្នាក់ទី៨ផងដែរ។ អាថ៌កំបាំងមួយនេះកន្លងមកនាងមិនដែលបញ្ចេញឲ្យមិត្តភក្កិបានដឹង ក្រៅពីក្រុមគ្រួសាររបស់នាងនោះឡើយ។

ប៉ុន្ដែដោយសារតែនាងចង់រស់នៅមានជីវិតប្រកបដោយសុខភាពល្អ បរិបូរណ៍ដូចគេដូចឯង ទើបនៅថ្ងៃទី១៨ ខែមិថុនា ឆ្នាំ២០២៦ នាងក៏បានសម្រេចចិត្តរៀបរាប់អំពីរឿងអាថ៌កំបាំង អំពីស្ថានភាពជំងឺរបស់នាង ប្រាប់បណ្ដាញព័ត៌មាន Fresh News ដើម្បីឲ្យជួយផ្សព្វផ្សាយដំណឹងនេះក្រែងមានសប្បុរសជនជួយយករូបនាងទៅព្យាបាល។

វត្តមានរបស់ថ្នាក់ដឹកនាំមន្ទីរសុខាភិបាលខេត្តកំពង់ឆ្នាំង និងអាជ្ញាធរស្រុក អាជ្ញាធរភូមិ-ឃុំ រួមទាំងក្រុមគ្រួសារ ក៏ដូចជាប្រជាពលរដ្ឋនៅក្នុងមូលដ្ឋានពួកគាត់ បានមកជូនដំណើរអ្នកជំងឺប្រកបដោយទឹកចិត្តរីករាយ ដោយបានឃើញមានការយកចិត្តទុកដាក់ សណ្ដោសប្រណី និងគិតគូរអំពីសុខមាលភាពរបស់ពលរដ្ឋពីថ្នាក់ដឹកនាំគ្រប់ជាន់ថ្នាក់ មកដល់ពលរដ្ឋដែលមានជីវភាពក្រីក្រ និងមានជំងឺរ៉ាំរ៉ៃដោយមិនមានប្រាក់ព្យាបាល។

លោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានគូសបញ្ជាក់ថា បច្ចុប្បន្នរាជរដ្ឋាភិបាលកម្ពុជា យកចិត្តទុកដាក់ខ្ពស់ចំពោះសុខមាលភាពសង្គមរបស់ប្រជាពលរដ្ឋ ជាអាទិភាពចម្បង រាជរដ្ឋាភិបាលក៏បានដាក់ចេញនូវគោលនយោបាយជាច្រើន ដើម្បីលើកកម្ពស់ជីវភាព និងសុវត្ថិភាពរស់នៅរបស់ពលរដ្ឋឲ្យរស់នៅប្រកបដោយភាពសុខដុមរមនា អាស្រ័យហេតុនេះបើបងប្អូនឬអាជ្ញាធរ ជួបប្រទះបញ្ហាដូចខាងលើនេះនៅក្នុងមូលដ្ឋានសូមប្រញាប់ទាក់ទងទៅមន្ទីរពេទ្យបង្អែកខេត្ត ឬក៏មន្ទីរសុខាភិបាលខេត្ត ដើម្បីខាងក្រុមការងារមន្ទីរសុខាភិបាលចុះជួយសង្គ្រោះបានទាន់ពេលវេលា។

លោក តាំង ប៊ុនទត មេឃុំជ្រៃបាក់ បានសម្ដែងនូវការដឹងគុណយ៉ាងក្រៃលែង ដល់ថ្នាក់ដឹកនាំគ្រប់ជាន់ថ្នាក់ ពិសេសលោកបានគោរពថ្លែងអំណរគុណដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានយកចិត្តទុកដាក់ខ្ពស់ចំពោះជីវភាពរស់នៅ និងសុខមាលភាពរបស់ប្រជាពលរដ្ឋ តាមរយៈការដាក់ចេញនូវគោលនយោបាយ និងវិធានការចាំបាច់ជាច្រើន ក្នុងគោលបំណងជួយដល់ប្រជាពលរដ្ឋរស់នៅ ប្រកបដោយភាពសប្បាយរីកក្រោមម្លប់សន្តិភាព។

លោកមេឃុំ បានថ្លែងអំណរគុណលោកសាស្ត្រាចារ្យ រដ្ឋមន្ត្រីក្រសួងសុខាភិបាល ដែលលោកតែងតែយកចិត្តទុកដាក់ជាពិសេសលើសុខភាពរបស់ប្រជាពលរដ្ឋ និងវីរៈកងទ័ព ដែលជាអាទិភាពខ្ពស់បំផុតនៅគ្រប់ កាលៈទេសៈទាំងអស់ និងបានអរគុណប្រធានមន្ទីរសុខាភិបាលខេត្តកំពង់ឆ្នាំង ដែលបានដឹកនាំក្រុមវេជ្ជបណ្ឌិត នៃមន្ទីរពេទ្យបង្អែកខេត្ត ចុះមកពិនិត្យជនមានពិការភាព និងយុវតីខាងលើនេះ ដែលនាងមានជំងឺប្រចាំកាយដល់មូលដ្ឋានផ្ទាល់ផងដែរ។

លោកមេឃុំជ្រៃបាក់ ក៏បានអរគុណអង្គភាពព័ត៌មាន Fresh News ដែលតែងតែបានចុះយកព័ត៌មានពាក់ព័ន្ធអំពីជីវភាពរស់នៅ និងទុក្ខលំបាករបស់ប្រជាពលរដ្ឋនៅតាមមូលដ្ឋានដាច់ស្រយាល ដែលអាជ្ញាធរមាន ការចន្លោះប្រហោង ដើម្បីធ្វើការផ្សព្វផ្សាយជាដំណឹងឲ្យបានដល់អាជ្ញាធរក៏ដូចជាថ្នាក់ដឹកនាំ និងចាត់វិធានការជួយដល់ពួកគាត់បានទាន់ពេលវេលា។ ខណៈនោះដែរ មន្ទីរសុខាភិបាលខេត្តកំពង់ឆ្នាំង, រដ្ឋបាលស្រុករលាប្អៀរ, រដ្ឋបាលឃុំជ្រៃបាក់ និងលោកមេភូមិបាញ់ឆ្គោល ក៏បានជួយឧបត្ថម្ភថវិកាមួយចំនួនដល់យុវតីខាងលើ និងឪពុករបស់នាងសម្រាប់ការចាយវាយ ក្នុងការស្នាក់នៅព្យាបាល។

គ្រួសារខាងលើនេះមានទីលំនៅក្នុងភូមិបាញ់ឆ្គោល ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។ លេខទូរសព្ទយុវតីខាងលើនេះ ០៩៧ ២៣៦ ៩៤ ១៤/លេខលោកមេភូមិ ០៩៧ ៨៣ ២៤ ៧៣៦៕