(ភ្នំពេញ)៖ លោក សុខ ដារ៉ា អគ្គនាយកនៃនិយ័តករបរធនបាលកិច្ច (ន.ប.ធ.) អមដោយសហការី នៅថ្ងៃទី២២ ខែមិថុនា ឆ្នាំ២០២៦នេះ បានអញ្ជើញប្រកាសបើក «វគ្គបណ្តុះបណ្តាល និងការប្រឡងគុណវុឌ្ឍិ និងកម្មវិធីអប់រំវិជ្ជាជីវៈបន្ត ក្នុងវិស័យបរធនបាលកិច្ច លើកទី៩» ដែលរៀបចំដោយនិយ័តករបរធនបាលកិច្ច នៅអគារមជ្ឈមណ្ឌលអភិវឌ្ឍធុរកិច្ច។

វគ្គបណ្តុះបណ្តាលនេះ ត្រូវបានរៀបចំរយៈពេលចំនួន បី ថ្ងៃពេញ ចាប់ពីថ្ងៃទី២២-២៤ ខែមិថុនា ឆ្នាំ២០២៦ និងមានអ្នកចូលរួមសរុបចំនួន ១៧៣រូប ដែលមានសមាសភាពចូលរួម ពីក្រុមហ៊ុននិងបុគ្គលពាក់ព័ន្ធដែលផ្តល់សេវាក្នុងវិស័យបរធនបាលកិច្ច, បុគ្គលដែលមានបំណងផ្តល់សេវាក្នុងវិស័យបរធនបាលកិច្ច និងសាធារណជន។

នាឱកាសថ្លែងបើកកម្មវិធីខាងលើ លោក សុខ ដារ៉ា បានធ្វើការចែករំលែកដល់សិក្ខាកាមទាំងអស់ថា «វគ្គបណ្តុះបណ្តាល និងការប្រឡងគុណវុឌ្ឍិ ជាបុរេលក្ខខណ្ឌសម្រាប់បុគ្គល ដែលត្រូវចូលរួមជាមួយក្រុមហ៊ុន និងបុគ្គលពាក់ព័ន្ធ ដែលផ្តល់សេវាក្នុងវិស័យបរធនបាលកិច្ច និងបុគ្គលដែលមានបំណងផ្តល់សេវាក្នុងវិស័យបរធនបាលកិច្ច.

លោក សុខ ដារ៉ា បន្ដទៀតថា វគ្គបណ្តុះបណ្តាលនេះ ក៏ជាលក្ខខណ្ឌតម្រូវមួយ ក្នុងការស្នើសុំអាជ្ញាបណ្ណ/ការអនុញ្ញាត/ការទទួលស្គាល់ពី ន.ប.ធ. ផងដែរ។

វគ្គបណ្តុះបណ្តាលនេះ មានរយៈពេលបីថ្ងៃពេញ និងផ្ដោតលើទិដ្ឋភាពពីរសំខាន់ៗ គឺផ្នែកក្របខណ្ឌច្បាប់និងបទប្បញ្ញត្តិ និងផ្នែកបច្ចេកទេស ហើយសិក្ខាកាមដែលជាសិក្ខាកាមថ្មី ត្រូវប្រឡងគុណវុឌ្ឍិនៅក្នុងថ្ងៃទីបួនបន្ទាប់ពីវគ្គបណ្ដុះបណ្ដាលបានបញ្ចប់។

ក្នុងករណីប្រឡងជាប់ សិក្ខាកាមនឹងទទួលបានវិញ្ញាបនបត្រ (Certificate) ដែលជាឯកសារផ្លូវការ ដែលបញ្ជាក់ពីការបំពេញលក្ខខណ្ឌនៃការចូលរួមវគ្គបណ្ដុះបណ្ដាល និងប្រឡងជាប់ដោយជោគជ័យ និងមានសុពលភាពរយៈពេលពីរឆ្នាំ។

ជាមួយគ្នានេះ និយ័តករបរធនបាលកិច្ច ក៏បានរៀបចំកម្មវិធីអប់រំវិជ្ជាជីវៈបន្ត ក្នុងវិស័យបរធនបាលកិច្ចក្នុងពេលជាមួយគ្នានេះផងដែរ សម្រាប់ក្រុមហ៊ុន និងបុគ្គលពាក់ព័ន្ធដែលផ្តល់សេវា ក្នុងវិស័យបរធនបាលកិច្ច ដែលធ្លាប់ចូលរួមវគ្គបណ្ដុះបណ្ដាល និងប្រឡងជាប់ដោយជោគជ័យពីមុនរួចហើយ ប៉ុន្តែផុតសុពលភាពពីរឆ្នាំ ដូចបានបញ្ជាក់ខាងលើ។

ពោលគឺសិក្ខាកាមទាំងនោះ ត្រូវមកចូលរួមកម្មវិធីអប់រំវិជ្ជាជីវៈបន្ត ដើម្បីបន្តសុពលភាព ប៉ុន្តែមិនតម្រូវឱ្យធ្វើការប្រឡងឡើងវិញនោះទេ។

បន្ថែមពីនេះ លោក សុខ ដារ៉ា ក៏បានធ្វើការចែករំលែកដល់សិក្ខាកាមទាំងអស់ អំពីស្ថានភាពទូទៅនៃទីផ្សារបរធនបាលកិច្ច កាលានុវត្តភាព និងទស្សនទាន នៃការអភិវឌ្ឍផលិតផល បរធនបាលកិច្ចថ្មីៗ និងទិសដៅបន្តក្នុងការអភិវឌ្ឍទីផ្សារបរធនបាលកិច្ច ផងដែរ ដើម្បីត្រៀមខ្លួនក្នុងការចាប់យកឱកាសថ្មីៗនៅក្នុងវិស័យបរធនបាលកិច្ច។

គួរបញ្ជាក់ជូនផងដែរថា កន្លងមក និយ័តករបរធនបាលកិច្ច ធ្លាប់បានរៀបចំវគ្គបណ្តុះបណ្តាល និងការប្រឡងគុណវុឌ្ឍិ និងកម្មវិធីអប់រំវិជ្ជាជីវៈបន្តក្នុងវិស័យបរធនបាលកិច្ច ចំនួន៨លើក រួចមកហើយ ដោយមានអ្នកចូលរួមសរុបចំនួនប្រមាណ ១,៤០០ រូប និងមានអ្នកប្រឡងជាប់សរុបចំនួនប្រមាណ១,៣២៣រូប៕