(ស្វាយរៀង)៖ ប្រជាពលរដ្ឋជាច្រើនគ្រួសារនៅភូមិព្រៃគគីរ ឃុំព្រៃគគីរ ស្រុកចន្ទ្រា ខេត្តស្វាយរៀង បាននាំគ្នាតវ៉ា ឱ្យអាជ្ញាធរមូលដ្ឋានរកដំណោះស្រាយជូនពួកគាត់ ដោយសារតែមានប្រជាពលរដ្ឋ ១គ្រួសារ ដែលយករបងបាំងជិតផ្លូវមិនឱ្យធ្វើដំណើរបានដូចរាល់ដង។

ប្រជាពលរដ្ឋបានឱ្យដឹងថា ផ្លូវលំ ១ខ្សែក្នុងឃុំព្រៃគគីរ ស្រុកចន្ទ្រា ខេត្តស្វាយរៀង ប្រជាពលរដ្ឋធ្វើដំណើរជាង ២០ឆ្នាំមកហើយ តែមានគ្រួសារមួយបានបិទផ្លូវមិនឱ្យពួកគាត់ធ្វើដំណើរ នៅថ្ងៃទី២២ ខែមិថុនា ឆ្នាំ២០២៦នេះ នាំឱ្យប្រតិកម្មយ៉ាងខ្លាំង និងស្នើឱ្យអាជ្ញាធរបើកផ្លូវជាបន្ទាន់។

ប្រជាពលរដ្ឋបានបន្តថា ពលរដ្ឋ១គ្រួសារនេះ បានរំលោភយកដីផ្លូវនឹងធ្វើរបងបាំងជិតមិនឱ្យពួកគាត់ចូលទៅលំនៅដ្ឋាន ខណៈបានចេញពីធ្វើការរោងចក្រ ដើម្បីហូបបាយថ្ងៃត្រង់ តែត្រូវជាប់គាំងដោយសារគេធ្វើរបងបិទជិតផ្លូវ។ ជាមួយគ្នានេះពួកគាត់ក៏បានលើកឡើងថាគ្រួសារនេះកាលពីដើមឡើយ មិនរករឿងអ្វីនោះទេ តែដោយសារមានរោងចក្រ និងដីឡើងថ្លៃទើបទាមទារយកផ្លូវធ្វើជាកម្មសិទ្ធិតែម្ដង ដោយអះអាងថា ផ្លូវនេះជាដីរបស់ខ្លួន តែខាងសុរិយាដី មិនធ្វើប្លង់ឱ្យនោះទេ ដោយសារដីមានទំនាស់រង់ចាំដោះស្រាយ។

ពាក់ព័ន្ធនឹងករណីនេះដែរ ភ្នាក់ងារព័ត៌មាន Fresh News បានទំនាក់ទំនងទៅ លោក ថន ថាវុទ្ធា អភិបាលស្រុកចន្ទ្រា នៅរសៀលថ្ងៃទី២២ ខែមិថុនាឆ្នាំ ២០២៦នេះ លោកបានបញ្ជាក់ថា ខាងស្រុក និងឃុំបានអញ្ជើញភាគីដែលពាក់ពន្ធ័មកសម្របសម្រួលដើម្បីរកដំណោះស្រាយហើយ៕