(ព្រះសីហនុ)៖ ដោយស្របតាមបេសកកម្មស្នូល ក្នុងការលើកកម្ពស់ការអភិវឌ្ឍន៍សហគមន៍ ប្រកបដោយចីរភាព មូលនិធិកំពង់ដេវ៉ា ដែលជាផ្នែកទំនួលខុសត្រូវសង្គម (CSR) របស់កំពង់ដេវ៉ា រីហ្សត នៅថ្ងៃទី២១ ខែមិថុនា ឆ្នាំ២០២៦ បានចាប់ផ្តើមយុទ្ធនាការសុខភាព អនាម័យ និងភាពស្អាត ក្នុងសហគមន៍ នៅភូមិអុង ខេត្តព្រះសីហនុ។

គម្រោងសំខាន់នេះ មានគោលបំណងស្របតាមគោលដៅស្នូល របស់កំពង់ដេវ៉ា រីហ្សត គឺលើកកម្ពស់សហគមន៍ជិតខាង តាមរយៈសកម្មភាពជាក់ស្តែង ពោរពេញដោយមេត្តាករុណា និងចីរភាព។ យុទ្ធនាការនេះ ត្រូវបានរចនាឡើង ដើម្បីផ្តល់ចំណេះដឹង និងយន្តការដល់ប្រជាពលរដ្ឋភូមិអុង ដើម្បីរក្សាបរិស្ថាន សុវត្ថិភាព និងសុខភាពល្អ។

ដោយផ្តោតលើទម្លាប់ប្រចាំថ្ងៃដូចជា៖ ការលាងដៃត្រឹមត្រូវ ការដុសធ្មេញ ការគ្រប់គ្រង់កាកសំណល់ ឲ្យមានសុវត្ថិភាព ការរក្សាបរិស្ថានឲ្យស្អាត និងការប្រើប្រាស់ទឹកស្អាត គម្រោងនេះ មានគោលបំណងបង្កើតជាអ្នកការពារ អាចបង្ការដែលប្រឆាំងជំងឺផ្សេងៗបាន។

លោក ឱ ភន មេភូមិអុង បានបង្ហាញការកោតសរសើរ និងការដឹងគុណចំពោះការគាំទ្រ និងកិច្ចសហការ និងបានលើកឡើងថា ការបង្រៀនកូនៗ អំពីការលាងដៃ និងដុសធ្មេញត្រឹមត្រូវ គឺជាការវិនិយោគដ៏មានតម្លៃ សម្រាប់អនាគត និងសេចក្តីរីកចម្រើនរបស់ភូមិ។

លោកស្រី Angioline Villanueva ប្រធានផ្នែកធនធានមនុស្ស (CHRO) នៃកំពង់ដេវ៉ា រីហ្សត បានថ្លែងថា «ការចូលរួមក្នុងយុទ្ធនាការសុខភាព អនាម័យ និងភាពស្អាត ក្នុងសហគមន៍ជាលើកដំបូងនេះ យើងជឿថា ជាជំហានសំខាន់ ក្នុងការបង្កើតសហគមន៍ មានសុខភាពល្អ ភាពស្អាត និងមានសុវត្ថិភាពអនាម័យ សម្រាប់មនុស្សគ្រប់គ្នា»។

លោកស្រីបន្ដថា សុខភាព អនាម័យ និងភាពស្អាតនេះ គឺសំខាន់ណាស់ ក្នុងជីវិតប្រចាំថ្ងៃ។ ពេលបរិស្ថានរស់នៅស្អាត និងទម្លាប់ល្អ យើងអាចការពារគ្រួសារ កូនៗ និងអ្នកជិតខាង ពីជំងឺបាន។ សហគមន៍មានសុខភាពល្អ គឺជាសហគមន៍មានកម្លាំង ព្រោះពេលមនុស្សមានសុខភាពល្អ ពួកគេអាចធ្វើការ ការសិក្សា និងរស់នៅបានប្រសើរជាងមុន។

សកម្មភាពនេះ មិនមែនគ្រាន់តែភាពស្អាតតែមួយមុខនោះទេ។ វាក៏ជាការលើកទឹកចិត្តឲ្យគ្រប់គ្នាអនុវត្តអនាម័យល្អនៅផ្ទះ នៅសាលា និងកន្លែងសាធារណៈផងដែរ។ នេះជាការបញ្ជាក់បន្ថែម របស់លោកស្រី Angioline Villanueva។

លោកស្រីបានលើកឡើងថា សកម្មភាពសាមញ្ញដូចជា ការលាងដៃត្រឹមត្រូវ ការដុសធ្មេញ ការគ្រប់គ្រងកាកសំណល់ ឲ្យមានត្រឹមត្រូវមានសុវត្ថិភាព ការរក្សាបរិស្ថានឲ្យស្អាត និងការប្រើទឹកស្អាត អាចជួយបង្ការជំងឺបានយ៉ាងមានប្រសិទ្ធភាព។

សូមជម្រាបថា មូលនិធិកំពង់ដេវ៉ា គឺផ្នែកការងារទំនួលខុសត្រូវសង្គម របស់មជ្ឈមណ្ឌលកំសាន្តសំបូរបែបកំពង់ដេវ៉ា។ មូលនិធិនេះ អនុវត្តតាមក្របខណ្ឌ Panca Krida (សសរស្តម្ភទាំងប្រាំ) ដែលជាសសរស្តម្ភយុទ្ធសាស្ត្រចម្បងចំនួនប្រាំសម្រាប់ការអនុវត្តសកម្មភាព។

គោលបំណងរបស់មូលនិធី គឺភ្ជាប់ភាពជោគជ័យក្នុងអាជីវកម្ម ជាមួយការងារទំនួលខុសត្រូវសង្គម ដើម្បីធានាថា រាល់ការសម្រេចចិត្តទាំងអស់ គាំទ្រដល់គោលដៅរួមតែមួយ គឺការបង្កើតសុភមង្គលសម្រាប់ភ្ញៀវ បុគ្គលិក ម្ចាស់អាជីវកម្ម និងសហគមន៍មូលដ្ឋាន៕