(ភ្នំពេញ)៖ លោក ស៊ីន ចានសិរីវុត្ថា រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋាន អាកាសចរស៊ីវិល បានបញ្ជាក់ឲ្យដឹងថា កញ្ចប់ហិរញ្ញប្បទាន ចំនួន១០០លានដុល្លារអាមេរិក ដែលបានផ្តល់ដោយសាជីវកម្មហិរញ្ញវត្ថុអភិវឌ្ឍន៍អន្តរជាតិ (DFC) គាំទ្រការពង្រីក «អាកាសយានដ្ឋានអន្តរជាតិតេជោ» ជាការវិនិយោគយុទ្ធសាស្ត្ររយៈពេលវែង និងមានតម្លៃលើសពីកម្ចី សម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធធម្មតា។

ជាក់ស្ដែង នៅថ្ងៃទី២២ ខែមិថុនា ឆ្នាំ២០២៦នេះ សាជីវកម្មហិរញ្ញវត្ថុអភិវឌ្ឍន៍អន្តរជាតិរបស់សហរដ្ឋអាមេរិក (DFC) និងសាជីវកម្មវិនិយោគកម្ពុជានៅបរទេស (OCIC) បានចុះហត្ថលេខាលើលិខិតបញ្ជាក់បំណង ពីហិរញ្ញប្បទានជាយុទ្ធសាស្រ្ត ចំនួន១០០លានដុល្លារ សម្រាប់អាកាសយានដ្ឋានអន្តរជាតិតេជោ ដែលជាច្រកទ្វារអន្តរជាតិថ្មីរបស់កម្ពុជា និងជាការវិនិយោគហេដ្ឋារចនាសម្ព័ន្ធដ៏ធំបំផុតមួយរបស់ប្រទេសកម្ពុជា។

ថ្លែងប្រាប់បណ្ដាញព័ត៌មាន Fresh News, លោក ស៊ីន ចានសិរីវុត្ថា បានឲ្យដឹងថា លិខិតសម្តែងឆន្ទៈ (LOI) នេះ គឺជាជំហានឆ្ពោះទៅមុខដ៏សំខាន់មួយ ក្នុងការសម្រេចបាន នូវហិរញ្ញប្បទាន ពីសាជីវកម្មហិរញ្ញវត្ថុអភិវឌ្ឍន៍អន្តរជាតិ (DFC) សម្រាប់គម្រោង អាកាសយានដ្ឋានអន្តរជាតិតេជោ ហើយក៏ជាការឆ្លុះបញ្ចាំងឱ្យឃើញពីការកើនឡើង នូវទំនុកចិត្តកម្រិតអន្តរជាតិ មកលើវិស័យហេដ្ឋារចនាសម្ព័ន្ធរបស់កម្ពុជាផងដែរ។

លោក ស៊ីន ចានសិរីវុត្ថា បានបន្ថែមថា ទោះជាយ៉ាងណាក៏ដោយ កិច្ចការផ្លូវច្បាប់ហិរញ្ញវត្ថុ អនុលោមភាព និងលក្ខខណ្ឌបិទបញ្ចប់ការចរចាដ៏សំខាន់ៗបំផុត នៅតែជាដំណាក់កាល ចម្បងខាងមុខ ដែលត្រូវសម្រេចឱ្យបាន មុនពេលកញ្ចប់ហិរញ្ញប្បទាននេះ ចូលជាធរមានពេញលេញ និងអាចដកសាច់ប្រាក់យកមកប្រើប្រាស់បាន។

លោក ស៊ីន ចានសិរីវុត្ថា បានបញ្ជាក់ថា កញ្ចប់ហិរញ្ញប្បទានចំនួន១០០លានដុល្លារអាមេរិក ដែលបានផ្តល់ដោយ DFC នេះ គួរតែត្រូវបានចាត់ទុកថា មានតម្លៃលើសពីកម្ចី សម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធធម្មតា ដោយហេតុថា នេះជាការវិនិយោគយុទ្ធសាស្ត្ររយៈពេលវែង ដែលត្រូវបានបង្កើតឡើង ក្នុងគោលបំណងគាំទ្រ ដល់ការអភិវឌ្ឍ ជាបន្តបន្ទាប់ ការធ្វើឱ្យប្រសើរឡើងនូវរចនាសម្ព័ន្ធទុន (Capital Optimization) ការពង្រឹងសមត្ថភាពប្រតិបត្តិការ និងនិរន្តរភាព រយៈពេលវែងរបស់អាកាសយានដ្ឋានអន្តរជាតិតេជោ (KTI) ក្នុងនាមជាច្រកទ្វារអាកាសចរណ៍អន្តរជាតិ ឈានមុខគេរបស់កម្ពុជា។

បន្ថែមពីនោះទៀត លោក ស៊ីន ចានសិរីវុត្ថា បានលើកឡើងថា ហិរញ្ញប្បទាននេះ ត្រូវបានរំពឹងថា នឹងរួមចំណែកដល់គោលបំណងយុទ្ធសាស្ត្រ ដែលផ្សារភ្ជាប់គ្នាទៅវិញទៅមកចំនួន៦រួមមាន៖

១៖ ការពង្រឹងសមត្ថភាពហេដ្ឋារចនាសម្ព័ន្ធ និងឧត្តមភាពប្រតិបត្តិការ (Infrastructure Capacity & Operational Excellence
២៖ ការបង្កើននិរន្តរភាពហិរញ្ញវត្ថុ និងការធ្វើឱ្យប្រសើរឡើងនូវរចនាសម្ព័ន្ធទុន (Financial Sustainability & Capital Structure)
៣៖ ការជំរុញយុទ្ធសាស្ត្រប្រែក្លាយកម្ពុជា ទៅជាមជ្ឈមណ្ឌលអាកាសចរណ៍ក្នុងតំបន់ (Regional Aviation Hub Strategy)
៤៖ ការធ្វើជាកាតាលីករជំរុញកំណើនសេដ្ឋកិច្ច និងការទាក់ទាញការវិនិយោគ (Economic Growth & Investment)
៥៖ ការបង្ហាញពីទំនុកចិត្តលំដាប់អន្តរជាតិដ៏រឹងមាំមកលើព្រះរាជាណាចក្រកម្ពុជា (International Confidence)
៦៖ ការកៀរគរទុនបន្ថែមពីប្រភពស្ថាប័នហិរញ្ញវត្ថុអន្តរជាតិនានា (Mobilizing International Capital)។

សូមជម្រាបផងដែរថា ការផ្តល់ហិរញ្ញប្បទាននេះ តំណាងឱ្យការគាំទ្រយ៉ាងសំខាន់ ដល់អាកាសយានដ្ឋានអន្តរជាតិតេជោ និងការទទួលស្គាល់ដល់ក្រុមហ៊ុន អូស៊ីអាយស៊ី (OCIC) ដែលជាសម្ព័ន្ធក្រុមហ៊ុនក្នុងស្រុក និងជាក្រុមហ៊ុនធំជាងគេមួយក្នុងចំណោមក្រុមអភិវឌ្ឍហេដ្ឋារចនាសម្ព័ន្ធនៅក្នុងប្រទេសកម្ពុជា។​

សមិទ្ធផលដ៏សំខាន់នេះ បាន​កសាង​ឡើង​ពី​ការ​ចូលរួម​អស់ ​រយៈពេល​ជាច្រើន​ឆ្នាំ​របស់​ក្រុមហ៊ុន កាណាឌីយ៉ា គ្រុប (Canadia Group) និងក្រុមហ៊ុន អូស៊ីអាយស៊ី OCIC ជាមួយ​ស្ថាប័ន​អាមេរិក រួម​ទាំង​ស្ថានទូត​អាមេរិក សភាពាណិជ្ជកម្ម​អាមេរិក​ប្រចាំ​កម្ពុជា និង​ក្រុមហ៊ុន​អាមេរិក​ដូចជា General Electric, OTIS, Caterpillar, Ford និង Apple។ តាមរយៈ​គណៈប្រតិភូ​ធុរកិច្ច និង​ការសន្ទនា ក្រុមហ៊ុនមួយ​នេះ​កំពុង​ធ្វើការ​ ដើម្បី​គាំទ្រ​ដល់​ការ​អភិវឌ្ឍ​ហេដ្ឋារចនាសម្ព័ន្ធ និង​ការ​តភ្ជាប់​ហេដ្ឋារចនាសម្ព័ន្ធរបស់​កម្ពុជា។​

នាពេលថ្មីៗនេះ អាកាសយានដ្ឋានអន្តរជាតិតេជោ ត្រូវបានទទួលស្គាល់ ក្នុងចំណោមអាកាសយានដ្ឋានដ៏ស្រស់ស្អាតបំផុតលើពិភពលោកឆ្នាំ ២០២៦ ក្នុងការជ្រើសរើសថ្នាក់ពិភពលោក (World Selection) របស់ Prix Versailles។ អាកាសយានដ្ឋានអន្តរជាតិតេជោ ត្រូវបានចុះបញ្ជីរួមជាមួយគម្រោងអន្តរជាតិដ៏លេចធ្លោពីសហរដ្ឋអាមេរិក អាល្លឺម៉ង់ ចិន និងឥណ្ឌា ដោយបង្ហាញពីគុណភាពស្ថាបត្យកម្ម អត្តសញ្ញាណរចនាបថខ្មែរ និងការរួមបញ្ចូលវប្បធម៌ខ្មែរយ៉ាងសម្បូរបែប៕