(បន្ទាយមានជ័យ)៖ គណៈបញ្ជាការឯកភាពរដ្ឋបាលខេត្តបន្ទាយមានជ័យ នៅថ្ងៃទី២២ ខែមិថុនា ឆ្នាំ២០២៦ បានចុះត្រួតពិនិត្យទីតាំងចំនួន៣ ក្នុងភូមិសាស្ដ្រក្រុងប៉ោយប៉ែត រកឃើញជនបរទេសសរុបចំនួន៣០នាក់។

ប្រតិបត្តិការនេះធ្វើឡើងក្រោមការបញ្ជា និងដឹកនាំផ្ទាល់ពីលោក អ៊ុំ រាត្រី ប្រធានគណៈបញ្ជាការឯកភាពខេត្ត និងដោយមានការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្ត។

របាយការណ៍របស់រដ្ឋបាលខេត្តបន្ទាយមានជ័យ បានបញ្ជាក់ថា ក្រុមការងារចម្រុះក្រោមការសម្របសម្រួលនីតិវិធី ពីលោក ទេព ឃុនឆ័យ ព្រះរាជអាជ្ញារង នៃអយ្យការអមសាលាដំបូងខេត្ត បានចុះត្រួតពិនិត្យទីតាំងចំនួន៣ ក្នុងភូមិសាស្ដ្រ ក្រុងប៉ោយប៉ែត រកឃើញជនបរទេសសរុបចំនួន៣០នាក់ ៣សញ្ជាតិ ចិន៥នាក់ប្រុស, ឥណ្ឌូនេស៊ី១០នាក់ ស្រី៣នាក់ និងថៃ១៥នាក់ស្រី៦នាក់។

របាយការណ៍បានបញ្ជាក់ទៀតថា ទីតាំងដែលក្រុមការងារចុះត្រួតពិនិត្យ រួមមាន៖

- ទីតាំងទី១ ផ្ទះ១ល្វែង កម្ពស់២ជាន់ ៥បន្ទប់ ស្ថិតនៅភូមិសាមគ្គីមានជ័យ សង្កាត់អូរជ្រៅ មានជនជាតិឥណ្ឌូនេស៊ីស្នាក់នៅចំនួន១០នាក់ ស្រី៣នាក់ ពុំមានសម្ភារសង្ស័យ។ អប់រំណែនាំម្ចាស់ទីតាំង និងផាកពិន័យករណីមិនរាយការណ៍ពីវត្តមានជនបរទេសស្នាក់នៅទីតាំងរបស់ខ្លួន។

- ទីតាំងទី២ ផ្ទះ១ល្វែងកម្ពស់២ជាន់ ៦បន្ទប់ ស្ថិតនៅភូមិផ្សារកណ្ដាល សង្កាត់ផ្សារកណ្ដាល មានជនជាតិចិន ស្នាក់នៅចំនួន៥នាក់ប្រុស ពុំមានលិខិតឆ្លងដែនជាប់ខ្លួន និងខ្មែរ១នាក់ស្រី ទីតាំងពុំមានសម្ភារ:សង្ស័យ។ ចំណាត់ការ៖ បញ្ជូនជនជាតិចិន៥នាក់ប្រុស និងខ្មែរស្រី១នាក់ទៅអធិការដ្ឋាននគរបាលក្រុង និងស្រាវជ្រាវរកម្ចាស់ទីតាំងដើម្បីផាកពិន័យ។

- ទីតាំងទី៣ ផ្ទះ១ល្វែង កម្ពស់២ជាន់ ៥បន្ទប់ រកឃើញជនជាតិថៃចំនួន១៥នាក់ ស្រី៦នាក់ រកឃើញសម្ភារសង្ស័យមួយចំនួនរួមមាន កុំព្យូទ័រ All-in-one ចំនួន១១គ្រឿង, ទូរសព្ទ១០គ្រឿង តាមការធ្វើកោសល្យវិច្ច័យរបស់ការិយាល័យប្រឆាំងបទល្មើសបច្ចេកវិទ្យា ពិនិត្យឃើញថា ជាករណីឆបោកក្រោមប្រព័ន្ធបច្ចេកវិទ្យាអនឡាញស្កេម ក្រោមរូបភាព ក្លែងបន្លំជាក្រុមហ៊ុនលក់ទំនិញ G-MARKET ទិសដៅឆបោកទៅប្រទេសថៃ។

ជនជាតិថៃ ត្រូវបញ្ជូនទៅអធិការដ្ឋាននគរបាលក្រុង និងដកហូតសម្ភាររក្សាទុកនៅស្នងការដ្ឋាននគរបាលខេត្ត ហើយបន្ដស្រាវជ្រាវរកម្ចាស់ទីតាំង និងបិទទីតាំងជាបណ្ដោះអាសន្ន៕