(តាកែវ)៖ គ្រោះធម្មជាតិខ្យល់កន្ត្រាក់លាយឡំជាមួយភ្លៀងធ្លាក់ខ្លាំង បានវាយប្រហារយ៉ាងធ្ងន់ធ្ងរនៅក្នុងភូមិសាស្ត្រស្រុកអង្គរបូរី ខេត្តតាកែវ បណ្តាលឱ្យផ្ទះសម្បែងរបស់ប្រជាពលរដ្ឋចំនួន៧៧ខ្នង ស្មើនឹង៧៧គ្រួសារ រងការបាក់រលំ និងខូចខាត នៅរសៀលថ្ងៃទី២០ ខែមិថុនា ឆ្នាំ២០២៦នេះ។

យោងតាមរបាយការណ៍បឋមពីអនុសាខាកាកបាទក្រហមកម្ពុជាស្រុកអង្គរបូរី បានឱ្យដឹងថា ហេតុការណ៍នេះបានកើតឡើងនៅវេលាម៉ោងប្រហែល ១៦៖៣០នាទីរសៀល បន្ទាប់ពីមានសម្ពាធភ្លៀងធ្លាក់ជាប់ៗគ្នាប៉ុន្មានថ្ងៃកន្លងមក។ គ្រោះធម្មជាតិមួយនេះបានបង្កផលប៉ះពាល់ដល់ឃុំចំនួន២ ក្នុងនោះរួមមាន៖
ឃុំព្រែកផ្ទោល រងផលប៉ះពាល់សរុប២៨ខ្នង (កម្រិតមធ្យម ១៣ខ្នង និងកម្រិតស្រាល ១៥ខ្នង) ស្ថិតក្នុងភូមិអង្គរបូរី ភូមិកំពង់ពោធិ៍ និងភូមិភ្នំបាទេព។

ឃុំអង្គរបូរី រងផលប៉ះពាល់សរុប៤៩ខ្នង ក្នុងនោះមានផ្ទះបាក់រលំទាំងស្រុងចំនួន៤ខ្នង (ស្ថិតនៅភូមិសាមគ្គី២ខ្នង, ភូមិព្រៃសំបួរ ១ខ្នង និងភូមិស្ទឹងកំបុត ១ខ្នង) ព្រមទាំងរងការខូចខាតកម្រិតមធ្យម ៦ខ្នង និងកម្រិតស្រាល៣៩ខ្នង។

រឿងរ៉ាវដ៏ខ្លោចចិត្តរបស់គ្រួសារមួយនៅភូមិសាមគ្គី ក្នុងចំណោមគ្រួសាររងគ្រោះទាំងអស់ អ្វីដែលធ្វើឱ្យមហាជន និងអ្នកភូមិផងរបងជាមួយសម្ដែងការក្តុកក្តួល និងអាណិតអាសូរខ្លាំងបំផុតនោះ គឺករណីគ្រួសាររបស់លោក ហឹម ហាក់ រស់នៅភូមិសាមគ្គី ឃុំអង្គរបូរី។ ផ្ទះរបស់លោកត្រូវបានខ្យល់កន្ត្រាក់វាយកម្ទេចឱ្យបាក់រលំទាំងស្រុង ខណៈដែលភរិយារបស់លោកទើបតែបានទទួលមរណភាពចោលថ្មីៗ។ អ្វីដែលកាន់តែសង្វេគទៅទៀតនោះ កូនប្រុសរបស់លោកកំពុងសម្រាកព្យាបាលជំងឺជំងឺធ្ងន់ធ្ងរនៅមន្ទីរពេទ្យនៅឡើយ ដោយមិនទាន់ដឹងដំណឹងពីការស្លាប់របស់មាតាខ្លួន និងការបាក់រលំផ្ទះសម្បែងនេះទេ។

ភ្លាមៗបន្ទាប់ពីកើតហេតុការណ៍នេះ ប្រធានអនុសាខាកាកបាទក្រហមកម្ពុជាស្រុកអង្គរបូរី បានធ្វើលិខិតស្នើសុំជាបន្ទាន់ទៅកាន់ប្រធានគណៈកម្មាធិការសាខាកាកបាទក្រហមកម្ពុជា ខេត្តតាកែវ ដើម្បីនាំយកជំនួយសង្គ្រោះបន្ទាន់ និងស្បៀងអាហារ ទៅចែកជូនដល់គ្រួសាររងគ្រោះទាំង ៧៧គ្រួសារ ជាពិសេសគឺការយកចិត្តទុកដាក់ខ្ពស់ទៅលើគ្រួសារដែលរងការបាក់រលំផ្ទះទាំងស្រុង និងគ្រួសារដែលកំពុងជួបទុក្ខលំបាកទ្វេដង ដើម្បីជួយសម្រាលទុក្ខលំបាក និងផ្តល់ជម្រកបណ្តោះអាសន្នដល់ពួកគេក្នុងការឆ្លងកាត់ដំណាក់កាលដ៏លំបាកនេះ៕