(ភ្នំពេញ)៖ សម្ដេចព្រះមហាសង្ឃរាជ បួរ គ្រី ព្រះសាកលវិទ្យាធិការ នៃពុទ្ធិកសាកលវិទ្យាល័យព្រះសីហមុនីរាជា និងជាព្រះប្រធានប៉ុស្ដិ៍សុខភាពសម្ដេចព្រះរាជគ្រូ បួរ គ្រី ព្រះករុណាព្រះមហាក្សត្រសីហមុនី ទ្រង់សព្វព្រះរាជហឫទ័យប្រោសព្រះរាជានុញ្ញាតឱ្យគណៈប្រតិភូមកពីសាធារណរដ្ឋបារាំង លោក Zinzindohoue Marsadon Franck លោក Khau Eric លោកស្រី Gestin Vilion Claudia និងលោកស្រី Barabe Christine ចូលក្រាបបង្គំគាល់ និងសម្ដែងការគួរសម ក្នុងឱកាសបំពេញទស្សនកិច្ចនៅពុទ្ធិកសាកលវិទ្យាល័យព្រះសីហមុនីរាជា នារសៀលថ្ងៃសៅរ៍ ទី២០ ខែមិថុនា ឆ្នាំ២០២៦។

ក្នុងពិធីទទួលបដិសណ្ឋារកិច្ចនេះ ក៏មានការយាង-និមន្ត និងអញ្ជើញចូលរួមពីសំណាក់សម្ដេចព្រះពុទ្ធរ័ត្នរាជវង្សា កែវ ឌីម៉ង់ ព្រះសាកលវិទ្យាធិការរង សម្ដេចព្រះត្រ័យរតនាវង្សាចារ្យ ទូច សាទរ ព្រឹទ្ធបុរសនៃពុទ្ធិកមហាវិទ្យាល័យទស្សនវិជ្ជា សាសនា និងនីតិសាស្ត្រ ព្រមទាំងលោក ងួន ស្តេចភក្តី ទីប្រឹក្សាផ្ទាល់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងជារដ្ឋលេខាធិការក្រសួងធម្មការ និងសាសនា ទទួលបន្ទុកពុទ្ធិកសាកលវិទ្យាល័យព្រះសីហមុនីរាជា។

នាឱកាសនោះ សម្ដេចព្រះមហាសង្ឃរាជ ទ្រង់សព្វព្រះរាជហឫទ័យស្វាគមន៍យ៉ាងកក់ក្តៅចំពោះគណៈប្រតិភូ និងបានមានព្រះរាជបន្ទូលអំពីវឌ្ឍនភាព និងសមិទ្ធផលសំខាន់ៗរបស់ពុទ្ធិកសាកលវិទ្យាល័យព្រះសីហមុនីរាជា ជាពិសេសការផ្តល់អាហារូបករណ៍ពេញលេញ ១០០% ដល់សមណនិស្សិត និងនិស្សិតមកពីគ្រប់មជ្ឈដ្ឋានដោយមិនមានការរើសអើង ការផ្តល់អន្តេវាសិកដ្ឋានសម្រាប់ស្នាក់នៅ ព្រមទាំងមានប៉ុស្ដិ៍សុខភាពសម្ដេចព្រះរាជគ្រូ បួរ គ្រី សម្រាប់ផ្តល់សេវាពិនិត្យ និងព្យាបាលសុខភាពដោយឥតគិតថ្លៃ ដែលបានរួមចំណែកយ៉ាងសំខាន់ក្នុងការលើកកម្ពស់ការទទួលបានការអប់រំប្រកបដោយសមធម៌ ការលើកកម្ពស់សុខមាលភាព និងការអភិវឌ្ឍធនធានមនុស្សប្រកបដោយចីរភាពនៅកម្ពុជា។

ជាមួយគ្នានេះ គណៈប្រតិភូបានសម្ដែងនូវការកោតសរសើរចំពោះការរីកចម្រើនរបស់ពុទ្ធិកសាកលវិទ្យាល័យព្រះសីហមុនីរាជា ក្រោមព្រះរាជកិច្ចដឹកនាំប្រកបដោយទឹកព្រះទ័យដ៏ថ្លៃថ្លារបស់សម្ដេចជាអម្ចាស់ជាពិសេសការផ្តល់នូវការអប់រំប្រកបដោយគុណភាព សមធម៌ និងបរិយាបន្ន ដែលស្របតាមគោលដៅអភិវឌ្ឍន៍ប្រកបដោយចីរភាព និងបានចូលរួមចំណែកយ៉ាងសកម្មក្នុងការកសាងសង្គម។

ដំណើរទស្សនកិច្ចនេះបានប្រព្រឹត្តទៅក្នុងបរិយាកាសស្និទ្ធស្នាល និងកក់ក្តៅ។ ក្នុងឱកាសនោះ សម្តេចជាអម្ចាស់ ព្រះមន្ត្រីសង្ឃ ថ្នាក់ដឹកនាំ និងគណៈប្រតិភូក៏បានយាង និមន្ត និងអញ្ជើញទស្សនាហេដ្ឋារចនាសម្ព័ន្ធ ព្រមទាំងសមិទ្ធផលនានារបស់ពុទ្ធិកសាកលវិទ្យាល័យព្រះសីហមុនីរាជា៕