(ព្រះវិហារ)៖ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ នៅព្រឹកថ្ងៃទី២២ ខែមិថុនា ឆ្នាំ២០២៦ បានដឹកនាំមន្ត្រីរាជការក្រោមឱវាទ អញ្ជើញចូលរួមរំលែកមរណទុក្ខ និងគោរពវិញ្ញាណក្ខន្ធ លោក មាស លៀង អតីតប្រធានមន្ទីរសុខាភិបាលខេត្តព្រះវិហារ ដែលបានទទួលមរណភាពដោយជរាពាធ នៅវេលាម៉ោង ៩៖៣០នាទីព្រឹក ថ្ងៃទី២០ ខែមិថុនា ឆ្នាំ២០២៦ ដោយជរាពាធ។

ក្នុងឱកាសដ៏ក្រៀមក្រំនេះ លោកវេជ្ជបណ្ឌិត គួង ឡូ និងមន្ត្រីរាជការនៃមន្ទីរសុខាភិបាលខេត្តព្រះវិហារ បាននាំយកបច្ច័យចូលបុណ្យ ព្រមទាំងអង្ករចំនួន ៥០គីឡូក្រាម និងទឹកបរិសុទ្ធចំនួន ២កេស ប្រគេនព្រះសង្ឃ និងចូលរួមឧបត្ថម្ភដល់ក្រុមគ្រួសារសព ដើម្បីចាត់ចែងពិធីបុណ្យតាមប្រពៃណីព្រះពុទ្ធសាសនា។

ក្នុងនាមថ្នាក់ដឹកនាំ និងមន្ត្រីរាជការនៃមន្ទីរសុខាភិបាលខេត្តព្រះវិហារ លោកវេជ្ជបណ្ឌិត គួង ឡូ បានសម្តែងនូវសេចក្តីសោកស្តាយ និងអាឡោះអាល័យជាពន់ពេកចំពោះការបាត់បង់លោក មាស លៀង ដែលជាអតីតថ្នាក់ដឹកនាំដែលមានគុណូបការៈ និងបានចូលរួមចំណែកយ៉ាងសកម្មក្នុងការកសាង និងអភិវឌ្ឍវិស័យសុខាភិបាលនៅខេត្តព្រះវិហារ ក្នុងដំណាក់កាលដំបូងក្រោយថ្ងៃរំដោះ៧ មករា ១៩៧៩។

ក្នុងនាមថ្នាក់ដឹកនាំ និងមន្ត្រីរាជការទាំងអស់ លោកវេជ្ជបណ្ឌិត គួង ឡូ បានចូលរួមរំលែកទុក្ខយ៉ាងក្រៀមក្រំបំផុតជាមួយក្រុមគ្រួសារសព និងបានបួងសួងសូមឱ្យដួងវិញ្ញាណក្ខន្ធលោក មាស លៀង បានទៅកាន់សុគតិភព កុំបីឃ្លៀងឃ្លាតឡើយ៕