(សៀមរាប)៖ លោក យឿន ចាន់ អនុប្រធានមន្ទីរព័ត៌មានខេត្តសៀមរាប បានអំពាវនាវដល់អ្នកផលិតមាតិកា (Content Creators) ទាំងអស់ សូមបង្កើនការយកចិត្តទុកដាក់ខ្ពស់ក្នុងការផ្សព្វផ្សាយព័ត៌មានពិត នឹងត្រូវចៀសវាងដាច់ខាតនូវការចែកចាយព័ត៌មានក្លែងក្លាយ (Fake News) ឬព័ត៌មានដែលគ្មានប្រភពច្បាស់លាស់ ដែលអាចបង្កផលប៉ះពាល់ដល់សង្គម។

ការអំពាវនាវយ៉ាងដូច្នេះរបស់លោកលោក យឿន ចាន់ នៅក្នុងជំនួបជួបសំណេះសំណាលជាមួយអ្នកផលិតមាតិកាក្នុងខេត្តសៀមរាប នាថ្ងៃទី២២ ខែមិថុនា ឆ្នាំ២០២៦នេះ នៅសាលប្រជុំរបស់មន្ទីរព័ត៌មានខេត្ត ដោយមានការចូលរួមពីមន្រ្តីនៃមន្ទីរព័ត៌មានខេត្ត និងផលិតមាតិកា (Content Creators)។

លោកបានបន្តថា ការផ្សព្វផ្សាយក្នុងប្រព័ន្ធបច្ចេកវិទ្យា គឺពិតជាសំខាន់ និងជាផ្នែកមួយនៃការលើកស្ទួយសេដ្ឋកិច្ចនៅក្នុងតំបន់ ដែលអាចទាក់ទាញប្រជាពលរដ្ឋក្នុងមូលដ្ឋាន ឬក្រៅមូលដ្ឋាន ដើម្បីទទួលបាននូវផលប្រយោជន៍ ក៏ដូចជាផ្ដល់គំនិត និងឱកាសការងារសម្រាប់បងប្អូនប្រជាពលរដ្ឋក្នុងការបង្កើតមុខរបរអាជីវកម្ម សិប្បកម្ម ឬកសិកម្មជាដើម ហើយវាក៏ជួយផ្ដល់ឱកាសការងារជូនបងប្អូនប្រជាពលរដ្ឋភៀសសឹក និងពលករចំណាកស្រុកដែលវិលត្រឡប់មកក្នុងប្រទេសកម្ពុជាវិញ។

លោកអនុប្រធានមន្ទីរព័ត៌មាន បន្ថែមថា នៅក្នុងការផលិតមាតិកា គោលបំណងចម្បង គឺដើម្បីឱ្យប្រជាពលរដ្ឋយល់ដឹង បំផុសគំនិតបង្កើតការងារដោយខ្លួនឯង ក៏ដូចជាជួយបង្កើនការងារដល់ប្រជាពលរដ្ឋខ្វះខាតក្នុងមូលដ្ឋានផងដែរ ជាពិសេសវាក៏រួមចំណែកយ៉ាងសំខាន់ក្នុងការកាត់បន្ថយការនាំចូលនូវផលិតផលក្រៅស្រុកផងដែរ។

លោកបញ្ជាក់ថា ក្នុងខែកក្កដាខាងមុខ លោកក៏បានស្នើសុំដល់អ្នកផលិតមាតិកាទាំងអស់ក្នុងខេត្ត ចូលរួមនូវយុទ្ធនាការប្រយុទ្ធប្រឆាំងព័ត៌មានក្លែងក្លាយ ដើម្បីឱ្យអ្នកផលិតមាតិកាចូលរួមផ្សព្វផ្សាយយុទ្ធនាការនេះ ក្នុងកិច្ចការជំរុញបន្ថែមឱ្យប្រជាពលរដ្ឋយល់ច្បាស់អំពីអ្វីដែលជាព័ត៌មានពិត ឬមិនពិត។

ជាមួយនេះដែរ លោកអនុប្រធានមន្ទីរ ក៏បានថ្លែងអំណរគុណដល់ប្អូនអ្នកផលិតមាតិកាទាំងអស់ ចំពោះការខិតខំប្រឹងប្រែងផ្សព្វផ្សាយមាតិកាល្អៗ និងសមិទ្ធផលរបស់ខេត្តសៀមរាប និងបានជំរុញបន្ថែមឱ្យមានកិច្ចសហការជាមួយមន្ទីរព័ត៌មាន ដើម្បីពង្រឹងឥទ្ធិពលនៃការផ្សព្វផ្សាយមាតិកាល្អៗ ជូនដល់តម្រូវការប្រជាពលរដ្ឋ និងសាធារណជនទូទៅ៕