(ក្រចេះ)៖ ការចូលរួមរបស់អាជ្ញាធរមូលដ្ឋានគឺមិនបោះ បង់ចោលគ្នានោះទេ មានសុខរួមសុខ មានទុក្ខរួមទុក្ខ។ នេះជាការលើកឡើងរបស់លោក សន ស៊ីដែន អភិបាលរងស្រុកចិត្របុរី នៅក្នុងសកម្មភាពចុះសួរសុខទុក្ខនិងនាំយកសម្ភារៈ ជួយសាងសង់ផ្ទះជូនប្រជាពលរដ្ឋ មួយគ្រួសារដែលរងគ្រោះដោយសារខ្យល់កន្ត្រាក់ កាលពីពេលថ្មីៗកន្លងទាំងនេះ។

ផ្ទះរបស់ប្រជាពលរដ្ឋមួយគ្រួសាររស់នៅភូមិសំពុង ឃុំថ្មរអណ្តើក ស្រុកចិត្របុរី ខេត្តក្រចេះ បានរងផលប៉ះពាល់រលំផ្ទះ ដោយសារខ្យល់កន្ត្រាក់បោកបក់ កាលពីសប្តាហ៍កន្លងទៅបណ្ដាលឱ្យរងការខូចខាតទាំងស្រុង។

តាមប្រភពពីអាជ្ញាធរមូលដ្ឋានបានឲ្យដឹងថា ក្រុមគ្រួសារខាងលើ មានជីវភាពលំបាក ប្ដីទៅស៊ីឈ្នួលធ្វើការឲ្យគេនៅក្រុមហ៊ុន ចំការចេក រីឯប្រពន្ធនៅផ្ទះមើលថែទាំកូនម្នាក់
ក្រោយពេលជួបការរងគ្រោះដោយខ្យល់កន្ត្រាក់ គ្រួសារមួយនេះមិនទាន់មានលទ្ធភាពនៅក្នុងការសាងសង់ផ្ទះឡើងវិញដើម្បីជាទីជម្រកសម្រាប់ក្រុមគ្រួសារគាត់នៅឡើយ តែដោយសារការយកចិត្តទុកដាក់របស់អាជ្ញាធរមូលដ្ឋាន រួមនឹងសប្បុរសជន បានចូលរួមឧបត្ថម្ភគាំទ្រ ទាំងសម្ភារៈថវិកានិងកម្លាំងកាយចិត្តដើម្បីជួយជ្រុំជ្រែងនិងសាងសង់ផ្ទះឡើងវិញ។

ជាក់ស្ដែងនៅថ្ងៃទី២២ ខែមិថុនា ឆ្នាំ២០២៦ លោកអភិបាលរងស្រុកចិត្របុរី តំណាងលោក យិន វណ្ណៈអភិបាលស្រុក បានដឹកនាំក្រុមការងារ អាជ្ញាធរភូមិឃុំ នាំយកស័ង្កសីចំនួន៤០សន្លឹក រួមសំភារៈមួយចំនួនទៀតដែលបានមកពីសប្បុរសជន ជូនដល់ក្រុមគ្រួសាររងគ្រោះខាងលើ ដើម្បីសាងសង់ផ្ទះ ដោយមានការជ្រុំជ្រែងទាំងកម្លាំងកាយចិត្តពីប្រជាពលរដ្ឋក្នុងភូមិ ជាច្រើនអ្នក ផ្សេងទៀតជួយសាងសង់។

លោក អម ចាន់ពក និងអ្នកស្រី ចុង លី បានថ្លែងអំណរ គុណយ៉ាងជ្រៅជ្រៅចំពោះអាជ្ញាធរភូមិឃុំ និងស្រុកចិត្របុរី ដែលបានជួយឧបត្ថម្ភសំភារៈទាំងនេះសម្រាប់ការសាងសង់ផ្ទះសម្រាប់ស្នាក់នៅឡើងវិញ លោកថា ការចូលរួមពីសំណាក់ព្រះសង្ឃ អាជ្ញាធរភូមិឃុំ/ស្រុកចិត្របុរី ពិតជាបានរួម ចំណែកយ៉ាងធំធេងក្នុងការសម្រាលទុក្ខលំបាក និងជួយឱ្យក្រុមគ្រួសារមួយនេះមានជម្រកស្នាក់នៅសមរម្យ និងមានសុវត្ថិភាពឡើងវិញបានយ៉ាងឆាប់រហ័ស៕