(ស្វាយរៀង)៖ លោកស្រី ភន មុំ អនុប្រធានមន្ទីរកសិកម្មរុក្ខាប្រមាញ់និងនេសាទខេត្តស្វាយរៀង បានលើកឡើងថា នៅក្នុងបរិបទនៃការអភិវឌ្ឍសេដ្ឋកិច្ច និងសង្គមរបស់ប្រទេសកម្ពុជា ការផលិតស្បៀងអាហារមានសុវត្ថិភាព និងគុណភាពខ្ពស់ គឺជាកត្តាចាំបាច់សម្រាប់ការលើកកម្ពស់សុខុមាលភាពប្រជា ពលរដ្ឋ និងការអភិវឌ្ឍវិស័យកសិកម្មប្រកបដោយនិរន្តរភាព។

ការលើកឡើងបែបនេះរបស់ លោកស្រី ភន មុំ បានធ្វើឡើងនៅពិធីទិវាជំនួបអ្នកប្រើប្រាស់ ប្រធានបទ៖ «ពង្រឹងការយល់ដឹងរបស់អ្នកប្រើប្រាស់អំពីកសិផលសុវត្ថិភាព ដែលផលិតតាមការអនុវត្តកសិអេកូឡូស៊ី»។

កម្មវិធីនេះ បានសហការរៀបចំដោយ អង្គការឌីភីអេ អង្គការហ្គ្រេត សមាគមសហព័ន្ធកសិករកម្ពុជានៃអ្នកផលិត កសិកម្ម (CFAP Cambodia) និងសមាគមនិរន្តភាពដីជីវិត (SSLA) ដោយមានការគាំទ្រពីអង្គការ Uni4Coop នៅបរិវេណនៃសួនទន្លេវ៉ៃគោ ក្នុងទីរួមខេត្តស្វាយរៀង។

លោកស្រី ភន មុំ បានបញ្ជាក់ថា៖ «ទិវាជំនួបអ្នកប្រើប្រាស់ ក្រោមប្រធានបទ «ពង្រឹងការយល់ដឹងរបស់អ្នកប្រើប្រាស់អំពី កសិផលសុវត្ថិភាព ដែលផលិតតាមការអនុវត្តកសិអេកូឡូស៊ី» ក្នុងបរិបទនៃការអភិវឌ្ឍសេដ្ឋកិច្ច និងសង្គមរបស់ប្រទេសកម្ពុជា ការផលិតស្បៀងអាហារមានសុវត្ថិភាព និងគុណភាពខ្ពស់ គឺជាកត្តាចាំបាច់សម្រាប់ការលើកកម្ពស់សុខុមាលភាពប្រជា ពលរដ្ឋ និងការអភិវឌ្ឍវិស័យកសិកម្មប្រកបដោយនិរន្តរភាព។ កសិអេកូឡូស៊ី ដែលពីមុនយើងច្រើនហៅគឺជាវិធីសា ស្ត្រដ៏មានសារៈសំខាន់ដែលជួយកាត់បន្ថយការប្រើប្រាស់សារធាតុគីមី បង្កើនជីជាតិដី ថែរក្សាបរិស្ថាន និងធានា សុវត្ថិភាពស្បៀងអាហារសម្រាប់អ្នកប្រើប្រាស់»។

លោកស្រីបានបន្ដថា មន្ទីរកសិកម្ម ខេត្តស្វាយរៀង បាននិងកំពុងជំរុញការអនុវត្តកសិកម្មនិរន្តរភាព ការផលិត ដំណាំសុវត្ថិភាព ការអនុវត្តស្តង់ដារ GAP និងប្រព័ន្ធធានាគុណភាពដោយការចូលរួម (PGS) ដើម្បីធានាថា ផលិតផលកសិកម្មដែលផលិតនៅក្នុងខេត្តមានគុណភាពល្អ សុវត្ថិភាព និងអាចប្រកួតប្រជែងនៅលើទីផ្សារបាន។ តាមរយៈការរៀបចំពិព័រណ៍ផលិតផល ការភ្ជាប់ទីផ្សាររវាងកសិករ និងអ្នកទិញ ការផ្សព្វផ្សាយផលិតផលក្នុងស្រុក និងការគាំទ្រការកសាងម៉ាកសញ្ញាផលិតផល មន្ទីរពាណិជ្ជកម្មបានរួមចំណែក យ៉ាងសំខាន់ក្នុងការបង្កើនតម្លៃបន្ថែម និងប្រាក់ចំណូលរបស់កសិករ។

រាជរដ្ឋាភិបាលកម្ពុជា បានចាត់ទុកវិស័យកសិកម្មជាវិស័យអាទិភាពសម្រាប់ការអភិវឌ្ឍជាតិ និងបានបន្តគាំទ្រកសិករ តាមរយៈការផ្តល់សេវាកម្មបច្ចេកទេស ការអភិវឌ្ឍហេដ្ឋារចនាសម្ព័ន្ធកសិកម្ម ការពង្រឹងខ្សែច្រវាក់តម្លៃ និងការពង្រីក ទីផ្សារសម្រាប់ផលិតផលកសិកម្ម។ លោកស្រីក៏សូមបញ្ជាក់ជាថ្មីនូវការប្តេជ្ញាចិត្តយ៉ាងមុតមាំក្នុង ការបន្តគាំទ្របងប្អូនកសិករ និងការអភិវឌ្ឍផលិតផលកសិកម្មប្រកបដោយគុណភាព សុវត្ថិភាព និងនិរន្តរភាព។

ជាថ្មីម្ដងទៀត លោកស្រី បានបន្ថែមថា ជាពិសេសយើងនឹងបន្តជំរុញការផ្សារភ្ជាប់ការអភិវឌ្ឍផលិតផលកសិកម្មជាមួយយុទ្ធនាការជាតិ «ភូមិ មួយ ផលិតផល» (One Village One Product-OVOP) ដើម្បីលើកកម្ពស់អត្តសញ្ញាណផលិតផលក្នុងមូលដ្ឋាន បង្កើនតម្លៃផលិតផល និងពង្រីកឱកាសទីផ្សារសម្រាប់សហគមន៍កសិកម្ម។ យើងជឿជាក់ថា តាមរយៈការចូលរួមពីគ្រប់ភាគីពាក់ព័ន្ធ រួមមានស្ថាប័នរដ្ឋ អង្គការដៃគូ វិស័យឯកជន កសិករ និង អ្នកប្រើប្រាស់ យើងនឹងអាចកសាងប្រព័ន្ធស្បៀងអាហារ ដែលមានសុវត្ថិភាព បរិស្ថានបៃតង និងសេដ្ឋកិច្ចជនបទ ដែលរឹងមាំសម្រាប់ប្រទេសកម្ពុជា៕