(បរទេស)៖ ព្រឹត្តិការណ៍បាល់ទាត់ពានរង្វាន់ជើងឯកពិភពលោក FIFA World Cup 2026 បានរកឃើញ ៦ក្រុមផ្លូវការ ហើយ ដើម្បីឆ្លងទៅវគ្គ ៣២ក្រុម ក្រោយដំណើរការប្រកួតជុំទី២ សន្សំពិន្ទុតាមពូលរបស់ពួកគេរួចមក ដោយក្នុងនោះក៏មានម្ចាស់ផ្ទះមិចស៊ិក និងសហរដ្ឋអាមេរិកផងដែរ។

ម្ចាស់ផ្ទះមិចស៊ិក ជាក្រុមដំបូងគេដែលបានធានាកៅអីទៅវគ្គចាញ់-ធ្លាក់មុនគេនៃពូល A បន្ទាប់ពីសហរដ្ឋអាមេរិក ឈរទីកំពូលតារាងនៃពូល D ក៏បានរួមដំណើរទៀតផង ក្នុងនាមក្រុមនៅតំបន់អាមេរិកខាងជើង (Concacaf) ដូចគ្នា។

ដូចគ្នានោះដែរ អាល្លឺម៉ង់ដែលជាជើងឯក World Cup ៤សម័យកាល ក៏បានធានាកៅអីទៀតផង ក្រោយឈ្នះ ២លើកជាប់គ្នាឈរទីកំពូលតារាងនៃពូល H នៅពេលមាន់គកបារាំង និងន័រវេស ក៏បានកក់កៅអីវគ្គបន្តដូចគ្នា ក្រោយជ័យជម្នះជាលើកទី២ នាព្រឹកថ្ងៃអង្គារ ទី២៣ ខែមិថុនានេះ ក្នុងនាមក្រុមខ្លាំងនៅតំបន់អឺរ៉ុប (UEFA)។

ចំណែកឯពពកសអាហ្សង់ទីន ម្ចាស់ការពារតំណែងជើងឯក World Cup 2022 មកពីតំបន់អាមេរិកឡាទីន (CONMEBOL) ក៏បានកក់កៅអីទៅវគ្គ ៣២ក្រុម នៅពេលរកបាន ៦ពិន្ទុពេញ ឈរកំពូលតារាងនៃពូល J ដាច់។

គូរបញ្ជាក់ផងថា ក្រុមកំពូលតារាងចាប់ពីលេខ១-២ តាមបណ្តាពូលនីមួយៗទាំង ១២ពូល (A-L) ត្រូវជ្រើសរើសឡើង វគ្គ ៣២ក្រុម នៅពេលក្រុមលេខ៣ ល្អចំនួន ៨ក្រុម ក៏នឹងត្រូវជ្រើសរើសបំពេញវគ្គនេះដែរ។ ការប្រកួតសន្សំពិន្ទុដោយ ១ក្រុមត្រូវលេង ៣ប្រកួតនោះ នឹងបន្តរហូតដល់ថ្ងៃទី២៨ ខែមិថុនា ឆ្នាំ២០២៦៕