(បរទេស)៖ ក្រុមមកពីតំបន់អាហ្រ្វិក អាល់ហ្សេរី បានធ្វើឱ្យក្តីសង្ឃឹមរស់ឡើងវិញ ក្រោយពេលវាយបកឈ្នះក្រុមអាស៊ី ហ្ស៊កដានី ២-១ នាព្រឹកថ្ងៃអង្គារនេះ នៃការប្រកួតទី២ ប្រចាំពូល J នៅពាន World Cup 2026 ដែលមានសហរដ្ឋអាមេរិក មិចស៊ិក និងកាណាដា។

៣ពិន្ទុលើកដំបូងនេះដែរ បានញាំងឱ្យអាល់ហ្សេរី ដែលមានប្រធានក្រុម Riyad Mahrez ឈរលេខ៣ ស្នើនឹងក្រុមលេខ២ អូទ្រីស នៅពេលអាហ្សង់ទីន ម្ចាស់ការពារតំណែងជើងឯកឈរទីកំពូលតារាងដាច់ ដោយមាន ៦ពិន្ទុឆ្លងទៅវគ្គ ៣២ក្រុម។

ក្នុងការប្រកួត ៩០នាទីពេញនៅឯកីឡដ្ឋានស្ថិតទីក្រុង California សហរដ្ឋអាមេរិក អាល់ហ្សេរីដែលបានចាញ់ អាហ្សង់ទីន ៣-០ នៅថ្ងៃបើកឆាកពូល J បានរបូត ១គ្រាប់ និងជាការនាំមុខរបស់គូប្រជែងហ្ស៊កដានីផងដែរ នៃវគ្គទី១ រយៈពេល ៤៥នាទី មុនពេលពួកគេវាយបកតាមស្មើនៅនាទី៦៩ និងគ្រាប់ជ័យជម្នះ ៣ពិន្ទុកើតឡើងនៅនាទី៨២។

អាល់ហ្សេរី ត្រូវប៉ះក្រុមនៅតំបន់អឺរ៉ុប អូទ្រីស ស្របពេលអាហ្សង់ទីន ត្រូវជួបហ្ស៊កដានី ដែលទើបឡើងមកលេង World Cup 2026 លើកដំបូងនាម៉ោង ៩ព្រឹកដំណាលគ្នាតែម្តងនៅថ្ងៃអាទិត្យ ទី២៨ ខែមិថុនា ឆ្នាំ២០២៦ (ម៉ោងនៅកម្ពុជា) ដើម្បីប្រជែងយកចំណាត់ថ្នាក់លេខ២ ឬលេខ៣ ល្អ ក្នុងការឆ្ពោះទៅវគ្គ ៣២ក្រុមជាបន្តទៀត៕