(ព្រះវិហារ)៖ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ នៅថ្ងៃទី២២ ខែមិថុនា ឆ្នាំ២០២៦ បានអញ្ជើញជាអធិបតី បើកវគ្គបណ្តុះបណ្តាលស្តីពីការព្យាបាល និងថែទាំជំងឺគ្រុនឈាម ក្នុងគោលបំណងពង្រឹងសមត្ថភាពបច្ចេកទេស និងបង្កើនប្រសិទ្ធភាពក្នុងការផ្តល់សេវាថែទាំ និងព្យាបាលអ្នកជំងឺគ្រុនឈាមប្រកបដោយគុណភាព និងសុវត្ថិភាព។

វគ្គបណ្តុះបណ្តាលនេះ ត្រូវបានរៀបចំធ្វើឡើងតាមប្រព័ន្ធ Zoom ដោយមានការធ្វើបទបង្ហាញពីក្រុមវេជ្ជបណ្ឌិតជំនាញមកពីមន្ទីរពេទ្យកុមារអង្គរ និងមន្ទីរពេទ្យជ័យវរ្ម័នទី៧ ព្រមទាំងមានការចូលរួមពីមន្ត្រីសុខាភិបាល និងម្ចាស់សេវាសុខាភិបាលឯកជននៅទូទាំងខេត្តព្រះវិហារ សរុបចំនួន ២៤៦នាក់។

ថ្លែងក្នុងពិធីបើកវគ្គបណ្តុះបណ្តាលនាឱកាសនេះ លោកវេជ្ជបណ្ឌិត គួង ឡូ បានថ្លែងផ្តល់អនុសាសន៍ និងការណែនាំដល់ម្ចាស់សេវាសុខាភិបាលឯកជនទាំងអស់ ឱ្យប្រកាន់ខ្ជាប់នូវក្រមសីលធម៌វិជ្ជាជីវៈសុខាភិបាល និងអនុវត្តការព្យាបាលដោយគោរពតាមស្តង់ដារបច្ចេកទេសឱ្យបានត្រឹមត្រូវ។ ជាមួយគ្នានេះ ត្រូវបង្កើនកិច្ចសហការជាមួយមន្ទីរសុខាភិបាលខេត្ត ដោយបញ្ជូនអ្នកជំងឺដែលសង្ស័យមានជំងឺគ្រុនឈាមទៅកាន់មន្ទីរពេទ្យបង្អែកឱ្យបានទាន់ពេលវេលា។

លោកប្រធានមន្ទីរសុខាភិបាលខេត្តព្រះវិហារ ក៏បានថ្លែងបញ្ជាក់ផងដែរថា ចំពោះគ្រឹះស្ថានសុខាភិបាលឯកជនដែលមានលទ្ធភាពព្យាបាលអ្នកជំងឺគ្រុនឈាមនៅតាមគ្លីនិករបស់ខ្លួន ត្រូវមានលក្ខណៈសម្បត្តិគ្រប់គ្រាន់ ដូចជា មានគ្រូពេទ្យជំនាញ បុគ្គលិកមានសមត្ថភាពបច្ចេកទេស និងមានមន្ទីរពិសោធន៍សម្រាប់តាមដានស្ថានភាពអ្នកជំងឺជាដើម។

ជាមួយគ្នានេះ លោកវេជ្ជបណ្ឌិត គួង ឡូ ក៏បានអំពាវនាវដល់ម្ចាស់សេវាសុខាភិបាលឯកជនទាំងអស់ ឱ្យបង្កើនការប្រុងប្រយ័ត្នខ្ពស់ចំពោះករណីសង្ស័យជំងឺគ្រុនឈាម និងត្រូវបញ្ជូនអ្នកជំងឺទៅកាន់មន្ទីរពេទ្យឱ្យបានឆាប់រហ័ស ដើម្បីជៀសវាងហានិភ័យដែលអាចបង្កគ្រោះថ្នាក់ដល់អាយុជីវិត។ទន្ទឹមនឹងនេះ ត្រូវផ្តល់ព័ត៌មានដល់ប្រជាពលរដ្ឋប្រកបដោយវិជ្ជាជីវៈ និងមិនត្រូវបង្កការភ័យខ្លាច ឬធ្វើឱ្យប្រជាពលរដ្ឋមានការព្រួយបារម្ភហួសហេតុនោះឡើយ។

លោកវេជ្ជបណ្ឌិត គួង ឡូ បានថ្លែងអំពាវនាវឱ្យមន្ត្រីសុខាភិបាល និងម្ចាស់សេវាសុខាភិបាលឯកជនទាំងអស់ បន្តរួមសហការគ្នាឱ្យកាន់តែជិតស្និទ្ធ ដើម្បីលើកកម្ពស់គុណភាពសេវាសុខាភិបាល និងរួមចំណែកការពារសុខភាពប្រជាពលរដ្ឋ ជាពិសេសកុមារ ក្នុងខេត្តព្រះវិហារ ឱ្យទទួលបានសេវាព្យាបាលប្រកបដោយប្រសិទ្ធភាព និងសុវត្ថិភាពខ្ពស់៕