(បរទេស)៖ ក្រោយក្លាយជាឪពុកគេ ខ្សែបម្រើស្លាប Manchester City គឺ Jeremy Doku វិលត្រឡប់ទៅរួមក្រុម ជម្រើសជាតិប៊ែលហ្ស៊ិកលេងនៅ World Cup 2026 ភ្លាមៗផងដែរ។ នេះបើយោងតាមការចេញផ្សាយដោយ BBC។

Doku ដែលបានចាត់ទុកគ្រួសារ គឺជាជម្រើសទី១ នោះ បានចាកចេញពីជំរំហ្វឹកហាត់ក្រុមបិសាចក្រហមអឺរ៉ុប ប៊ែលហ្ស៊ិក ដើម្បីជិះយន្តហោះមកកាន់អង់គ្លេសមើលភរិយាឆ្លងទន្លេកាលពីពេលថ្មីៗនេះ បើទោះបីជាការធ្វើដំណើរដ៏វែងអន្លាយ និងទទួលបានការរិះខ្លាំងក៏ដោយ។

នៅចាំបានថា Doku ដែលផ្លាស់ចេញពីក្លិប Rennes ទៅចូលរួមជាមួយមេឃខៀវ Man City កាលឆ្នាំ២០២៣ ក្នុងតម្លៃខ្លួន ៥៥.៤លានផោន លេងបាន ៨៦នាទីផងដែរជាមួយប៊ែលហ្ស៊ិកនៅថ្ងៃបើកឆាក World Cup 2026 របស់ពួកគេនៅសហរដ្ឋអាមេរិក ដែលបញ្ចប់ក្នុងលទ្ធផលស្មើគ្នា ១-១ ទល់នឹងអេហ្ស៊ីបនៃពូល G មុនពេលអវត្តមាន ពេលប៉ះអ៉ីរ៉ង់ បញ្ចប់ក្នុងលទ្ធផល ០-០ ដោយសារទៅទទួលចំណងដៃកូនប្រុស Praise។

នៅក្នុងសេចក្តីថ្លែងការណ៍របស់ប៊ែលហ្ស៊ិក ក៏បានឯកភាពពីសំណាក់គ្រូបង្វឹក និងវេជ្ជបណ្ឌិតផងដែរ ដើម្បីឱ្យ Doku បានទៅមើលភរិយាឆ្លងទន្លេ។ Doku នឹងចូលរួមជាមួយក្រុមឡើងវិញនាថ្ងៃអង្គារនេះ ក្នុងការហ្វឹកហាត់ជុំគ្នាត្រៀមប្រកួតទល់នឹងណូវែលហ្សេឡង់ នៅក្នុងរដ្ឋ Seattle ដើម្បីប្រកួតបិទបញ្ចប់ពូល G៕