(ភ្នំពេញ)៖ និស្សិត៦៥រូប មកពីសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច បានចូលរួមក្នុងយុទ្ធនាការ រដូវការបៃតង និងធ្វើសកម្មភាពដែលចូលរួមចំណែក ក្នុងការលើកកម្ពស់ការអភិវឌ្ឍ ប្រកបដោយចីរភាព តាមរយៈដំណើរទស្សនកិច្ចសិក្សា ៤ថ្ងៃក្រោមប្រធានបទ៖ «បណ្តុះស្មារតីយុវជន លើកកម្ពស់ការអប់រំ និងទេសចរណ៍ ដើម្បីការអភិវឌ្ឍន៍ប្រកបដោយនិរន្តភាព»។

យោងតាមកញ្ញា លី ល័ងស៊ីម ជានិស្សិតឆ្នាំទី៤ ដែលជាអ្នករៀបចំគម្រោងដំណើរទស្សនកិច្ចសិក្សា «Éco Legacy Study Trip 2026» បានឱ្យដឹងថា ដំណើរទស្សនកិច្ចរយះពេល ៤ថ្ងៃ ៣យប់នេះ បានប្រព្រឹត្តទៅចាប់ពីថ្ងៃទី ២៨ ខែឧសភា រហូតដល់ថ្ងៃទី៣១ ខែឧសភា ឆ្នាំ២០២៦ ក្នុងគោលបំណង ដើម្បីលើកកម្ពស់ការយល់ដឹង បណ្តុះស្មារតីកុមារដោយផ្តល់តម្លៃលើការសិក្សា ព្រមទាំងមានការស្តារសកម្មភាពទេសចរណ៍ក្នុងស្រុកឡើងវិញ ដោយចូលរួមផ្សព្វផ្សាយពីគោលដៅទេសចរណ៍អេកូឡូស៊ី និងជំរុញសេដ្ឋកិច្ចសហគ្រាសក្នុងសហគមន៍។បន្ថែមពីនេះទៅទៀត ក៍ផ្សារភ្ជាប់ទំនាក់ទំនងរវាងសហគមន៍ និងយុវជន និងចូលរួមបង្កើតផលវិជ្ជមានជានិរន្តភាព ទៅកាន់ខេត្ត កំពង់ស្ពឺ កោះកុង និងព្រះសីហនុ។

តាមរយៈដំណើរការទស្សនកិច្ចសិក្សានេះ និស្សិត ៦ រូប បានចូលរួមនូវសកម្មភាពមួយចំនួនដូចជា៖ សកម្មភាពសប្បុរសធម៌ដែលបាន ចែកជូនសម្ភារៈសិក្សាដល់សិស្សសាលាព្រៃជុំចំនួន ២៧៦នាក់ ទឹកសុទ្ធ Hi- Tech សម្ភារៈក្នុងការិយាល័យ និងធុងសំរាមរបស់ Green Miracle ដែលត្រូវបានកែច្នៃឡើងវិញពីប្លាស្ទិក និងឧបត្ថមទឹកប្រាក់មួយចំនួនជូនទៅតំណាងសាលា។

បន្ថែមពីនេះទៅទៀតក៍មានការចែករំលែកចំណេះដឹងអំពីផលប៉ះពាល់នៃប្លាស្ទិក ក្រោមការសហការជាមួយ Green miracle ទៅកាន់សិស្សានុសិស្ស ចាប់ពីទីមត្តេយ្យដល់ថ្នាក់ទី ៥ នៅសាលាព្រៃជុំ ក្នុងខេត្តកំពង់ស្ពឺ។

សកម្មភាពចែករំលែកចំណេះដឹងមានដូចជា៖ ចែករំលែកពីប្រវត្តិនៃប្លាស្ទិក ផលប៉ះពាល់ប្លាស្ទិកទៅកាន់ទឹក ដី និងអាកាសធាតុ និងការណែនាំពី”យុទ្ធនាការ ៤ក «របស់ក្រសួងបរិស្ថានដូចជា៖ ការបដិសេធ, ការកាត់បន្ថយ, ការប្រើប្រាស់ឡើងវិញ និងការកែច្នៃ» ដើម្បីចូលរួមកាត់បន្ថយសំណល់ប្លាស្ទិក ដែលអាចធ្វើឱ្យប៉ះពាល់ដល់ការប្រែប្រួលអាកាសធាតុ។ បន្ទាប់មកបន្តដំណើរទៅកាន់ អង្គការសមាគមន៍ក្តីសង្ឃឹមរបស់ជនក្រីក្រ (Hopeful Association of the Poor) តាមរយ: ការបរិច្ចាគសម្ភារៈសិក្សា,គ្រឿងឧបភោគទឹក សម្ភារៈចាំបាច់ផ្សេងៗនិងថវិកាដើម្បីចូលរួម គាំទ្រទៅមណ្ឌល ជំរុញការអភិវឌ្ឍចំណេះដឹង និងបង្កើតឱកាសសម្រាប់កុមារដែលកំពុងត្រូវការការគាំទ្រ ការលើកកម្ពស់អាហារូបត្ថម្ភ អនាម័យដែលជួយបង្កើនសុខមាលភាពរបស់កុមារ។

និស្សិតក្រុមនេះនាថ្ងៃទី២៩ បានរៀបចំកម្មវិធីហ្គេម Team Building នៅលើកោះសាវាដែលមានការចូលរួមរវាងនិស្សិតឆ្នាំ២,៣,៤ និងអតីតនិស្សិតដោយហ្គេមនេះចែកចេញជា៩ក្រុម ដោយក្រុមនីមួយៗ ត្រូវបំពេញ Mission ចំនួន៥ទីតាំងដែលមាននៅក្នុងផែនទីដោយកន្លែងនីមួយៗមានដូចជា ៖ ការឆ្លើយសំណួរអំពីសមាជិកក្រុមនីមួយៗ (Answer the question) ការដោះសោរ (Unlock the key) ការថតរូបតាមគំរូ (Group Photo replication ) ការនិយាយពាក្យដដែលកុំឲខុស (Repeat Word) និងការដោះប្រាស្នា(Solve the riddle game) ក្នុងគោលបំណងផ្សាភ្ជាប់ទំនាក់ទំនងរបស់និស្សិត ទាំង៣ជំនាន់ និងអតីតនិស្សិត និងបណ្តុះជំនាញទន់តាមរយ:ការទំនាក់ទំនងក្នុងក្រុម, ការធ្វើការងារជាក្រុម និងការប្រើប្រាស់យុទ្ធសាស្រ្តក្នុងការដោះស្រាយបញ្ហា ដែលជាការហ្វឹកហាត់ដល់និស្សិតឱ្យមានជំនាញទន់ និងការអភិវឌ្ឍខ្លួននាពេលអនាគត។

បើតាមកញ្ញា លី ល័ងស៊ីម គោលដៅចុងក្រោយនៃដំណើរទស្សនៈកិច្ចនេះគឺនៅសាលាអង្គរភ្នំខ្លុង នៅខេត្តកោះកុង និស្សិតបានចូលរួមធ្វើសកម្មភាព “យុទ្ធនាការដាំដើមឈើតាមដងផ្លូវនិងក្នុងសាលា” ។ យុទ្ធនាការនេះគឺជាការចូលរួមចំណែកការពារបរិស្ថាននិងថែរក្សាដំណើរការប្រព័ន្ធអេកូឡូស៊ីក្នុងសហគមន៍ដែលផ្តល់ផលប្រយោជន៍រួមទាំងសុខភាពនិងហេដ្ឋារចនាសម្ព័ន្ធដល់ប្រជាពលរដ្ឋនិងសិស្សានុសិស្សប្រកបដោយនិរន្តភាព។

គួរបញ្ចាក់ថាដំណើរទស្សនកិច្ចសិក្សានេះមានការគាំទ្រពីដេប៉ាតឺម៉ង់បារាំងផ្នែកសេដ្ឋកិច្ច និងគ្រប់គ្រងនៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច រួមទាំងក្រសួងទេសចរណ៍ (យុទ្ធនាការ ទស្សនាកម្ពុជានៅរដូវកាលបៃតង), សាលាភូមិន្ទរដ្ឋបាល (ERA), ក្រុមអតីតនិស្សិត Filière Éco អាជ្ញាធរខេត្តកំពង់ស្ពឺ និងមន្ទីរក្រសួងទេសចរណ៍ខេត្តកោះកុង ក៏ដូចជាស្ថាប័ននានា KMH Foundation (កម្មវិធី CSR របស់ ISI GROUP), ក្រុមហ៊ុនមូលបត្រ រ៉ូយ៉ាល់គ្រុប ម.ក, ក្រុមហ៊ុនទឹកពិសា ហាយ-ធិច, Indomie Cambodia, Bright Cow, AOFEI New Energy, RS Residence, Green Miracle, ស៊ីស៊ីថាមស៍, RULErs, អាឡាដាំង, គ្មានទេសំរាម, Sabay Newsនិង ឱកាស- Oppotunities។

ដំណើរទស្សនកិច្ចសិក្សានេះមានសារៈសំខាន់ណាស់ដោយវាជាមធ្យោបាយដ៍ល្អក្នុងការបណ្តុះស្មារតីយុវជនក្រោយពីការសិក្សាផ្ទាល់ក្នុងថ្នាក់និស្សិតបានចូលរួមអនុវត្តន៍សកម្មភាពដែលមានគោលដៅអភិវឌ្ឍន៍ប្រកបដោយចីរភាពដែលផ្តល់ផលប្រយោជន៍ទៅកាន់សហគមន៍វិញ និងបង្កើនការយល់ដឹងបន្ថែមពីសេដ្ឋកិច្ចជាតិ តាមរយៈតំបន់ទេសចរណ៍ក្នុងស្រុក ព្រមទាំងសារៈសំខាន់ នៃការពង្រឹងទំនាក់ទំនងរវាងយុវជន និងសហគមន៍៕