(ភ្នំពេញ)៖ គណៈប្រតិភូនៃសាកលវិទ្យាល័យគរុកោសល្យខេត្តយូណាន នៃសាធារណរដ្ឋប្រជាមានិតចិន បានអញ្ជើញមកបំពេញទស្សនកិច្ចនៅព្រះរាជាណាចកកម្ពុជា រយៈពេល៣ថ្ងៃ ចាប់ពីថ្ងៃទី២២ ដល់ថ្ងៃទី២៤ ខែមិថុនា ឆ្នាំ២០២៦។

ដំណើរទស្សនកិច្ចនេះធ្វើឡើងតបតាមការអញ្ជើញរបស់អង្គភាពប្រឆាំងអំពើពុករលួយ (អ.ប.ព.) នៃព្រះរាជាណាចក្រកម្ពុជា។

គណៈប្រតិភូ នៃសាកលវិទ្យាល័យគរុកោសល្យខេត្តយូណាន ដឹកនាំដោយលោក ស៊ុន ជៀន (Sun Jian) លេខានៃគណៈអធិការកិច្ចវិន័យបក្សកុម្មុយនីស្តចិន និងជាអធិការនៃសាកលវិទ្យាល័យគរុកោសល្យ ខេត្តយូណាន (YNNU) បានដឹកនាំសមាជិកប្រតិភូ ចំនួន ០៤រូប អញ្ជើញមកបំពេញទស្សនកិច្ចផ្លូវការនៅព្រះរាជាណាចក្រកម្ពុជា ក្នុងគោលបំណងចំនួនពីររួមមាន៖

*ទី១៖ ពិភាក្សាលើវិស័យ ប្រឆាំងអំពើពុករលួយ និងការបង្កើតប្រធានបទស្រាវជ្រាវរួមគ្នាប្រចាំឆ្នាំ ដើម្បីជំរុញការរួមបញ្ចូលគ្នារវាងបទពិសោធន៍ត្រួតពិនិត្យកិច្ចការរដ្ឋ និងអធិការកិច្ចវិន័យរបស់ចិន ជាមួយនឹងការអនុវត្តបន៍ជាក់ស្ដែងនៅកម្ពុជា ព្រមទាំងសិក្សាស្វែងយល់ពីស្ថានភាពនៃការអប់រំស្អាតស្អំ ក្នុងប្រព័ន្ធអប់រំជាតិរបស់កម្ពុជា

*ទី២៖ ចុះសិក្សាអំពីយន្តការការងារនៅ«ច្រកចេញចូលតែមួយ» ក្នុងរាជធានីភ្នំពេញ ដើម្បីសិក្សាស្វែងយល់ពីបទពិសោធន៍។

ជាក់ស្តែងលើការសម្របសម្រួលលើនីតិវិធីរដ្ឋបាល ការបង្កើន តម្លាភាពនៃសេវាសាធារណៈ ការអនុវត្តន៍គម្រោង និងការកសាងប្រព័ន្ធរដ្ឋាភិបាលឌីជីថល ព្រមទាំងប្រមូលចងក្រង នូវករណីសិក្សាគំរូផ្សេងៗ។

ក្នុងកម្មវិធីនៃដំណើរទស្សនកិច្ចនេះ គណៈប្រតិភូនៃសាកលវិទ្យាល័យគរុកោសល្យខេត្តយូណាន (YNNU នឹងអញ្ជើញចូលរួមប្រជុំពិភាក្សាការងារជាមួយ អ.ប.ព. ធ្វើទស្សនកិច្ចនៅសាកលវិទ្យាល័យភូមិន្ទភ្នំពេញ (RUPP) និងច្រកចេញចូល តែមួយនៃរដ្ឋបាលខណ្ឌទួលគោក ជំនួបទ្វេភាគីជាមួយការិយាល័យធុរកិច្ចខេត្តយូណាននៅកម្ពុជា ព្រមទាំងអញ្ជើញទៅទស្សនាព្រះបរមរាជវាំង។

សូមជម្រាបជូនផងដែរថា កន្លងមកសាកលវិទ្យាល័យ YNNU ធ្លាប់បានរៀបចំវគ្គបណ្តុះបណ្តាលសម្រាប់មន្ត្រី អ.ប.ព. នៅខេត្តយូណាន នៃសាធារណរដ្ឋប្រជាមានិតចិន ចំនួន៣វគ្គ ដែលមានសិក្ខាកាមជាមន្ត្រី អ.ប.ព. ចំនួន ៧៥រូប រួចមកហើយ។

សូមបញ្ជាក់ថា នេះជាទស្សនកិច្ចលើកទី៤ ដែលគណៈប្រតិភូខេត្តយូណាន អញ្ជើញមកទស្សនកិច្ចនៅព្រះរាជាណាចក្រកម្ពុជា ដែលតាមរយៈដំណើរទស្សនកិច្ចទាំងនេះបង្ហាញថា ប្រទេសទាំងពីរបាន និងបន្តរក្សាចំណងមិត្តភាពដែកថែបដ៏រឹងមាំ ដើម្បីឈានទៅរកការពង្រឹងនូវកិច្ចសហប្រតិបត្តិការ និងផ្លាស់ប្ដូរបទពិសោធន៍រវាងស្ថាប័នទាំងពីរ ឱ្យកាន់តែស្អិតរមួត និងប្រសើរឡើងថែមទៀត នាពេលខាងមុខ៕