(ភ្នំពេញ)៖ កញ្ញា ទ្រី ធីតា និស្សិតរៀនជំនាញគ្រប់គ្រងពាណិជ្ជកម្មអន្ដរជាតិ (IBM) នៃសាកលវិទ្យាល័យភូមិន្ទភ្នំពេញ(RUPP) បានប្ដេជ្ញាខ្ពស់ នៅក្នុងការបន្ដការសិក្សាដើម្បីពង្រឹង និងអភិវឌ្ឍន៍ចំណេះជំនាញរបស់ខ្លួនឲ្យបានកាន់តែខ្លាំង ដើម្បីរួមចំណែកអភិវឌ្ឍន៍សង្គមជាតិ បន្ទាប់ពីកញ្ញាទទួលបានអាហារូបករណ៍បន្ដការសិក្សានៅប្រទេសចិន។

ការប្ដេជ្ញាប្រកបដោយឆន្ទៈគួរឲ្យស្ងើចសរសើរនេះ បន្ទាប់ពីដេប៉ាតឺម៉ង់គ្រង់គ្រងពាណិជ្ជកម្មអន្ដរជាតិ នៃគ្រឹះស្ថានឧត្តមសិក្សារដ្ឋដ៏ចំណាស់ខាងលើ បានរៀបចំការធ្វើបទបង្ហាញការពារស្រាវជ្រាវនិក្ខេបបទ បញ្ចប់ការសិក្សាថ្នាក់បរិញ្ញាបត្រ IBM ជំនាន់ទី៩ ឆ្នាំសិក្សា២០២៥/២៦ ដល់និស្សិតចំនួន ២៤នាក់ នៅថ្ងៃទី២៣ ខែមិថុនា ឆ្នាំ២០២៦។

កញ្ញាថា រយៈពេល ៤ឆ្នាំ នៃការសិក្សាជំនាញ IBM នេះ ខ្លួនបានទទួលលើសពីចំណេះដឹង ដែលលោកគ្រូ-អ្នកគ្រូ បានបង្រៀន និងចែករំលែកនូវបទពិសោធន៍ល្អៗជាច្រើន ជាក់ស្ដែងមុនបញ្ចប់ការសិក្សាថ្នាក់បរិញ្ញាបត្រ ខ្លួនក៏បានទទួលនូវអាហារូបករណ៍បន្ដការសិក្សាថ្នាក់បរិញ្ញាបត្រជាន់ខ្ពស់ នៅប្រទេសចិន ដែលជាឱកាសមួយដ៏ល្អ ដើម្បីក្រេបជញ្ជក់នូវចំណេះដឹង និងបទពិសោធន៍ពីអន្ដរជាតិ សម្រាប់ជួយខ្លួនឯង និងរួមចំណែកអភិវឌ្ឍន៍សង្គមជាតិផង នាថ្ងៃអនាគត។

ញ្ញាបន្ដថា ការដាក់គោលដៅធំ ក្នុងការសិក្សានេះ គឺជាអ្វីដែលសិស្ស-និស្សិតគ្រប់រូប ត្រូវហ៊ានវិនិយោគ ក្នុងនាមទំពាំងស្នងឬស្សី ដើម្បីសាកល្បងសមត្ថភាពខ្លួន ក៏ដូចជាបង្កើនការខំប្រឹងទ្វេដង ដើម្បីក្ដីស្រម៉ៃ ព្រោះការសិក្សា មិនត្រឹមតែអាចជួយខ្លួនឯងនោះទេ តែក៏អាចជួយដល់សង្គមជាតិ ទៅតាមចំណេះជំនាញរៀងៗខ្លួន ពិសេសក្នុងកាលៈទេសៈបច្ចុប្បន្ន ដែលប្រទេសជាតិកំពុងមានបញ្ហាព្រំដែន គឺត្រូវការធនធានមនុស្សមានសមត្ថភាពកាន់តែខ្លាំង ដើម្បីរួមចំណែកអភិវឌ្ឍន៍ និងការប្រកួតប្រជែង ទាំងក្នុង និងក្រៅប្រទេស។

ទន្ទឹមជាមួយគ្នាលោកសាស្រ្តាចារ្យបណ្ឌិត​ ភូ​ សម្បត្តិ​ ប្រធានដេប៉ាតឺម៉ង់ផ្ទាល់ បានបង្ហាញសេចក្ដីសោមនស្សរីករាយ ចំពោះសិស្ស-និស្សិតពីមួយជំនាន់ទៅមួយចំនួន ដែលបានចាប់អារម្មណ៍ និងប្រឡងចូលរៀនជំនាញគ្រប់គ្រងពាណិជ្ជកម្មអន្ដរជាតិ ។ ស្របទៅនឹងចក្ខុវិស័យរបស់សាកលវិទ្យាល័យ ក៏ដូចជាក្រសួងអប់រំ ដែលជាសេនាធិការរបស់រាជរដ្ឋាភិបាល ដេប៉ាតឺម៉ង់ IBM មានបេសកកម្មសំខាន់ៗជាច្រើន ក្នុងការបណ្ដុះបណ្ដាលនិស្សិតឲ្យក្លាយជាធនធានដ៏មានសក្ដានុពលសម្រាប់សង្គមជាតិ តាមរយៈការជួយបម្រើ និងអភិវឌ្ឍន៍សេដ្ឋកិច្ចដល់សហគមន៍ ប្រកបដោយទំនួលខុសត្រូវខ្ពស់ ក្រោយបញ្ចប់ការសិក្សា។

ក្រៅពីពង្រឹងគុណភាពអប់រំក្នុងស្រុក ប្រធានដេប៉ាតឺម៉ង់ដដែល ក៏បានលើកទឹកចិត្តដល់និស្សិតឲ្យបន្ដការសិក្សាបន្ថែម ទាំងក្នុង និងក្រៅប្រទេស តាមរយៈកម្មវិធីសិក្សាជាច្រើន ក្នុងកិច្ចសហប្រតិបត្តិការរវាង RUPP និងដៃគូអន្ដរជាតិ ទាំងសកលវិទ្យាល័យ និងសហគ្រាស ដើម្បីបើកឱកាសសិក្សាកាន់តែទូលំទូលាយដល់និស្សិតកម្ពុជា ជាក់ស្ដែងក្នុងចំណោមនិស្សិត IBM ជំនាន់ទី៩ ដែលទើបឡើងការពារនិក្ខេបបទបញ្ចប់ការសិក្សា មាននិស្សិត ៨នាក់ បានទទួលអាហារូបករណ៍បន្ដការសិក្សានៅចិន ហើយមាននិស្សិតជាង ៣០នាក់ទៀត ត្រៀមចេញទៅផ្លាស់ប្ដូរការសិក្សានាចុងឆ្នាំនេះ។

លោកសាស្រ្តាចារ្យបណ្ឌិត​ ភូ​ សម្បត្តិ បន្ដថា បច្ចុប្បន្នដេប៉ាតឺម៉ង់គ្រប់គ្រងពាណិជ្ជកម្មអន្តរជាតិ នៃសាកលវិទ្យាល័យភូមិន្ទភ្នំពេញ មានកម្មវិធីសិក្សាដូចខាងក្រោម៖

១. កម្មវិធីថ្នាក់បរិញ្ញាបត្រ និងថ្នាក់អនុបណ្ឌិត លើជំនាញគ្រប់គ្រងពាណិជ្ជកម្មអន្តរជាតិ។
២. កម្មវិធីសិក្សាអន្តរជាតិ Dual Degree (១+៣ និង ២+២) ជាមួយសាកលវិទ្យាល័យ Angelo State University សហរដ្ឋអាមេរិក មានដូចជា៖
* កម្មវិធី ១+៣៖ សិក្សា ១ ឆ្នាំនៅកម្ពុជា និង ៣ ឆ្នាំនៅសហរដ្ឋអាមេរិក។
* កម្មវិធី ២+២៖ សិក្សា ២ ឆ្នាំនៅកម្ពុជា និង ២ ឆ្នាំនៅសហរដ្ឋអាមេរិក។
៣. កម្មវិធីសិក្សាអន្តរជាតិ Dual Degree (១+៣ និង ២+២) ជាមួយសាកលវិទ្យាល័យ Beijing Foreign Studies University សាធារណរដ្ឋប្រជាមានិតចិន មានដូចជា៖
* កម្មវិធី ១+៣៖ សិក្សា ១ ឆ្នាំនៅកម្ពុជា និង ៣ ឆ្នាំនៅទីក្រុងប៉េកាំង ប្រទេសចិន។
* កម្មវិធី ២+២៖ សិក្សា ២ ឆ្នាំនៅកម្ពុជា និង ២ ឆ្នាំនៅទីក្រុងប៉េកាំង ប្រទេសចិន។

កម្មវិធីទាំងនេះ នឹងផ្តល់ឱកាសដល់និស្សិតកម្ពុជា ក្នុងការទទួលបានចំណេះដឹង និងបទពិសោធន៍អន្តរជាតិ ពង្រឹងសមត្ថភាពភាសាបរទេស បង្កើនការយល់ដឹងអំពីបរិយាកាសធុរកិច្ចសកល និងត្រៀមខ្លួនជាអ្នកដឹកនាំ និងសហគ្រិនជំនាន់ថ្មីសម្រាប់ទីផ្សារការងារក្នុងស្រុក និងអន្តរជាតិ៕