(ព្រះវិហារ)៖ ដោយអនុវត្តន៍តាមការណែនាំពីលោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ ក្រុមការងារនៃមន្ទីរសុខាភិបាលខេត្ត បានសហការជាមួយអង្គការ RACHA និងអាជ្ញាធរមូលដ្ឋាន ចុះរៀបចំសកម្មភាពពិនិត្យសុខភាពស្ត្រីមានផ្ទៃពោះដោយម៉ាស៊ីនអេកូសាស្ត្រ (Ultrasound) ដោយឥតគិតថ្លៃ ដើម្បីនាំយកសេវាសុខាភិបាលទៅដល់ប្រជាពលរដ្ឋនៅតំបន់ដាច់ស្រយាល ក្រោមទស្សនៈ «មិនទុកនរណាម្នាក់ឱ្យនៅឯកោឡើយ»។

សកម្មភាពនេះបានធ្វើឡើងនៅព្រឹកថ្ងៃទី២៣ ខែមិថុនា ឆ្នាំ២០២៦ ដោយក្រុមគ្រូពេទ្យនៃមន្ទីរសុខាភិបាលខេត្តព្រះវិហារ និងមន្ត្រីមណ្ឌលសុខភាពច្រាច់ បានចុះទៅកាន់ភូមិភ្ញាក់រលឹក ឃុំធ្មា ស្រុកជ័យសែន ខេត្តព្រះវិហារ ដែលជាតំបន់ដាច់ស្រយាល ឆ្ងាយពីមណ្ឌលសុខភាព និងមន្ទីរពេទ្យបង្អែក១៦ មករា ខេត្តព្រះវិហារ នេះជាលើកទី៤ហើយ ដែលក្រុមការងារបានចុះផ្តល់សេវានៅតំបន់ដាច់ស្រយ៉ាលផ្សេងៗក្នុងខេត្តព្រះវិហារ។

ជាលទ្ធផលក្រុមការងារបានពិនិត្យអេកូសាស្ត្រជូនស្ត្រីមានផ្ទៃពោះចំនួន ១៦នាក់ ដោយលទ្ធផលបង្ហាញថា ស្ត្រីមានផ្ទៃពោះទាំងអស់មានសុខភាពល្អ និងទារកក្នុងផ្ទៃមានការលូតលាស់ធម្មតា។ ជាមួយគ្នានេះ ក្រុមគ្រូពេទ្យក៏បានណែនាំ និងកំណត់ពេលវេលាឱ្យពួកគាត់មកពិនិត្យផ្ទៃពោះតាមការណាត់របស់មន្ត្រីមណ្ឌលសុខភាពឱ្យបានទៀងទាត់ មុនពេលសម្រាលកូន។

ក្រៅពីពិនិត្យអេកូសាស្ត្រជូនស្ត្រីមានផ្ទៃពោះ ក្រុមការងារបានពិនិត្យ និងថ្លឹងទម្ងន់កុមារចំនួន ៣៥នាក់ ដើម្បីតាមដានការលូតលាស់ និងបានរកឃើញកុមារម្នាក់មានបញ្ហាទម្ងន់ទាប(Under weight)។ក្រុមគ្រូពេទ្យបានផ្តល់ការប្រឹក្សា និងរៀបចំការព្យាបាលតាមលក្ខណៈបច្ចេកទេសវេជ្ជសាស្ត្រភ្លាមៗ។

ក្រុមការងារក៏បានអប់រំសុខភាពដល់ប្រជាពលរដ្ឋចំនួន ៥៧នាក់ ស្តីពីការថែទាំសុខភាព និងអនាម័យ ពិសេសការលុបបំបាត់ជម្រកមូសខ្លា ដើម្បីបង្ការ និងទប់ស្កាត់ការរីករាលដាលជំងឺគ្រុនឈាមក្នុងសហគមន៍។

ក្រុមការងារនៃមន្ទីរសុខាភិបាលខេត្តព្រះវិហារ បានបញ្ជាក់ថា សកម្មភាពនាំយកសេវាសុខាភិបាលទៅដល់ប្រជាពលរដ្ឋនៅតំបន់ដាច់ស្រយាលបែបនេះនឹងត្រូវបន្តអនុវត្តនៅតាមមូលដ្ឋានផ្សេងៗទៀតក្នុងខេត្ត ដើម្បីធានាឱ្យប្រជាពលរដ្ឋគ្រប់រូបទទួលបានសេវាសុខាភិបាលប្រកបដោយសមធម៌ និងគុណភាព៕