(បរទេស)៖ ក្រុមបាល់ទាត់ជម្រើសជាតិក្រូអាត បានទម្លាក់គូប្រជែងប៉ាណាម៉ា ចេញពីព្រឹត្តិការណ៍បាល់ទាត់ពិភពលោក FIFA World Cup 2026 ត្រឹមវគ្គចែកពូល តាមរយៈយកឈ្នះ ១-០ ក្នុងប្រកួតលើកទី២ ប្រចាំពូល L ចុងក្រោយគេ។ នេះបើយោងតាមការចេញផ្សាយដោយ BBC។

៣ពិន្ទុជាលើកដំបូងក្នុងចំណោម ២ប្រកួតនៅ World Cup ជំនាន់ទី២៣ គឹបានបញ្ចប់ដោយជ័យជម្នះនៃការប្រកួត ទី២០០ ជាមួយក្រុមក្រឡាអុករបស់ Luka Modric ទៀតផង មុនពេលត្រូវបានប្តូរចេញវិញនៅនាទី៨១ នៃការបង្ហាញ ខ្លួននៅកម្មវិធីពិភពលោកជាលើកទី៥ នេះ។

កីឡាករពាក់លេខ១១ Ante Budimir ខ្សែប្រយុទ្ធមកពីក្លិប Osasuna ជាអ្នករកបានគ្រាប់ជ័យជម្នះតែ ១គ្រាប់នៅដើម វគ្គទី២ ចូលលេងក្នុងនាមកីឡាករបម្រុង ដើម្បីរួមចំណែកជួយក្រូអាតមានសង្ឃឹមឡើងវិញ ដ្បិតក្រុមកំពូលតារាងតោកំណាចអង់គ្លេស បញ្ចប់ក្នុងលទ្ធផលស្មើគ្នា ០-០ ទល់នឹងហ្គាណា ខណៈប៉ាណាម៉ា ក្រុមនៅតំបន់អាមេរិកខាងជើង ខកខានឱកាសឡើងវគ្គ ៣២ក្រុមជាស្ថាពរ ក្រោយចាញ់ ២ប្រកួតជាប់គ្នា។

Budimir ក៏ជាសមាជិកដែលបានរួមចំណែកក្រុមនៅអឺរ៉ុបមួយនេះ ដណ្តើមបានចំណាត់ថ្នាក់លេខ៣ កាលនៅ World Cup 2022 បន្ទាប់ពីក្រូអាត ជាក្រុមរងជើងឯកកាលពី World Cup 2018 នៅប្រទេសរុស្ស៊ី។

ពួកគេនឹងធានាកៅអីឆ្លងទៅវគ្គ ៣២ក្រុមជាបន្តទៀត ប្រសិនបើអាចយកឈ្នះក្រុមមកពីអាហ្រ្វិក ហ្គាណានៅរាត្រីថ្ងៃសៅរ៍ចុងសប្តាហ៍នេះ នៅពេលអង់គ្លេស ត្រូវប្រឈមមុខនឹងក្រុមហាលអាវ ប៉ាណាម៉ានៅម៉ោងដំណាលគ្នាដែរ៕