(វ៉ាស៊ីនតោន)៖ ប្រធានាធិបតីសហរដ្ឋអាមេរិក លោក Donald Trump នឹងចូលរួមទស្សនាប្រកួតផ្តាច់ព្រ័ត្រ និងផ្តល់កិត្តិយសក្នុងពិធីប្រគល់ពានបាល់ទាត់ពិភពលោក World Cup 2026 ថែមទៀត បើទោះបីគិតមកទល់ពេលនេះ រូបលោកផ្ទាល់ពុំទាន់បានចូលរួមទស្សនាក្នុងប្រកួតណាមួយក៏ដោយ។

ប្រភពព័ត៌មានពីគេហទំព័រកីឡា BBC បានដកស្រង់សំដីលោក Gianni Infantino ប្រធានសហព័ន្ធ FIFA បានឱ្យដឹងថា ទោះបីជាប្រធានាធិបតី វ័យ ៨០ឆ្នាំ មិនទាន់បានចូលរួមទស្សនាដោយផ្ទាល់ក្នុងកីឡដ្ឋាន ក៏ប៉ុន្តែលោកនឹងបង្ហាញវត្តមានក្នុងប្រកួតចុងក្រោយនាថ្ងៃទី១៩ ខែកក្កដានៅឯកីឡដ្ឋាន MetLife ស្ថិតក្នុងរដ្ឋ New Jersey និងផ្តល់កិត្តិយសប្រគល់ពានដល់ក្រុមជើងឯកទៀតផង។

World Cup ជំនាន់ទី២៣ រៀបចំនៅតំបន់អាមេរិកខាងជើងបានចាប់ផ្តើមពីថ្ងៃទី១១ ខែមិថុនា និងបញ្ចប់ទៅវិញនាថ្ងៃអាទិត្យ ទី១៩ ខែកក្កដា ឆ្នាំ២០២៦ ដោយមានសហរដ្ឋអាមេរិក មិចស៊ិក និងកាណាដា ធ្វើម្ចាស់ផ្ទះរួមគ្នា។

លោក ត្រាំ បានថ្លែងប្រាប់ Fox ថា «ពួកយើងនឹងនៅទីនោះជាមួយគ្នា ដើម្បីទស្សនាវគ្គផ្តាច់ព្រ័ត្រប្រកបដោយក្តីរីករាយ ទាំងអស់គ្នា និងចូលរួមប្រគល់ពានសម្រាប់ក្រុមជយលាភីទៀតផង»។

នៅចាំបានថា កាលពីរដូវក្តៅមុន លោក ដូណាល់ត្រាំ ក៏បានចូលរួមទស្សនាផ្ទាល់ក្នុងកីឡដ្ឋានខាងលើនេះដែរ និងប្រគល់ពាន Club World Cup 2025 ដល់ក្រុមជើងឯក តោខៀវ Chelsea ទៀតផង នៅពេលអាមេរិកធ្វើម្ចាស់ផ្ទះ ដែលបច្ចប្បន្នលោកក៏ជាមិត្តជិតស្និទ្ធរបស់លោក Infantino ផងដែរ៕