មូស្លីមកម្ពុជា មានឱកាសធ្វើអ៊ុំរ៉ោះដោយឥតគិតថ្លៃ ក្រោមការឧបត្ថម្ភរបស់ព្រះមហាក្សត្រអារ៉ាប៊ីសាអ៊ូឌីត ដល់សាសនិកឥស្លាមចំនួន១៦ប្រទេស ចំនួន១,០០០នាក់
24-06-2026 12:03
(រីយ៉ាដ)៖ ព្រះចៅ សាល់ម៉ាន ពីន អាប់ឌុលអាហ្សុីស ព្រះមហាក្សត្រនៃព្រះរាជាណាចក្រអារ៉ាប៊ីសាអ៊ូឌីត បានឧបត្ថម្ភដល់សាសនិកឥស្លាម ចំនួន១,០០០នាក់ ទាំងបុរស និងស្ត្រី មកពី១៦ប្រទេស ក្រោមកម្មវិធីភ្ញៀវព្រះមហាក្សត្រសម្រាប់ការធ្វើបុណ្យហាជ្ជ និងអ៊ុំរ៉ោះ និងការទស្សនកិច្ច សម្រាប់ឆ្នាំ១៤៤៨ មូហាំម៉ាត់សករាជដោយពុំគិតថ្លៃអ្វីទាំងអស់។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Saudi Expatriate ចេញផ្សាយកាលពីថ្ងៃទី២៣ ខែមិថុនា ឆ្នាំ២០២៦។
កម្មវិធីនេះ នឹងត្រូវអនុវត្តជា៤វគ្គ ពេញមួយឆ្នាំ ខណៈដែលក្រុមទីមួយមានចំនួន ២៥០នាក់ មកពី១៦ ប្រទេសក្នុងតំបន់អាស៊ីរួមមាន ៖ ឥណ្ឌូនេស៊ី ទីម័រខាងកើត ហ្វីលីពីន ម៉ាឡេស៊ី កម្ពុជា ថៃ វៀតណាម មីយ៉ាន់ម៉ា ឡាវ សិង្ហបុរី ចិន ជប៉ុន កូរ៉េខាងត្បូង ហុងកុង តៃវ៉ាន់ និងម៉ុងហ្គោលី។
គំនិតផ្តួចផ្តើមនេះ គឺឆ្លុះបញ្ចាំងពីការប្តេជ្ញាចិត្តជាបន្តបន្ទាប់របស់ប្រទេសអារ៉ាប៊ីសាអូឌីត ក្នុងការបម្រើប្រជាជនមូស្លីមនៅទូទាំងពិភពលោក និងពង្រឹងចំណងសាមគ្គីភាព ជាមួយសហគមន៍ឥស្លាមនៅលើសកលលោក។
រដ្ឋមន្ត្រីក្រសួងកិច្ចការឥស្លាម Sheikh Dr. Abdul Latif bin Abdulaziz Al-Sheikh សម្តែងនូវអំណរគុណ និងដឹងគុណចំពោះព្រះមហាក្សត្រ សាល់ម៉ាន ពីន អាប់ឌុលអាហ្សុីស ត្រាស់បង្គាប់ និង ព្រះអង្គម្ចាស់ មហាំម៉ាត់ ពិន សាល់ម៉ាន នាយករដ្ឋមន្ត្រីអារ៉ាប៊ីសាអ៊ូឌីត សម្រាប់ការយកចិត្តទុកដាក់ដ៏អស្ចារ្យក្នុងការបម្រើសាសនាឥស្លាម និងមូស្លីម និងការខិតខំប្រឹងប្រែងជាបន្តបន្ទាប់របស់ទ្រង់ ដើម្បីឱ្យអ្នកកាន់សាសនាឥស្លាមមកពីជុំវិញពិភពលោកធ្វើអុំរ៉ោះ និងទស្សនាកន្លែងបរិសុទ្ធដោយភាពងាយស្រួល និងសន្តិភាពផ្លូវចិត្ត។
លោករដ្ឋមន្ត្រីក្រសួងកិច្ចការឥស្លាមអារ៉ាប៊ីសាអ៊ូឌីត បានសង្កត់ធ្ងន់ថា ការធ្វើជាម្ចាស់ផ្ទះដ៏សប្បុរសនេះបង្ហាញពីការប្តេជ្ញាចិត្តរបស់អ្នកដឹកនាំដ៏ឈ្លាសវៃ ដើម្បីពង្រឹងចំណងមិត្តភាពជាបងប្អូន ក្នុងចំណោមប្រជាជនមូស្លីម ហើយឆ្លុះបញ្ចាំងពីសារមនុស្សធម៌ និងសាសនារបស់ព្រះរាជាណាចក្រអារ៉ាប៊ីសាអ៊ូឌីតក្នុងការកសាងស្ពាននៃការប្រាស្រ័យទាក់ទងជាមួយអ្នកប្រាជ្ញ និងឥស្សរជនដ៏មានឥទ្ធិពលនៅក្នុងសង្គមមូស្លីម។
រដ្ឋមន្ត្រីក្រសួងកិច្ចការឥស្លាមរូបនេះ បានកោតសរសើរចំពោះការគាំទ្រគ្មានដែនកំណត់ ដែលក្រសួងទទួលបានពីថ្នាក់ដឹកនាំដ៏ឈ្លាសវៃ ដើម្បីបំពេញបេសកកម្មបម្រើសាសនាឥស្លាម និង អ្នកឥស្លាម និងការលើកកម្ពស់តម្លៃនៃការសម្របសម្រួល និងការអត់ឱន ។
រដ្ឋមន្ត្រីដដែលនេះ ទូអា(បួងសួង)ដល់អល់ឡោះជាម្ចាស់ មេត្តាប្រទានពរជ័យដល់អ្នកថែរក្សាវិហារបរិសុទ្ធទាំងពីរ និង បុត្ររបស់ទ្រង់ គឺ ព្រះអង្គម្ចាស់ មហាំម៉ាត់ ពិន សាល់ម៉ាន សុខភាពល្អបរិបូរណ៍ ដើម្បីរក្សាសន្តិសុខ ស្ថិរភាព និងភាពរុងរឿងនៃព្រះរាជាណាចក្រអារ៉ាប៊ីសាអូឌីត ។
សូមជម្រាបថា ព្រះចៅ សាល់ម៉ាន ពីន អាប់ឌុលអាហ្សុីស ព្រះមហាក្សត្រនៃព្រះរាជាណាចក្រអារ៉ាប៊ីសាអ៊ូឌីត ជាមហាក្សត្រចុត្តធម៍បំផុតលើលោក ដែលព្រះអង្គតែងតែយកចិត្តទុកដាក់បំផុត ទៅលើបណ្ដាជនមូស្លីមរងគ្រោះដោយសារគ្រោះធម្មជាតិ, សង្គ្រាម, ជនក្រីក្រលើសាសកលលោក ខណៈដែលព្រះអង្គបានជួយដោយមិនប្រកាន់ពីពូជសាសន៍ឡើយ៕
