(តាកែវ)៖ លោក ទេព កោសល្យ អនុប្រធានមន្ទីរប្រៃសណីយ៍ និងទូរគមនាគមន៍ខេត្តតាកែវ ត្រូវបានតែងតាំងជាប្រធានមន្ទីរជំនួសលោក ស្រី សារឿន ដែលត្រូវចូលនិវត្តន៍។ ពិធីប្រកាសតែងតាំងនេះបានរៀបចំធ្វើឡើងនៅព្រឹកថ្ងៃ ពុធ ទី២៤​ ខែមិថុនា ឆ្នាំ២០២៦ ក្រោមវត្តមានលោក ខាយ ឃុន ហេង រដ្ឋលេខាធិការតំណាងលោក ជា វ៉ាន់ដេត រដ្ឋមន្រ្តីក្រសួងប្រៃសនីយ៍ និងទូគមនាគមន៍, លោក វ៉ី សំណាង អភិបាលខេត្តតាកែវ ព្រមទាំងអស់លោកប្រធាន អនុប្រធានមន្ទីរ អង្គភាពជំវិញខេត្ត និងមន្ត្រីមន្ទីរប្រៃសណីយ៍ និងទូរគមនាគមន៍ខេត្តជាច្រើនរូបផងដែរ។

ថ្លែងនៅក្នុងឱកាសនោះលោក វ៉ី សំណាង បានណែនាំលោកប្រធានមន្ទីរទើបតែងតាំងថ្មី ត្រូវយកទុកដាក់ពង្រីកការតបណ្ដាញគមនាគមន៍នៅក្នុងខេត្ត ដើម្បីបង្កភាពងាយស្រួលដល់បងប្អូនប្រជាពលរដ្ឋប្រើប្រាស់សេវាទូរសព្ទ និងអ៊ីនធឺណេត ជាពិសេសវាផ្ដល់ភាពងាយស្រួលដល់អ្នកវិនិយោគឲ្យទាក់ទងគ្នាក្នុងការបញ្ជាទិញទំនិញពីក្រៅប្រទេស។

អភិបាលខេត្តតាកែវ បានណែនាំឲ្យលោកប្រធានមន្ទីរប្រៃសណីយ៍ថ្មី ត្រូវទប់ស្កាត់ការលក់ស៊ីមកាតទូរសព្ទ ដោយគ្មានអត្តសញ្ញាណបណ្ណ និងត្រូវសហការជាមួយអាជ្ញាធក្រុងស្រុកឲ្យបានល្អ ពាក់ព័ន្ធទៅនិងការប្រើប្រាស់សេវា អ៊ីនធ័ណេតនៅតាមមូលដ្ឋាន ហើយប្រសិនបើមានការប្រើប្រាស់សេវាអ៊ីនធ័ណេតច្រើនលើសកំណត់ឬមានបញ្ហាមិនប្រក្រតីណាមួយ ត្រូវចុះទៅពិនឹត្យមើលដល់ទីតាំងក្រែងមានបញ្ហាប្រព្រឹត្តិបទល្មើសស្កេមអនឡាន ព្រោះការប្រព្រឹត្តបទល្មើសស្កេមអនឡាញវាពាក់ព័ន្ធទៅនិងការប្រើប្រាស់សេវាអ៊ីនធ័ណេត។

ថ្លែងនៅក្នុងឱកាសនោះលោក ខាយ ឃុនហេង បានអបអរសាទរចំពោះលោក ទេព កោសល្យ ដែលត្រូវប្រកាសចូលកាន់មុខតំណែងជាប្រធានមន្ទីរប្រៃសណីយ៍ និងទូរគមនាគមន៍ថ្មីនាពេលនេះ និងបានណែនាំឲ្យប្រធានមន្ទីថ្មី ត្រូវសហការជាមួយមន្ទីរជំនាញពាក់ព័ន្ធ អាជ្ញាធរដែនដី និងស្ថាប័នមានសមត្ថកិច្ចទាំងអស់ក្នុងខេត្ត។

លោកណែនាំឲ្យខិតខំបំពេញការងាររួមគ្នា សហការគ្នាបានល្អ ដើម្បីសម្រេចបាននូវសមិទ្ធផលថ្មីៗយកចិត្តទុកដាក់ក្នុងការផ្តល់សេវាទូរសព្ទ សេវាអ៊ីនធ័ណេតជូនប្រជាពលរដ្ឋឱ្យបានល្អ និងទាន់ពេលវេលាសាកសមជាមន្ត្រីផ្តល់សេវាល្អ ក្នុងការបម្រើប្រជាពលរដ្ឋ៕