(កណ្តាល)៖ ក្រោយពលរដ្ឋរាយការណ៍ពីករណីប្រទះឃើញបុរសម្នាក់មានដាវ អាវុធកែច្នៃ២ដើម និងគ្រឿងញៀនមួយចំនួន ភ្លាមនោះលោកវរសេនីយ៍ត្រី ថុង សៀកឡុង មេបញ្ជាការមូលដ្ធានកងរាជធាវុធហត្ថក្រុងអរិយក្សត្រ បានដឹកនាំកម្លាំងចុះទៅដល់ទីតាំង ហើយជនសង្ស័យដឹងខ្លួន ក៏ប្រតាយប្រតប់បម្រុងតដៃជាមួយកម្លាំងសមត្ថកិច្ច តែនៅតែត្រូវបានចាប់ខ្លួនជាមួយវត្ថុតាងខាងលើ។

ហេតុការណ៍នេះ បានកើតឡើងថ្ងៃទី២៣ ខែមិថុនា ឆ្នាំ២០២៦ នៅចំណុចក្រោយវត្តព្រែកបង្កង ស្ថិតក្នុងភូមិព្រែកល្វា សង្កាត់ព្រែកតាកូវ ក្រុងអរិយក្សត្រ។

លោកវរសេនីយ៏ត្រី ថុង សៀកឡុង បានឲ្យដឹងថា ជនសង្ស័យមានឈ្មោះ ចាន់ គង្គា អាយុ៣៤ឆ្នាំ មុខរបរ មិនពិតប្រាកដ (វិជ្ជមាន​សារធាតុញៀន) និងមានទីលំនៅក្នុងភូមិសង្កាត់កើតហេតុ។

លោកបន្តថា វត្ថុតាងចាប់យករួមមាន៖ ក្រាមសថ្លា ចំនួន០១កញ្ចប់, ទូរស័ព្ទចំនួន ០១គ្រឿង, កាំភ្លើងស្នប់កែច្នៃ ចំនួន០២ដើម, ដាវចំនួន០១ដើម, សម្ភារប្រើប្រាស់ និងវេចខ្ចប់ថ្នាំញៀនមួយចំនួន និងប្រាក់ចំនួន ៩.០០០រៀល

លោកមេបញ្ជាការបន្តទៀតថា ក្រោយទទួលសេចក្តីរាយការណ៍ពីប្រជាពលរដ្ធអំពីទីតាំង និងសកម្មភាពរបស់ជនសង្ស័យភ្លាម លោកបានដឹកនាំកម្លាំងចំនួន៦នាក់ មធ្យោបាយ រថយន្ដ ចំនួន០១គ្រឿង ម៉ូតូ០២គ្រឿង ចុះទៅដល់ចំណុចកើតហេតុ ក៏ប្រទះឃើញជនសង្ស័យ កំពុងនៅក្នុងរោងក្បែរបឹងឈូក កម្លាំងក៏បានឃាត់សួរនាំ ស្រាប់តែជនសង្ស័យបានប្រតាយប្រតប់ជាមួយកម្លាំងអាវុធហត្ថ ក៏បានត្រូវចាប់បានវាយខ្នោះដៃ និងឆែកឆេររកឃើញវត្តុតាងខាងលើ។

ក្រោយធ្វើការសាកសួរ ជនសង្ស័យបានសារភាពថា គ្រឿងញៀន១​កញ្ចប់ ពិតជារបស់ខ្លួនពិតប្រាកដមែន​ ដោយទិញពីឈ្នោះ ហ្សា នៅចំណុចជិតកំពង់ចម្លងជ្រោយចង្វារ​ រាជធានីភ្នំពេញ។

បច្ចុប្បន្ន ជនសង្ស័យ​ និងវត្ថុតាង​ឃាត់ខ្លួនមូលដ្ធានកងរាជអាវុធហត្ថក្រុងអរិយក្សត្រ ដើម្បីបន្តអនុវត្តតាមនីតិវិធី៕