(តាកែវ)៖ លោក វ៉ី សំណាង ​អភិបាល នៃគណៈអភិបាលខេត្តតាកែវ​ និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តតាកែវ នៅព្រឹកថ្ងៃពុធទី២៤ ខែមិថុនាឆ្នាំ ២០២៦ បានដឹកនាំគណៈកម្មាធិការសាខា មន្ត្រីប្រតិបត្តិសាខា និងអនុសាខាកាកបាទក្រហមកម្ពុជាស្រុកទ្រាំង នាំយកអំណោយសាខាចូលរួមបុណ្យគម្រប់៧ថ្ងៃរបស់កម្មការិនីរោងចក្រ ២នាក់ជាបងប្អូនស្រីបង្កើត ដែលបានស្លាប់បាត់បង់ជីវិតដោយសារឧបទ្ទវហេតុ គ្រោះរន្ទះបាញ់ កាលពីពេលថ្មីៗកន្លងទៅនេះ។

ជនរងគ្រោះទាំង ២នាក់បងប្អូនស្រីបង្កើត រួមមាន ឈ្មោះ អួន ស៊ីណាត ភេទស្រី អាយុ ៤២ឆ្នាំ មុខរបរ កម្មការនីរោងចក្រ (ត្រូវជាបងស្រី) មានទីលំនៅបច្ចុប្បន្ន ភូមិត្រពាំងខ្នុរ ឃុំរនាម ស្រុកទ្រាំង ខេត្តតាកែវ និងឈ្មោះ អួន ម៉ៅ ភេទស្រី អាយុ ៣៤ឆ្នាំ មុខរបរ កម្មការនីរោងចក្រ មានទីលំនៅបច្ចុប្បន្ន ភូមិខ្លោងទ្វារ ឃុំរនាម ស្រុកទ្រាំង ខេត្តតាកែវ។

នាឱកាសនោះ លោក វ៉ី សំណាង បានចូលរួមរំលែកមរណទុក្ខជាមួយក្រុមគ្រួសារសព និងសូមបួងសួងដល់វិញ្ញាណក្ខន្ធសព បានទៅកាន់សុគតិភពកុំបីឃ្លៀងឃ្លាតឡើយ ហើយបានផ្តាំផ្ញើរដល់បងប្អូនប្រជាពលរដ្ឋដែលមកចូលរួមនាពេលនេះ សូមឱ្យបង្កើនការប្រុងប្រយ័ត្នខ្ពស់ទៅនឹង គ្រោះធម្មជាតិផ្សេងៗ ដូចជារន្ទះបាញ់ អគ្គិភ័យ ទឹកជំនន់ និងខ្យល់កន្ត្រាក់ជាដើម។

ដើម្បីចូលរួមសម្រាលទុក្ខលំបាកក្នុងជីវភាពគ្រួសារសព លោកប្រធានបាននាំយកអំណោយមកប្រគល់ជូនក្នុងមួយគ្រួសារៗ រួមមាន៖ អង្ករ ២៥គីឡូក្រាម, ទឹកបរិសុទ្ធ ២កេស, ទឹកក្រូច ២កេស, ត្រីខ១យួរ, មី១កេស, ប្រេងឆា១លីត្រ, នំកញ្ចប់ធំ១, ទឹកត្រី ៣ដប, ទឹកស៊ីអ៊ីវ ៣ដប និងថវិកា៥០ម៉ឺនរៀលផងដែរ៕