(កណ្ដាល)៖ អគ្គិភ័យបានឆាបឆេះរោងចក្រកែច្នៃអេតចាយយីហោ ខេមបូឌា ខូអិលធីឌី ដែលមានម្ចាស់ជាជនជាតិចិនឈ្មោះ Zhang chao Jang បណ្ដាលមកពីឆ្លងចរន្តអគ្គិសនីម៉ូទ័របូមប្រេងស៊ីទែនម៉ាស៊ូត បណ្ដាលឲ្យឆាបឆេះអស់ទ្រព្យសម្បត្តិមួយចំនួនធំ ខណៈដែលកម្លាំងប្រតិបត្តិការពន្លត់ខិតខំពន្លត់យ៉ាងសស្រាកសស្រាំ ទើបអាចពន្លត់អគ្គិភ័យនេះបានរលត់ទៅវិញ។ ហេតុការណ៍ឆាបឆេះនេះ បានកើតឡើងនៅថ្ងៃទី២៤ ខែមិថុនា ឆ្នាំ២០២៦។

ក្នុងហេតុការណ៍នេះ គេសង្កាតឃើញ លោក នូ សុវណ្ណរិទ្ធ អភិបាលស្រុកអង្គស្នួលដឹកនាំកម្លាំងជំនាញ កម្លាំងអន្តរាគមន៍ និងកម្លាំងពន្លត់អគ្គីភ័យ ដែលក្នុងនោះ ក៍មានវត្តមានលោកវរសេនីយ៍ឯក អៀង ធារី នាយការិយាល័យបង្ការ និង ពន្លត់អគ្គិភ័យនៃស្នងការដ្ឋាននគរបាលខេត្តកណ្ដាលផងដែរ បានសហការដឹកនាំចុះអន្តរាគមន៍ ពន្លត់អគ្គីភ័យដែលបានឆាបឆេះនៅក្នុងក្រុមហ៊ុន កែច្នៃអេតចាយខាងលើនេះ។

ក្នុងប្រតិបត្តិនេះ ការពន្លត់អគ្គីភ័យត្រូវបានអនុវត្តយ៉ាងសកម្ម និងទាន់ពេលវេលា រហូតអាចគ្រប់គ្រងស្ថានការណ៍បានទាំងស្រុង ដោយមិនបណ្តាលឱ្យអគ្គីភ័យរាលដាលទៅដល់លំនៅឋាន ប្រជាពលរដ្ឋនៅក្បែរនោះ និងមិនមានគ្រោះថ្នាក់ដល់អាយុជីវិតមនុស្សឡើយ។

ប្រតិបត្តិការនេះ កម្លាំងបានប្រើប្រាស់រថយន្តពន្លតអគ្គិភ័យអស់៣គ្រឿង, បំពង់អគ្គិភ័យអស់ចំនួន១៥ធុង និងប្រើប្រាស់កម្លាំងចំនួន៣៥នាក់៕