(ត្បូងឃ្មុំ)៖ កម្លាំងគណៈបញ្ជាការឯកភាពរដ្ឋបាលខេត្តត្បូងឃ្មុំ ក្រោមការដឹកនាំបញ្ជាផ្ទាល់ពី លោក ប៉ែន កុសល្យអភិបាលខេត្តត្បូងឃ្មុំ និងជាប្រធានគណៈបញ្ជាការឯកភាពរដ្ឋបាលខេត្ត ដោយមានការសម្របសម្រួល ពីតំណាងអយ្យការ អមសាលាអមសាលាដំបូងខេត្ដបានបន្តចុះពិនិត្យផ្ទះជួលមួយកន្លែងនៅស្រុកពញាក្រែក រកឃេីញជនបរទេសចំនួន៣២នាក់ ក្រោយសង្ស័យមានការដឹកជញ្ជូនសម្ភារដែលបម្រេីឱ្យបទល្មេីសឆបោកតាមប្រព័ន្ធបច្ចេកវិទ្យា (Scame Online)។

យោងតាមរបាយការណ៍រដ្ឋបាលខេត្តត្បូងឃ្មុំ បានឱ្យដឹងថា
កម្លាំងជំនាញ នៃស្នងការដ្ឋាននគរបាលខេត្ត សហការជាមួយនាយកដ្ឋាន នគរបាលព្រហ្មទណ្ឌ (ប្រចាំការខេត្តត្បូងឃ្មុំ) កម្លាំងជំនាញកងរាជអាវុធហត្ថខេត្ត មានការចូលរួមពី អាជ្ញាធរ មូលដ្ឋានស្រុកឃុំភូមិ បានចុះត្រួតពិនិត្យទីតាំងបន្ទប់ជួលមួយកន្លែងស្ថិតនៅ ភូមិត្រពាំងផ្លុងទី២ ឃុំត្រពាំងផ្លុង ស្រុកពញាក្រែក។

ក្នុងប្រតិបត្តិការនេះបានត្រួតពិនិត្យ បន្ទប់ស្នាក់នៅ ចំនួន ១៣បន្ទប់ រកឃេីញជនបរទេសស្នាក់នៅចំនួន ៣២នាក់ ស្រីចំនួន១១នាក់ ក្នុងនោះមានឯកសារត្រឹមត្រូវចំនួន ២៨នាក់។

តាមរបាយការណ៍នេះបានបញ្ជាក់ថា តាមរយៈ វីដេអូ យកចេញពីកាមេរ៉ាសុវត្ថិភាព ថ្ងៃទី២២ ខែមិថុនា ឆ្នាំ២០២៦ វេលាម៉ោងប្រហែល ២២:៤៥ នាទី ឃើញមានសកម្មភាពការជញ្ជូនស្បោងខ្មៅ (សង្ស័យកុំព្យូទ័រច្រេីនគ្រឿង) សង្ស័យពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (Scam Online)។

បច្ចុប្បន្ន កម្លាំងគណៈបញ្ជាការ ឯកភាពរដ្ឋបាលខេត្ត កំពុងបន្តចុះស្រាវជ្រាវ ត្រួតពិនិត្យ ស្វែងរក ទីតាំង ដែលមានការសង្ស័យលួចលាក់ ប្រព្រឹត្តបទល្មើស នឹងការរស់នៅប្រមូលផ្តុំខុសច្បាប់ទាំង០៧ ក្រុងស្រុកក្នុងភូមិសាស្ត្រខេត្ត។

អាជ្ញាធរនឹងបន្តធ្វើការ ផ្សព្វផ្សាយ អនុក្រឹត្យ លេខ ០៣ របស់រាជរដ្ឋាភិបាល៕