(ភ្នំពេញ)៖ កងរាជអាវុធហត្ថរាជធានីភ្នំពេញ បានអំពាវនាវដល់សាធារណជនរួមគ្នា បង្ការ ទប់ស្កាត់ និងកាត់ផ្តាច់ឫសគល់នៃបញ្ហាគ្រឿងញៀននៅកម្ពុជា ឲ្យបានជាអតិបរិមា ដើម្បីរក្សានូវសណ្តាប់ធ្នាប់ សន្តិសុខ និងសុវត្ថិភាពសង្គម។

ការអំពាវនេះ ស្របពេលដែល កម្ពុជានឹងប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ២៦ មិថុនា ដែលត្រូវបានប្រារព្ធឡើង ជារៀងរាល់ឆ្នាំ ដើម្បីបង្កើនការយល់ដឹងជាសកលអំពីគ្រោះថ្នាក់នៃគ្រឿងញៀន និងលើកកម្ពស់កិច្ចសហប្រតិបត្តិការក្នុងការលុបបំបាត់ការប្រើប្រាស់ និងការជួញដូរខុសច្បាប់។

ក្នុងឱកាសនេះ កងរាជអាវុធហត្ថរាជធានីភ្នំពេញ សូមអំពាវនាវបងប្អូន គ្រប់វ័យ គ្រប់ស្រទាប់ ចូលរួមសហការ ជាមួយ អាជ្ញាធរមានសមត្ថកិច្ច ដើម្បីរួមគ្នា បង្ការ ទប់ស្កាត់ និងកាត់ផ្តាច់ឫសគល់នៃបញ្ហាគ្រឿងញៀននៅកម្ពុជា ឲ្យបានជាអតិបរិមា ដើម្បីរក្សានូវសណ្តាប់ធ្នាប់ សន្តិសុខ និងសុវត្ថិភាពសង្គមយើង។

ជាមួយគ្នានេះ សម្រាប់បងប្អូននៅរាជធានីភ្នំពេញ ដែលបានដឹងព័ត៌មាន ស្តីពីបទល្មើសគ្រឿងញៀន ក៏ដូចជាបទល្មើសផ្សេងៗ សូមរាយការណ៍ទៅកាន់អាវុធហត្ថរាជធានីភ្នំពេញ តាមរយៈលេខទូរស័ព្ទបន្ទាន់ ១២៩១ ឬ ទាក់ទងតាមបណ្តាញ Telegram, WhatsApp, CoolApp ដែលមានលេខ 031 5555 669 ឬអាចឆាតទៅកាន់ផេកហ្វេសប៊ុករបស់កងរាជអាវុធហត្ថរាជធានីភ្នំពេញ ដែលមានឈ្មោះថា Phnom Penh Gendarmerie ជាបន្ទាន់៕