(ភ្នំពេញ)៖ លោក Wang WenBin ឯកអគ្គរដ្ឋទូតចិនប្រចាំកម្ពុជា នៅថ្ងៃទី២៤ ខែមិថុនា ឆ្នាំ២០២៦ បានសាទរចំពោះសមិទ្ធផលថ្មីនៃការដឹកជញ្ជូនកសិផលកម្ពុជាទៅកាន់ប្រទេសចិន ដោយឆ្លងកាត់ច្រកឡាវ។

តាមសំណេររបស់លោកនៅល្ងាចថ្ងៃនេះ បានរៀបរាប់ដូច្នេះថា៖ «ខ្ញុំពិតជារីករាយដែលបានដឹងថា ច្រករបៀងដឹកជញ្ជូនឆ្លងដែនថ្មីស្រឡាងគឺពីកម្ពុជាទៅប្រទេសចិនតាមរយៈប្រទេសឡាវ បានបើកដាក់ឱ្យដំណើរការជាផ្លូវការនៅថ្ងៃទី២២ ខែមិថុនា។ ច្រករបៀងនេះនឹងធ្វើឱ្យពេលវេលាដឹកជញ្ជូនខ្លីជាងមុន ដែលអនុញ្ញាតឱ្យអ្នកប្រើប្រាស់ចិនរីករាយជាមួយផលិតផលកសិកម្មកម្ពុជាស្រស់ៗ រួមមានចេក ស្វាយ អង្ករ មៀនប៉ៃលិន ម្សៅដំឡូងមី និងធូរេនជាដើម។ នេះជាដំណឹងល្អសម្រាប់ពាណិជ្ជកម្មកសិកម្មចិន-កម្ពុជា និងការធ្វើសមាហរណកម្មសេដ្ឋកិច្ចក្នុងតំបន់»។

នៅថ្ងៃទី២២ ខែមិថុនា ឆ្នាំ២០២៦ ពិធីសម្ពោធជាផ្លូវការនៃការដឹកជញ្ជូនកសិផលឆ្លងកាត់ (Transit) ពីកម្ពុជាទៅកាន់ទីផ្សារប្រទេសចិន ដោយឆ្លងកាត់ប្រទេសឡាវ ត្រូវបានប្រារព្ធឡើងនៅទីក្រុងវៀងចន្ទន៍។

សមិទ្ធផលដ៏ធំធេងនេះ គឺកើតចេញពីកិច្ចខិតខំប្រឹងប្រែង និងការចរចាយ៉ាងសកម្មកន្លងមកនេះ ពីសំណាក់ថ្នាក់ដឹកនាំ និងមន្ត្រីជំនាញនៃក្រសួងកសិកម្ម រុក្ខាប្រមាញ់ និងនេសាទ ជាមួយនិងក្រសួងកសិកម្មនិងបរិស្ថានឡាវ ដើម្បីបើកផ្លូវ និងសម្របសម្រួលនីតិវិធីនានា ក្នុងការបើកច្រកថ្មីសម្រាប់ការដឹកជញ្ជូនឆ្លងកាត់កសិផលខ្មែរចំនួន ៦មុខទៅកាន់ទីផ្សារចិន ដែលរួមមានចេក ស្វាយ អង្ករ មៀនប៉ៃលិន ម្សៅដំឡូងមី និងទុរេន។

នេះជាសញ្ញាណវិជ្ជមាន និងជាកាលានុវត្តភាពថ្មីស្រឡាងសម្រាប់បងប្អូនកសិករ ក៏ដូចជាម្ចាស់អាជីវកម្មក្នុងវិស័យកសិកម្មនៅកម្ពុជា ក្នុងការចាប់យកឱកាស និងពង្រីកសក្តានុពលកសិផលខ្មែរនៅលើទីផ្សារអន្តរជាតិ៕