(ព្រះវិហារ)៖ អនុវត្តន៍តាមការណែនាំពីលោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ មន្ត្រីមន្ទីរសុខាភិបាលខេត្ត បានបន្តសហការជាមួយអង្គការ RACHA និងអាជ្ញាធរមូលដ្ឋាន ចុះផ្តល់សេវាពិនិត្យសុខភាពដោយម៉ាស៊ីនអេកូសាស្ត្រដោយឥតគិតថ្លៃ ជូនស្ត្រីមានផ្ទៃពោះរស់នៅតំបន់ដាច់ស្រយាល ក្នុងភូមិស្រែវាល ឃុំធ្មា ស្រុកជ័យសែន ខេត្តព្រះវិហារ ដែលជាតំបន់ស្ថិតនៅឆ្ងាយពីមណ្ឌលសុខភាព និងមន្ទីរពេទ្យ ធ្វើឱ្យប្រជាពលរដ្ឋជួបការលំបាកក្នុងការទៅទទួលសេវាសុខាភិបាល។

សកម្មភាពនេះ បានធ្វើឡើងនាព្រឹកថ្ងៃទី២៤ ខែមិថុនា ឆ្នាំ២០២៦ ដោយមានការចូលរួមពីក្រុមគ្រូពេទ្យរបស់មន្ទីរសុខាភិបាលខេត្ត និងមន្ត្រីមណ្ឌលសុខភាពច្រាច់។ នេះជាលើកទី៥ហើយ ដែលក្រុមការងារបានចុះទៅផ្តល់សេវាពិនិត្យសុខភាពដល់ប្រជាពលរដ្ឋនៅតំបន់ដាច់ស្រយាលនានាក្នុងខេត្ត ដើម្បីធានាថាប្រជាពលរដ្ឋគ្រប់រូបអាចទទួលបានសេវាសុខាភិបាលប្រកបដោយគុណភាព និងសមធម៌។

សកម្មភាពនេះត្រូវបានអនុវត្តឡើងក្នុងគោលបំណង «មិនទុកនរណាម្នាក់ឱ្យនៅឯកោឡើយ» ដោយនាំយកសេវាសុខាភិបាលទៅដល់មូលដ្ឋានផ្ទាល់ ជាពិសេសសម្រាប់ស្ត្រីមានផ្ទៃពោះ និងកុមារតូចៗ ដែលរស់នៅតំបន់ឆ្ងាយដាច់ស្រយាល។

ក្រុមការងារបានពិនិត្យដោយម៉ាស៊ីនអេកូសាស្ត្រជូនស្ត្រីមានផ្ទៃពោះចំនួន ១១នាក់ ដោយទទួលបានការពិនិត្យសុខភាពយ៉ាងយកចិត្តទុកដាក់ ហើយលទ្ធផលបង្ហាញថា មាតា និងទារកក្នុងផ្ទៃទាំងអស់មានសុខភាពល្អជាធម្មតា ពុំមានរោគសញ្ញាគួរឱ្យព្រួយបារម្ភនោះឡើយ។

ជាមួយគ្នានេះ កុមារតូចៗចំនួន ៣៧នាក់ ក៏ត្រូវបានថ្លឹងទម្ងន់ និងវាស់កម្ពស់ ដើម្បីតាមដានការលូតលាស់ និងស្ថានភាពអាហារូបត្ថម្ភ។ លទ្ធផលបង្ហាញថា ពុំមានកុមារណាម្នាក់ជួបបញ្ហាកង្វះអាហារូបត្ថម្ភ ស្គមស្គាំង ឬក្រិននោះទេ។

ក្រុមការងារបានបញ្ជាក់ថា ក្រៅពីការពិនិត្យសុខភាព ក្រុមគ្រូពេទ្យក៏បានផ្តល់ការអប់រំសុខភាព និងផ្សព្វផ្សាយចំណេះដឹងពាក់ព័ន្ធនឹងការថែទាំសុខភាពមាតា ទារក និងការបង្ការ ជំងឺផ្សេងៗ ដើម្បីលើកកម្ពស់ការយល់ដឹង និងជំរុញឱ្យប្រជាពលរដ្ឋចូលរួមថែរក្សាសុខភាពរបស់ខ្លួន និងក្រុមគ្រួសារឱ្យកាន់តែប្រសើរឡើង។

សកម្មភាពនេះបានឆ្លុះបញ្ចាំងពីការយកចិត្តទុកដាក់របស់មន្ទីរសុខាភិបាលខេត្តព្រះវិហារ និងដៃគូអភិវឌ្ឍន៍ ក្នុងការពង្រីកការផ្តល់សេវាសុខាភិបាលទៅដល់ប្រជាពលរដ្ឋនៅតំបន់ដាច់ស្រយាល ស្របតាមគោលនយោបាយរបស់រាជរដ្ឋាភិបាល ក្នុងការលើកកម្ពស់សុខុមាលភាព និងគុណភាពជីវិតរបស់ប្រជាពលរដ្ឋឱ្យកាន់តែប្រសើរឡើង៕