(បរទេស)៖ ព្រឹត្តិការណ៍បាល់ទាត់ពិភពលោក FIFA World Cup 2026 រកឃើញ ១១ក្រុមហើយបានធានាកៅអី ឡើងទៅវគ្គ ៣២ក្រុមជាបន្ត គ្រាដែលអាស៊ីដែលមាន ៩ក្រុមលេងតំណាងទ្វីបនេះ ពុំទាន់មាន ១ក្រុមនៅឡើយទេ។

ការប្រកួតសន្សំពិន្ទុប្រចាំពូល B នាម៉ោង ២រំលងអាធ្រាត្របានបិទបញ្ចប់ហើយ ដោយមានស្វីស និងម្ចាស់ផ្ទះកាណាដា ដឹកដៃគ្នាឡើងវគ្គចាញ់-ធ្លាក់ នៅពេលបូស្នីដែលមាន ៤ពិន្ទុឈរលេខ៣ នោះត្រូវរង់ចាំអ៊ុតលទ្ធផលលេខ៣ ល្អចំនួន ៨ក្រុមនៃ ១២ពូលសរុប ដ្បិតកាតាឈរបាតតារាង ត្រូវឡើងយន្តហោះត្រឡប់មកផ្ទះវិញ។

ស្វីសបានយកឈ្នះម្ចាស់ផ្ទះកាណាដា ២-១ ស្របពេលបូស្នី បានបំបាក់កាតា ក្រុមនៅអាស៊ី ៣-១ ដើម្បីបន្តក្តីសង្ឃឹមឡើងវគ្គ ៣២ក្រុម ក្នុងនាមជាក្រុមបានទម្លាក់ជើងខ្លាំងអាសូរីអ៉ីតាលី នៃវគ្គជម្រុះចុងក្រោយប្រចាំតំបន់អឺរ៉ុប (UEFA)។

នេះមានន័យថា កាណាដាក៏បានឆ្លងចូលវគ្គបន្តដូចទៅនឹងសហម្ចាស់ផ្ទះ World Cup ជំនាន់ទី២៣ ជាមួយមិចស៊ិក និងសហរដ្ឋអាមេរិកផងដែរ មុនពេលពួកគេត្រូវលេងបង្គ្រប់កិច្ចនាចុងសប្តាហ៍នេះ។

ចំណែកឯ ២ប្រកួតបិទបញ្ចប់ពូល C នាព្រឹកថ្ងៃព្រហស្បតិ៍ ទី២៥ ខែមិថុនានេះ សាំបាប្រេស៊ីល និងម៉ារ៉ុក ក៏បានដឹកដៃឆ្ពោះទៅវគ្គ ៣២ក្រុមទៀតដែរ នៅពេលអតីតជើងឯក World Cup ៥សម័យច្រើនជាងគេបានបំបាក់ស្កុតឡេន ៣-០ ស្របគ្នានឹងម៉ារ៉ុកមកពីអាហ្រ្វិក វាយបកឈ្នះហៃទី ៤-២ ដើម្បីឈរលេខ២ និងស្កុតឡេនមាន ៣ពិន្ទុឈរលេខ៣ ចាំអ៊ុតក្រុមលេខ៣ ល្អ នៅពេលហៃទី ត្រូវត្រឡប់ទៅផ្ទះវិញ។

១១ប្រទេសឡើងវគ្គ ៣២ក្រុមផ្លូវការរួមមាន ម្ចាស់ផ្ទះទាំង៣ មិចស៊ិក អាមេរិក និងកាណាដា និង ៣ក្រុមទៀតមកពីតំបន់អាមេរិកឡាទីន អាហ្សង់ទីន កូឡុំប៊ី និងប្រេស៊ីល និងម៉ារ៉ុក មកពីតំបន់អាហ្វ្រិក និង ៤ក្រុមទៀតនៅអឺរ៉ុប បារាំង អាល្លឺម៉ង់ ន័រវេស និងស្វីស។

២ក្រុមនៅអឺរ៉ុបដែលបានបញ្ចប់ចំណាត់ថ្នាក់លេខ៣ ក្នុងពូលរួមមាន បូស្នី និងស្កុតឡេន រង់ចាំអ៊ុតលទ្ធផលក្រុមលេខ៣ ក្នុងចំណោម ១២ពូល (A-L) និង ៤ក្រុមផ្សេងទៀតហាលអាវពី World Cup 2026 ជាស្ថាពររួមមាន កាតា ហៃទី ទុយនេស៊ី និងប៉ាណាម៉ា៕