(ភ្នំពេញ)៖ ក្រសួងបរិស្ថាន នឹងរៀបចំយុទ្ធនាការ «ពន្លកបៃតង» ឆ្នាំ២០២៦ ចែកកូនឈើជូនប្រជាពលរដ្ឋដោយឥតគិតថ្លៃ តាមរយៈកម្មវិធីផ្សព្វផ្សាយនិងចែកកូនឈើក្រោមប្រធានបទ «ពន្លកបៃតង» ឆ្នាំ២០២៦ នៅមុខទីស្តីការក្រសួង ចាប់ពី ថ្ងៃទី១០ ដល់ថ្ងៃទី១៣ ខែកក្កដា ឆ្នាំ២០២៦។

ក្រសួងបរិស្ថានមានគម្រោងចែកកូនឈើចំនួន ៥លានដើម ក្នុងនោះមានកូនត្នោត ១,៥លានដើម ជូនប្រជាពលរដ្ឋយកទៅដាំនៅតាមគេហដ្ឋាន សាលារៀន វត្តអារាម នៅតាមទីតាំងសាធារណៈផ្សេងៗ និងដាំស្តារព្រៃសហគមន៍ នៅទូទាំងប្រទេសនៅរដូវវស្សាឆ្នាំ ២០២៦នេះ។

សូមបញ្ជាក់ថា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានផ្ដល់ការណែនាំដល់ក្រសួងបរិស្ថានរៀបចំកម្មវិធី «ពន្លកបៃតង» ដើម្បីធ្វើការបណ្តុះ និងចែកកូនឈើ ជូនប្រជាពលរដ្ឋដោយឥតគិតថ្លៃ ជារៀងរាល់ឆ្នាំ សម្រាប់យកទៅដាំ ពង្រីកគម្របបៃតងនៅកម្ពុជា និងលើកកម្ពស់សេដ្ឋកិច្ចមូលដ្ឋាន ឆ្ពោះទៅសម្រេចបានគោលដៅ កម្ពុជាអព្យាក្រឹតកាបូននៅឆ្នាំ២០៥០។

ក្រសួងបរិស្ថាន បានបណ្តុះកូនឈើរាប់លានដើមរួចរាល់ហើយ នៅតាមមន្ទីរបរិស្ថានរាជធានី-ខេត្ត និងថ្នាលបណ្តុះកូនឈើថ្នាក់តំបន់ទាំង៥ នៅខេត្តត្បូងឃ្មុំ សៀមរាប កំពង់ស្ពឺ មណ្ឌលគិរី និងកោះកុង ដើម្បីត្រៀមចែកជូនដល់ប្រជាពលរដ្ឋ យកទៅដាំដោយឥតគិតថ្លៃ តាមរយៈកម្មវិធី «ពន្លកបៃតង» នៅមុខទិស្តីការក្រសួងបរិស្ថាន។

លើសពីនេះ ប្រជាពលរដ្ឋអាច ទទួលបានកូនឈើតាមរយៈ មន្ទីរបរិស្ថានរាជធានី-ខេត្ត ទូទាំងប្រទេស និងនៅតាមថ្នាលបណ្តុះកូនឈើថ្នាក់តំបន់ទាំង៥ បន្ថែមទៀត៕